Wɛ-loro zǝnǝ ŋwaanɩ
Davidi dɛɛn panɩ ləŋə kantʋ.
86
Baŋa-Wɛ, pʋrɩ n zwasɩ n cəgi a wɛ-loro kʋm,
sɩ amʋ yɩ nabwəm mʋ
yɩ yinigə jɩgɩ-nɩ.
2 Ta n cʋ a ŋwɩa,
a na kɩ a cɩga dɩ nmʋ tɩn ŋwaanɩ.
A yɩ n tɩntʋŋnʋ mʋ,
yɩ a ta kɩ a wʋ-dɩdʋa dɩ nmʋ.
Joŋi-nɩ n yagɩ, sɩ nmʋ mʋ yɩ amʋ Tu Wɛ dɩm.
3 Amʋ Yuutu Wɛ, duri amʋ yibwənə,
sɩ a yɔɔrɩ a keeri a loori nmʋ mʋ
dɛ dɩm maama wʋnɩ.a
4 Ta pa a di ywəəni.
Amʋ Yuutu, nmʋ mʋ
a kwe a tɩtɩ a pa‑m.
5 Nmʋ Baŋa-Wɛ yɔɔrɩ n lana.
N yigə maa wʋ nɔɔna wʋnɩ
sɩ n kwe ba lwarɩm
n ma n cɛ-ba.
Kʋ na yɩ balʋ maama na loori zǝnǝ n tee nɩ tɩn,
n tiini n jɩgɩ ba sono mʋ maŋa maama.
6 Amʋ Tu Baŋa-Wɛ,
cəgi a wɛ-loro kʋm,
dɩ a na magɩ a japoori a loori n yigə nɩ te tɩn.
7 Amʋ na zʋ cam wʋnɩ,
a yǝni a loori zǝnǝ mʋ n tee nɩ.
Bɛŋwaanɩ, a ye nɩ nmʋ wʋ́ ləri
a wɛ-loro kʋm.
8 Amʋ Yuutu, nmʋ doŋ tǝrǝ
wa yam maama wʋnɩ.
Nmʋ tɩtʋŋ-kamunə yam dɩ
ba jɩgɩ doŋ.
9 Lʋgʋ baŋa tɩɩnɩ dɩm maama nɔɔna
wʋ́ ba ba jeeri nmʋ yigə nɩ
ba tiiri ba zuli‑m,
sɩ kʋ yɩ nmʋ mʋ kɩ
tɩɩnɩ dɩm maama.
Ba maa wʋ́ pa nmʋ yɩrɩ dɩm
na zulə.b
10 Bɛŋwaanɩ, nmʋ tiini n jɩgɩ dam
yɩ n tʋŋɩ wo-kɩnkagɩla zanzan.
Nmʋ yɩranɩ mʋ nan yɩ Wɛ.
11 Baŋa-Wɛ, pa a lwarɩ n cwǝŋǝ kam,
sɩ a taa waɩ a ve
a tɔgɩ n cɩga kam.
Ta pa a taa jɩgɩ wʋbʋŋ-dɩdwɩ
a ŋwɩa wʋnɩ
sɩ kʋ pa a taa kwarɩ
n yɩrɩ dɩm yɩranɩ.
12 Amʋ Yuutu Wɛ,
amʋ wʋ́ tiini a tee‑m
dɩ a bɩcarɩ maama.
A ta wʋ́ zuli n yɩrɩ dɩm
sɩ kʋ taa ve maŋa maama.
13 Bɛŋwaanɩ, nmʋ na tiini
n soe amʋ te tɩn gaalɩ.
N ma n cɩ tʋʋnɩ
sɩ dɩ yɩ wanɩ-nɩ dɩ ja.
14 Amʋ Tu Wɛ, banɩgɩrʋ nyɩna
mʋ zaŋɩ ba zɩgɩ amʋ zɩga.
Wʋ-lʋŋ-nyɩna ma kɩ daanɩ
ba kwaanɩ sɩ ba gʋ-nɩ.
A dʋna bam kʋntʋ yigə tǝrǝ dɩ nmʋ.
15 Baŋa-Wɛ, nmʋ nan jɩgɩ nabiinǝ ŋwaŋa,
yɩ n kɩ ba yu-yoŋo.
N ma n yǝni n pɩɩnɩ n banɩ.
N sono kʋm gaalɩ,
yɩ n cɩga kam dɩ bá fɔgɩ ka ti.
16 Nan tiiri n nii amʋ seeni,
sɩ n daarɩ n duri a ŋwaŋa.
A yɩ n tɩntʋŋnʋ mʋ.
Pa a fɔgɩ a na dam.
Cɩga tɩn, a yɩ gambaa mʋ n sɔŋɔ nɩ.
Nan joŋi-nɩ n yagɩ.
17 Kɩ nyɩnyʋgʋ woŋo n brɩ-nɩ,
sɩ kʋ brɩ nɩ n yigə wʋ amʋ wʋnɩ.
A dʋna bam maa wʋ́ lwarɩ
kʋ na yɩ te tɩn
yɩ cavɩɩra di-ba kʋ ŋwaanɩ.
Bɛŋwaanɩ, nmʋ Baŋa-Wɛ mʋ zəni-nɩ
yɩ n ta paɩ a wʋʋ zurǝ.