Wɛ zulə lana zanzan
Kʋra bu-baara dɛɛn panɩ ləŋə kantʋ.
84
Paŋwa Tu Baŋa-Wɛ!Je sɩlʋ nmʋ na zʋʋrɩ tɩn
tiini sɩ lana sɩ pa-nɩ!
2 Nmʋ digə kam tiini
ka jɩgɩ fra ka pa-nɩ,
yɩ a wʋbʋŋa yǝni ya wʋ ka wʋnɩ.
A maa kwaanɩ a leeni wʋpolo le
dɩ a wʋʋ maama dɩ a bɩcarɩ maama,
sɩ a ma zuli nmʋ wʋlʋ na yɩ
Ŋwɩa Tu Wɛ dɩm tɩn yɩrɩ.
3 Kʋ na yɩ zunə balʋ na sɔ ba pwǝru
nmʋ digə kam nɩ tɩn tɩtɩ,
ba tiini ba jɩgɩ yu-yoŋo.
Kawɛbudoorə dɩ maa na jǝgǝ
sɩ ba lwe ba biə da.
Kʋ maa yɩ mɛ na bwələ dɩ
nmʋ kaanɩm bimbim dɩm tɩn.
Paŋwa Tu Baŋa-Wɛ,
nmʋ mʋ yɩ amʋ Pɛ dɩ a Wɛ dɩm.
4 Balʋ maama na zʋʋrɩ
nmʋ digə kam wʋnɩ tɩn
tiini ba jɩgɩ yu-yoŋo lanyɩranɩ.
Bantʋ wʋ́ taa leeni tiə le mʋ
ba zuli‑m.
5 Balʋ na dɛ nmʋ ŋwaanɩ ba na dam tɩn
jɩgɩ yu-yoŋo zanzan.
Bantʋ mʋ yɩ balʋ na kɩ ba wʋbʋŋa nɩ
sɩ ba vu ba yi nmʋ te
Siyɔn tɩʋ kʋm wʋnɩ tɩn.
6 Ba na wʋra ba tɔgɩ Bakaa bolo kʋm ba kɛ tɩn,
na-zurə yǝni ba buri
je sɩm kʋntʋ nɩ mʋ.
Dʋa dɩ maa yǝni ka nɩ
yɩ ka su ka pɛɛlɩ je sɩm maama
dɩ cwarʋ.
7 Ba ve yigə dɩ dam mʋ ba maa kɛa,
sɩ ba laan vu ba yi Siyɔn tɩʋ kʋm
ba vu ba zɩgɩ Wɛ yigə nɩ.b
8 Paŋwa Tu Baŋa-Wɛ, A loori-m!
Cəgi amʋ wɛ-loro kʋm.
Nmʋ wʋlʋ na yɩ Zakɔbɩ Wɛ dɩm tɩn
sɛ amʋ na loori kʋlʋ tɩn.
9 Dɩbam Tu Wɛ, fɔgɩ n nii
dɩ́ pɛ wʋm baŋa nɩ,
dɩ o na cʋ dɩbam dɩ́ cam wʋnɩ tɩn ŋwaanɩ.
Pa n yigə taa wʋ pɛ wʋlʋ
nmʋ na kuri tɩn wʋnɩ.
10 Dɛ dɩdwɩ punə punə wʋnɩ
nɔɔnʋ na kwe
yɩ o wʋ nmʋ digə kam nɩ,
kʋ garɩ o na ve je dɩ je
o kɩ bɩna mʋrʋ da!
Amʋ tee nɩ, a ya na nɛ pwələ
sɩ a taa zɩgɩ nmʋ sɔŋɔ kʋm manco-pɩɩna yam nɩ
a yɩrɩ je sɩm kʋntʋ,
kʋ yaá dwǝni a na wʋ́ taa zʋʋrɩ nɔn-balwaarʋ tɩtarɩ nɩ tɩn.
11 Dɩbam Tu Baŋa-Wɛ dɩm
yɩ pooni mʋ o pa dɩbam.
DƖ daa ta maa cʋ dɩbam
dɩdaanɩ cam.
DƖ maa nii dɩbam baŋa nɩ
yɩ DƖ pa dɩ́ na yu-yoŋo dɩ zulə lanyɩranɩ.
Kʋ na yɩ balʋ na tɔgɩ cwǝŋǝ
yɩ ba ba cɔgɩ tɩn,
DƖ ba vɩ-ba wo-laarʋ dɩ dɩdʋa dɩ.c
12 Paŋwa Tu Baŋa-Wɛ,
balʋ maama na sɛ nmʋ dɩ wʋ-dɩdʋa tɩn
sɩɩnɩ ba jɩgɩ yu-yoŋo zanzan!