Baŋa-Wɛ sono wʋra maŋa maama
Esdrasɩ dwi tu Etan dɛɛn panɩ ləŋə kantʋ.a
89
Amʋ wʋ́ taa leeni mʋ a zuli Baŋa-Wɛ sono kikiə yam,yɩ a bá yagɩ.
Amʋ ni-taanɩ dɩm wʋ́ pa
nɔɔna maama dɩ ba biə bam
lwarɩ nmʋ na zɩgɩ n cɩga kam wʋnɩ te tɩn.
2 Cɩga tɩn, n sono kʋm wʋra mʋ
taan wuu yɩ kʋ bá je.
Maŋa maama n zɩgɩ n cɩga wʋnɩ,
nɩnɛɛnɩ wɛyuu kʋm na fɔgɩ
kʋ jɩgɩ dam maŋa maama te tɩn.
3 Nmʋ, Baŋa-Wɛ tagɩ n wɩ:
«Amʋ goni ni mʋ
dɩ Pɛ wʋlʋ a na kuri tɩn.
Wʋntʋ yɩ a tɩntʋŋnʋ Davidi
yɩ a dugi durə dɩdaan‑o nɩ:
4 Nmʋ dwi dɩm wʋ́ taa wʋra
maŋa maama, dɩ bá je,
pa n biə wʋnɩ nɔɔnʋ mʋ
wʋ́ taa di paarɩ
sɩ kʋ taa ve maŋa kalʋ na ba ti tɩn.»b
5 Amʋ Tu Baŋa-Wɛ,
wɛyuu kʋm maama mʋ lagɩ
kʋ zuli nmʋ tɩtʋŋ-kamunnu tɩm.
Cɩga tɩn, wɛyuu malɛsɩ sɩm
maa gilimi sɩ tee nmʋ,
dɩ n na zɩgɩ dɩ cɩga tɩn ŋwaanɩ.
6 Wɛyuu kʋm maama na tigi palalala tɩn,
nmʋ doŋ tǝrǝ.
Kʋ nan na yɩ wa dɩ malɛsɩ maama,
ba wʋlʋwʋlʋ ba maɩ
dɩ nmʋ Baŋa-Wɛ!
7 Malɛsɩ sɩm na jeeri nmʋ yigə nɩ,
sɩ wʋ́ taa kwarɩ fʋʋnɩ dɩ nmʋ mʋ,
nmʋ na tiini n maŋɩ dɩ zulə
n dwe balʋ maama na wʋra tɩn ŋwaanɩ.
8 Paŋwa Tu Baŋa-Wɛ,
nmʋ ba jɩgɩ doŋ!
Nɔɔn-nɔɔnʋ tǝrǝ o na jɩgɩ dam
nɩnɛɛnɩ nmʋ tɩn.
Nmʋ kənə maama wʋnɩ mʋ
n zɩgɩ n cɩga kam wʋnɩ.
9 Kʋ na yɩ nɩnɩʋ kʋm
dɩ kʋ pɔgɩlɩm dɩm,
nmʋ mʋ jɩgɩ dam kʋ baŋa nɩ.
Kʋ na-ŋʋnɩ sɩm na fufugi zanzan,
n yǝni n pa kʋ maŋɩ da yirr mʋ.
10 Nmʋ dɛɛn jaanɩ nɩnɩʋ wʋ juru Rahabɩ n cɩcʋgɩ.
N ta mɛ n dam dɩm
n zəli n dʋna bam maama
pa ba jagɩ.c
11 Wɛyuu dɩdaanɩ tɩga baŋa maama
yɩ nmʋ nyɩm mʋ.
Lʋgʋ baŋa dɩ woŋo kʋlʋ maama na wʋ kʋ wʋnɩ tɩn,
kʋ yɩ nmʋ mʋ naanɩ tɩ maama.
12 Lʋgʋ kʋm wɛ-baŋa seeni
dɩdaanɩ jagwiə seeni
yɩ nmʋ mʋ naanɩ sɩ maama.
Tabɔɔrɩ piu kʋm dɩ Hɛrmɔn piu kʋm te nmʋ yɩrɩ dɩm,
nɩ nɔɔna na leeni dɩ wʋpolo te tɩn.
13 N jɩŋa kam tiini ka jɩgɩ dam!
N jazɩm dɩm maa wʋ wɛɛnɩ,
n na di n dʋna tɩn ŋwaanɩ.
14 Nmʋ paarɩ dɩm jɩgɩ dam,
n na tɔgɩ cɩga
n te n nɔɔna bam tɩn ŋwaanɩ.
Nmʋ na kɩ te tɩn,
n brɩ n sono kʋm
dɩ n cɩga kam na yɩ te tɩn
maŋa maama.
15 Amʋ Tu Baŋa-Wɛ,
balʋ na ye sɩ ba zuli n yɩrɩ dɩm tɩn
jɩgɩ yu-yoŋo zanzan.
Nmʋ lanyɩranɩ dɩm mʋ kwǝli-ba
ba vəŋə maama wʋnɩ.
16 Dɛ dɩm maama wʋnɩ ba yǝni
ba te n yɩrɩ dɩ wʋpolo.
Ba maa pa‑m zulə,
n na tɔgɩ cɩga yɩranɩ tɩn ŋwaanɩ.
17 Nmʋ mʋ yɩ wʋlʋ na paɩ dɩbam
dam dɩ paarɩ-zulǝ tɩn.
Nmʋ na yǝni n kɩ dɩbam yu-yoŋo tɩn
mʋ pa dɩ́ di wɔnɔ.
18 Dɩ́ Pɛ wʋm yɩ wʋlʋ
Baŋa-Wɛ na kuri tɩn.
O maa cʋ dɩbam dɩ́ cam wʋnɩ
nɩ jara-kǝm cɩ-kwaŋa mʋ te.
Dɩ́ Pɛ wʋm yɩ Yisɩrayɛlɩ dwi dɩm
Wʋ-poŋo Tu wʋm mʋ tee‑DƖ.
Baŋa-Wɛ ni-gonim dɩ Pɛ Davidi
19 Faŋa faŋa tɩn, n dɛɛn vɩɩrɩ n tɩtɩ
dɩ n nijoŋnǝ bam yɩ n wɩ:
«Amʋ zǝni nɔn-babɩa dɩdʋa
pa o joŋi dam.
Cɩga tɩn, a kuri nɔn-dʋŋʋ
nabwənə wʋnɩ
yɩ a daarɩ a zǝŋ-o sɩ o na zulə.
20 Amʋ nɛ a tɩntʋŋnʋ Davidi,
yɩ a lɩ-o sɩ o ji pɛ.
A ma lo a tɩtɩ yu-yoŋo nugə kam
o yuu nɩ, sɩ a ma tiŋ‑o paarɩ.d
21 Amʋ mʋ lagɩ a pa o zɩgɩ cɛpɩ.
A ta wʋ́ twɩ a jɩŋa
sɩ a pa o na dam.
22 O dʋna bá fɔgɩ ba zaŋɩ o baŋa nɩ
ba wan‑o.
Nɔn-balwaarʋ dɩ nan bá wanɩ
ba bɛɛs-o.
23 Amʋ wʋ́ zəli o sɩbara o yigə nɩ,
yɩ a daarɩ a cɔgɩ-ba.
A ta wʋ́ magɩ balʋ maama na cul‑o tɩn a dɩ tɩga nɩ.
24 Amʋ wʋ́ taa zɩgɩ o kwaga nɩ
maŋa maama.
A sono kʋm dɩ wʋ́ taa wʋ o tee nɩ.
A ta wʋ́ pa o na dam dɩ zulə
amʋ tɩtɩ yɩrɩ ŋwaanɩ.
25 Kʋ na yɩ tɩɩnɩ dɩlʋ na wʋ
nanɩɩrʋ tɩm kwaga nɩ tɩn,
dɩdaanɩ dɩlʋ na wʋ
bu-tʋlɩ sɩm kwaga nɩ tɩn,
a wʋ́ pa o dam sɩ o taa te-dɩ
o wǝli o paarɩ dɩm wʋnɩ.
26 Pɛ Davidi wʋ́ taa bǝi a yɩrɩ
yɩ o wɩ:
‹Nmʋ mʋ yɩ amʋ Ko.
N ta maa yɩ amʋ Wɛ dɩm.
N yɩ piu kʋlʋ na yɩ amʋ dalɩm je tɩn mʋ
yɩ a na vrɩm n tee nɩ.›
27 Cɩga tɩn, a lagɩ a pa o ji
amʋ bu-kwɩan mʋ.
Oó di paarɩ sɩ kʋ taa dwe
lʋgʋ baŋa pwa bam maama.
28 A sono kʋm wʋ́ taa wʋ o tee nɩ
maŋa maama.
A daa bá fɔgɩ a lɔ ni-gonim dɩlʋ
a na kɩ dɩd-o tɩn kwaga nɩ.
29 Amʋ wʋ́ pa o dwi dɩm taa wʋra
maŋa maama, dɩ bá je,
pa o biə wʋnɩ nɔɔnʋ taa di paarɩ,
nɩnɛɛnɩ wɛyuu kʋm na wʋra
maŋa maama te tɩn.
30 Dɛ dɩlʋ o biə bam wʋ́ lɔ
amʋ niə yam kwaga nɩ,
yɩ ba vɩn sɩ ba taa tɔgɩ
amʋ cwe sɩm.
31 Ba waɩ ba yagɩ a zaasɩm dɩm,
yɩ ba vɩn a ni-kaana yam.
32 Ba na kɩ kʋntʋ,
amʋ wʋ́ waarɩ-ba
ba tusim dɩm ŋwaanɩ.
Cɩga tɩn, a lagɩ a tiini a magɩ-ba
ba lwarɩm dɩm ŋwaanɩ mʋ.
33 Dɩ kʋntʋ maama dɩ,
a daa bá cɔgɩ a sono kʋm
a na jɩgɩ dɩ Davidi tɩn.
Amʋ ta wʋ́ taa zɩgɩ
a cɩga kam kwaga nɩ a pa‑o.
34 Amʋ na goni ni dɩlʋ a pa‑o tɩn mʋ
a bá fɔgɩ a lɔ dɩ kwaga nɩ.
A bá kwanɩ kampwələ kalʋ
a na goni ni dɩd-o tɩn.
35 Bɩdwɩ baŋa nɩ mʋ a dugi durə
dɩd-o a tɩtɩ yɩrɩ dɩm ŋwaanɩ,
yɩ kʋ ti.
A brɩ a bá fɔ vwan dɩd-o.
36 Cɩga tɩn, amʋ wʋ́ pa o dwi dɩm
taa wʋra maŋa maama, dɩ bá je,
pa o biə wʋnɩ nɔɔnʋ
taa di paarɩ maŋa maama,
nɩnɛɛnɩ wɩa kam na zɩgɩ
wɛyuu nɩ te tɩn.
37 Davidi dɩ o dwi paarɩ dɩm
wʋ́ taa zɩgɩ dɩ dam.
Dɩ ta wʋ́ brɩ Wɛ cɩga kam jaja
nɩnɛɛnɩ cana kam na wʋ
wɛyuu nɩ ka naɩ jaja te tɩn.»
Wʋ-cɔgɔ ləŋə
38 Baŋa-Wɛ, nmʋ banɩ laan nan zaŋɩ mʋ.
Kʋ na yɩ pɛ wʋlʋ nmʋ tɩtɩ na kuri tɩn,
nmʋ mɛ n kwaga n ya wʋntʋ,
yɩ n van‑o.
39 N ta ma cɔgɩ ni dɩlʋ n na goni
dɩ n tɩntʋŋnʋ wʋm tɩn
yɩ n daarɩ n dʋlɩ o paarɩ yipugə kam n dɩ tɩga nɩ
pa kasʋlʋ taagɩ ka maama.
40 Nmʋ pɛ o tɩʋ kʋm kabri sɩm
bwəri sɩ tʋ tɩga nɩ.
Dam je sɩlʋ ya na wʋ́ kwǝl‑o tɩn
laan jigi di-dwəənu.
41 Vərə balʋ maama
na tɔgɩ da ba kɛ tɩn
dɩ yǝni ba pɛ o jɩjɩgɩrʋ mʋ
ba ja ba viiri.
Tɩɩnɩ dɩlʋ na gilimi dɩbam tɩn nɔn-biə bam
maa jɩgɩ dɩ́ pɛ wʋm ba goonə.
42 N ma n pa o dʋna bam na dam
dɩdaanɩ zulə.
Ba maa tiini ba jɩgɩ wʋpolo
yɩ ba kwɛɛra.
43 O na zaŋɩ najara tɩn,
n pɛ o joori kwaga
o dʋna bam yigə nɩ.
N wʋ sɛ sɩ n zən‑o najara yam wʋnɩ
yɩ o dʋna bam di‑o.
44 N kwe o paarɩ zɩla yam
n dʋlɩ n yagɩ,
pa o daa ba jɩgɩ nɩnwaŋa.
45 N ta pɛ kʋkwɩɩrʋ mʋ yi‑o lɩla,
yɩ o jɩgɩ o cavɩɩra o di.
Wɛ-loro zǝnǝ ŋwaanɩ
46 Amʋ Tu Baŋa-Wɛ!
Kʋntʋ tɩn, kʋʋ́ taa yɩ tɩntʋ mʋ taan na?
Nń ta n səgi n tɩtɩ
maŋa maama mʋ na?
N banɩ na tiini dɩ zaŋɩ tɩn,
n bá pa dɩ zuri lɩla na?
47 Yɩ swe nɩ amʋ ŋwɩa kam
yɩ kukugə mʋ.
Bɛɛ mʋ yɩ n pa nabiinǝ maama ŋwɩa yɩ kafɛ yɩranɩ kʋntʋ?
48 Nɔɔn-nɔɔnʋ tǝrǝ o na ŋwɩ
yɩ o wanɩ o lu tʋʋnɩ jɩŋa nɩ.
Nɔɔnʋ maama maŋɩ sɩ o tɩ
yɩ o daarɩ o zʋ tɩga kuri.
49 Baŋa-Wɛ, nmʋ dɛɛn dugi durə nɩ
n sono kʋm wʋ́ taa wʋ
Pɛ Davidi tee nɩ.
N sono kʋm kʋntʋ
laan nan je mʋ na?
N ta zɩgɩ n cɩga kam kwaga nɩ na?
50 Amʋ Yuutu Wɛ, amʋ wʋlʋ na yɩ
n tɩntʋŋnʋ tɩn nɛ a cavɩɩra,
Nɔɔna jɩgɩ-nɩ ba kɩ ba mwana zanzan.
Laan nan guli amʋ gulə.
51 Amʋ Tu Baŋa-Wɛ!
Amʋ mʋ yɩ Pɛ wʋlʋ
nmʋ na kuri tɩn.
Kʋ yɩ n dʋna bam mʋ jɩgɩ-nɩ
ba twɩa.
Amʋ na ve mɛ maama,
ba yǝni ba mwanɩ-nɩ zanzan.
52 Baŋa-Wɛ maŋɩ dɩ tiə
sɩ kʋ taa ve maŋa kalʋ na ba ti tɩn!
Amina! Amina!