Wɛ-loro liǝ ŋwaanɩ
Kʋra bu-baara dɛɛn panɩ ləŋə kantʋ yɩ Esdrasɩ dwi tu Hemanɩ wǝli-ba.
88
Baŋa-Wɛ, nmʋ mʋ yɩ dɩlʋna vrɩ-nɩ n yagɩ tɩn.
Amʋ nan keeri a loori nmʋ mʋ
wɩa dɩdaanɩ tɩtɩ maama.
2 A loori-m, pʋrɩ n zwa
n cəgi a wɛ-loro kʋm,
sɩ n daarɩ n zəni-nɩ.
3 Can-nɛɛra zanzan tiini ya daanɩ
a ŋwɩa maama mʋ,
pa tʋʋnɩ lagɩ dɩ ja-nɩ lɩla.
4 Nɔɔna maa nii amʋ nɩ
a lagɩ a tɩ mʋ
sɩ a vu a maŋɩ tɩga kuri nɩ.
Amʋ nyɩ dɩ wʋlʋ dam daa na tǝri o tee nɩ tɩn mʋ.
5 Amʋ ba garɩ balʋ na maŋɩ ba tɩ
yɩ ba tigi ba bɔɔna wʋnɩ tɩn.
A maa nyɩ dɩ balʋ
n na swe ba ni nɩ
yɩ n yigə daa tǝri ba wʋnɩ tɩn.
6 N yɔɔrɩ n dʋlɩ-nɩ mʋ
n yagɩ goŋ-canluŋu wʋnɩ,
pa a je lim-nyɔrɩsɩ wʋnɩ.
7 Nmʋ ban-lʋm dɩm yɔɔrɩ
dɩ wʋ amʋ yuu nɩ.
N ma n pa cam zanzan yi amʋ
nɩ nɩnɩʋ wʋ na-ŋʋnɩ na bibili
sɩ tɔgɩ amʋ baŋa
sɩ maa kɛa dɩ dam te tɩn.
8 N pwɛ amʋ dɩ a cilon-sonnu tɩm daanɩ,
a na jigi wo-zɔɔnɩ ba tee nɩ tɩn ŋwaanɩ.
Kʋ nyɩ dɩ a na tʋ cɩkʋ wʋnɩ
yɩ a daa warɩ sɩ a lu te tɩn mʋ.
9 A laan keeri keeri
pa a yiǝ su dɩ yi-na,
a wʋʋ na cɔgɩ tɩn ŋwaanɩ.
Baŋa-Wɛ, dɛ maama wʋnɩ
amʋ keeri a loori nmʋ mʋ.
A maa yǝni a zǝŋi a jɩa
a loori zǝnǝ n tee nɩ.
10 Kʋ nan na yɩ balʋ na tɩgɩ tɩn,
nmʋ ta tʋŋɩ wo-kɩnkagɩla
n pa-ba na?
Bantʋ daa wʋ́ wanɩ ba zaŋɩ wɛɛnɩ
sɩ ba taa tee‑m na?
11 Balʋ na kɩ ba tigi tɩga kuri nɩ tɩn
daa wʋ́ taa tɛ n sono kʋm taanɩ na?
Balʋ na wʋ curu nɩ tɩn
daa wʋ́ taa brɩ n na zɩgɩ
n cɩga kam wʋnɩ te tɩn na?
12 Baá wanɩ ba jǝni je sɩlʋ
na yɩ lim yɩranɩ tɩn wʋnɩ
ba lwarɩ n wo-kɩnkagɩla yam
ni nɩ na?
Nmʋ ta na tʋŋɩ wo-laarʋ tɩlʋ tɩn
wʋ́ brɩ je sɩlʋ nɔɔna na swe woŋo maama ni nɩ tɩn na?
13 Baŋa-Wɛ, kʋ nan na yɩ amʋ,
a yǝni a keeri a gwəri nmʋ mʋ.
Zɩzɩŋa maama a yǝni
a loori zǝnǝ mʋ n tee nɩ.
14 Amʋ Tu Baŋa-Wɛ, bɛ nan mʋ kɩa
yɩ n vɩ-nɩ kʋntʋ?
Bɛɛ mʋ yɩ n laan pipiri n kwaga
n ya amʋ?
15 Kʋ na maŋɩ kʋ zɩgɩ
a nɔn-dʋnnɩ maŋa nɩ tɩn
a yɔɔrɩ a yaarɩ taan mʋ
yɩ tʋʋnɩ tiini dɩ bwələ a tee nɩ.
Nmʋ pɛ can-nɛɛra yɔɔrɩ
ya fugi-nɩ mʋ,
pa a dam maama ti.
16 Nmʋ ban-lʋm dɩm dwe
amʋ jam.
N ta na logi lɛɛrʋ tɩlʋ
amʋ yuu nɩ tɩn mʋ
lagɩ tɩ pa a ŋwɩa kam cɔgɩ.
17 Can-nɛɛra yam kʋntʋ tiini
ya daanɩ-nɩ dɛ maama wʋnɩ.
Ya ma kaagɩ a maama ya pu
nɩ dʋ-fara tɩn.
18 Nmʋ pɛ a doonə dɩ a cilon-sonnu maama kɩ baŋwɩan mʋ dɩ amʋ.
Lele kʋntʋ lim-nyɔrɩsɩ yɩranɩ mʋ
wʋ amʋ tee nɩ.