Wɛ-loro yazurə ŋwaanɩ
Kʋra bu-baara dɛɛn panɩ ləŋə kantʋ.
85
Baŋa-Wɛ, nmʋ pɛ n yu-yoŋo wʋ n tɩga kam baŋa nɩ.Nmʋ ma n pa Zakɔbɩ dwi tiinə bam joori ba zɩgɩ dɩ dam.
2 N ta kwe n nɔɔna bam gɛɛrɩ dɩm mʋ
n yagɩ n ma n cɛ-ba,
pa ba lwarɩm maama kwǝli.a
3 Nmʋ ma n zuri n ban-lʋm dɩm
sɩ dɩ daa yɩ taa wʋ dɩbam yuu nɩ.
4 Nmʋ Wɛ yɩ dɩbam Vɩrnʋ mʋ.
A loori-m, pa dɩ́ joori dɩ́ fɔgɩ
dɩ́ zɩgɩ dɩ dam.
Daa n yɩ ma n kwaga n ya dɩbam.
5 Nń pa n banɩ dɩm taa wʋ dɩbam baŋa nɩ taan wuu
sɩ n ta kwe-dɩ n daŋɩ
dɩ́ biə bam baŋa nɩ na?
6 N bá joori n pa dɩ́ fɔgɩ
dɩ́ na yazurə na?
N na kɩ kʋntʋ,
dɩbam balʋ na yɩ n nɔɔna tɩn
daa wʋ́ taa di ywəəni nmʋ ŋwaanɩ.
7 Baŋa-Wɛ, pa dɩ́ lwarɩ n na yɔɔrɩ
n jɩgɩ dɩ́ sono te tɩn,
sɩ n daarɩ n joŋi dɩbam n yagɩ.
8 Amʋ nan wʋ́ cəgi sɩ a ni
Yuutu Baŋa-Wɛ na wʋ́ ta kʋlʋ tɩn.
O maa ŋɔɔnɩ yazurə taanɩ mʋ
dɩ DƖ nɔɔna balʋ na jɩgɩ cɩga dɩ DƖ tɩn.
Kʋ nan daɩ sɩ bantʋ joori
ba zʋ ba jwərim kikiə wʋnɩ.
9 Cɩga ŋwaanɩ tɩn, DƖ lagɩ DƖ kɩ lɩla mʋ
DƖ joŋi balʋ na kwarɩ-DƖ tɩn DƖ yagɩ.
Kʋntʋ maa wʋ́ pa
DƖ paarɩ-zulǝ yam taa naɩ jaja
dɩbam tɩga kam je maama nɩ.
10 Sono dɩdaanɩ cɩga tɔgɩm
mʋ jeeri daanɩ.
Nɔn-ŋʋnnɩ kikiə dɩ yazurə
maa kukwəri daanɩ.
11 Ka-zɩge-ka-cɩga-wʋnɩ mʋ lagɩ
ka ta ka nuŋi tɩga nɩ.
Ka-tɔgɩ-cɩga dɩ maa zɩgɩ wɛyuu nɩ
ka nii tɩga baŋa seeni.b
12 Cɩga ŋwaanɩ tɩn,
Baŋa-Wɛ wʋ́ pa dɩ́ na wo-laarʋ.
Dɩ́ tɩga kam dɩ maa wʋ́ kɩ wʋdiiru
zanzan ka pa dɩbam.
13 Cɩga mʋ tɔgɩ Wɛ yigə ka veǝ,
pa DƖ na cwǝŋǝ DƖ tɔgɩ da.