Ləŋ-ŋwɩ Tɔnɔ 4
Le 90-106
Baŋa-Wɛ dɩ nabiinǝ taanɩ
Wɛ tɩntʋŋnʋ Moyisi wɛ-loro
90
Baŋa-Wɛ,kʋ na zɩgɩ faŋa faŋa tɩn,
nmʋ mʋ maŋɩ n pa dɩbam jǝŋǝ je
sɩ dɩ́ taa zʋʋrɩ n woro kʋm wʋnɩ.
2 Pweeru tɩm ya ta na tǝrǝ tɩn,
nmʋ maŋɩ n yɩ Wɛ mʋ.
N maŋɩ n wʋra mʋ
yɩ n ta wʋ naanɩ tɩga kam
dɩ lʋgʋ baŋa maama.
Nmʋ ba jɩgɩ pulim,
yɩ n nan ta ba jɩgɩ gurim.a
3 Nmʋ paɩ nabiinǝ joori
ba jiri tɩɩrʋ mʋ,
yɩ n wɩ: «Nɔn-biə bam,
joori-na á ji tɩɩrʋ!»
4 Bɩna mʋrʋ daɩ kʋlʋkʋlʋ
nmʋ tee nɩ!
Yantʋ nyɩ dɩdaanɩ dɛ dɩdʋa
na kɩ lɩla dɩ kɛ te tɩn mʋ.
Ya nyɩ dɩ luu yale naa yatɔ
tɩtɩɩ-kʋnkʋrʋ nɩ mʋ ya pa‑m.b
5 Nmʋ yǝni n pa dɩ́ ŋwɩa kam ba ka kweeli lɩla,
nɩnɛɛnɩ dɩndwɩa na ti
yɩ ka je te tɩn mʋ.
Nabiinǝ nyɩ dɩ ga-lɛɛrʋ
na nuŋi tɩ-pʋra nɩ tɩn mʋ.
6 Zɩzɩŋa nɩ mʋ tɩ yǝni tɩ puli
yɩ tɩ lana.
Kʋ daarɩ dɩdaan-ni maŋa nɩ
tɩ wʋ́ kwaarɩ mʋ.c
7 Cɩga tɩn, nmʋ ban-zɔŋɔ kʋm yǝni
kʋ jaanɩ dɩbam kʋ cɔga,
pa dɩ́ tiini dɩ́ kwarɩ fʋʋnɩ.
8 Dɩbam lwarɩm mʋ jarɩ
nmʋ yigə nɩ.
Kǝm-balwaarʋ tɩlʋ
dɩ́ na kɩ dɩ́ səgi tɩn
dɩ maa lwarɩ jaja nmʋ tee nɩ.d
9 Dɩ́ ŋwɩa kam da yam maa kɛa
yɩ ya laan ba ya kweeli,
nmʋ ban-zɔŋɔ kʋm ŋwaanɩ.
Dɩ́ bɩna yam na tu ya ti te tɩn
maa nyɩ dɩ dɩ́ suuri
yɩ dɩ́ daarɩ dɩ́ tɩ mʋ te.
10 Nabiinu ŋwɩa waɩ ka yɩ
nɩnɛɛnɩ bɩna fusɩrpɛ mʋ.
Yazurə na wʋra,
badonnǝ brɩ ba yi bɩna funɔnɔ.
Dɩ na maŋɩ dɩ́ jɩgɩ tɩɩra yalʋ,
dɩ́ ŋwɩa kam yǝni ka jaanɩ
yaara dɩ wʋ-cɔgɔ yɩranɩ mʋ ka tui.
Dɩ́ da yam da ya ti mʋ,
yɩ dɩ́ daarɩ dɩ́ je lɩla.
11 Nɔɔn-nɔɔnʋ warɩ sɩ o lwarɩ
nmʋ ban-zɔŋɔ kʋm na daga te tɩn.
N banɩ dɩm jaanɩ fʋʋnɩ mʋ dɩ tui
dɩ ma dɩ fugi nɔɔna.
12 Nan wǝli dɩbam sɩ dɩ́ jeeli
dɩ́ da yam ni
sɩ dɩ́ lwarɩ ya na muri te tɩn.
Kʋ maa wʋ́ pa dɩ́ ja swan.
13 Dɩ́ Tu Baŋa-Wɛ, joori n ba lɩla
n wǝli dɩbam!
Yɩ daanɩ!
Duri dɩbam ŋwaŋa
sɩ dɩ́ yɩ n tɩntʋŋna mʋ.
14 Zɩzɩŋa na yiǝ,
pa n sono kʋm su
dɩbam bɩcara.
Dɩ́ laan wʋ́ taa leeni dɩ wʋpolo,
yɩ ywəəni wʋra sɩ kʋ vu
kʋ yi dɩ́ ŋwɩa kam kweelim.
15 Nmʋ dɛɛn na pɛ dɩ́ na yaara
da yalʋ wʋnɩ tɩn,
nan joori n pa dɩ́ na wʋpolo
sɩ kʋ yi da yam kʋntʋ ni.
Pa dɩ́ di ywəəni
sɩ kʋ maŋɩ dɩ bɩna yalʋ
dɩ́ wʋʋ ya na cɔgɩ tɩn.
16 Nan zaŋɩ n tʋŋɩ wo-kamunnu
n pa dɩbam balʋ
na yɩ n tɩntʋŋna tɩn.
Pa dɩ́ biə bam lwarɩ n na tiini
n jɩgɩ kajannɩ te tɩn.
17 Dɩbam Yuutu Wɛ,
pa n yu-yoŋo taa wʋ dɩbam yuu nɩ!
A loori-m, pa dɩ́ tɩtʋŋa yam kɩ lanyɩranɩ.
Ɛɛn, pa ya tiini ya kɩ lanyɩranɩ.