Wɛ-loro zǝnǝ ŋwaanɩ
Azafɩ dɛɛn panɩ ləŋə kantʋ.
83
Dɩbam Tu Wɛ, yɩ ta n jen nii kʋntʋ cɩmm!
Yɩ ta n kɩ nɩnɛɛnɩ
n yigə mʋ ga tǝrǝ tɩn!
2 Nii mʋ! N dʋna bam tiini
ba vuvugi mʋ.
Balʋ na culi‑m tɩn
kɩ jara dɩ nmʋ.
3 Ba jɩgɩ bana mʋ
sɩ ba ma cɔgɩ n nɔɔna bam.
Dɩ́ yɩ balʋ nmʋ na kuri
n pa n tɩtɩ tɩn,
yɩ bantʋ lagɩ ba kɩ swan dɩdaanɩ dɩbam.
4 Ba banɩ daanɩ mʋ ba wɩ:
«Ba-na sɩ dɩ́ kɩ daanɩ
dɩ́ cɔgɩ ba maama
sɩ ba dwi dɩm ti,
sɩ ba yɩrɩ saarɩ lʋgʋ baŋa nɩ.»
5 N dʋna bam mʋ yɔɔrɩ
ba kɩ ni daanɩ
sɩ ba ywəri nmʋ kwaga nɩ.
Balʋ na sɛ sɩ ba tɔgɩ daanɩ ba kɩ
jara dɩ nmʋ tɩn mʋ tɩntʋ:
6 Nɔɔna balʋ na zʋʋrɩ
Edɔm tɩ-niə yam nɩ tɩn,
dɩ Ismayɛlɩ dwi tiinə bam,
dɩ Moabɩ tiinə bam,
dɩ Hagarɩ tiinə bam,
7 kʋ ta wǝli dɩ Gebalɩ tiinə,
dɩ Amɔn tiinə,
dɩ Amalɛkɩ tiinə bam,
dɩ Filisi tiinə bam,
dɩ Tiiri tɩʋ nɔn-biə bam.
8 Asiiri tiinə bam dɩ mʋ dɛ
ba wǝli ba wʋnɩ,
sɩ Lɔtɩ dwi tiinə bam wanɩ
ba fɔgɩ ba na dam zanzan.
9 Nan zaŋɩ n cɔgɩ bantʋ maama
nɩnɛɛnɩ n dɛɛn na tʋŋɩ te
dɩ Madɩan tiinə bam tɩn.
Kɩ-ba nɩ n na kɩ Sizera dɩ Yabin yɩra nɩ tɩte
yɩ n di-ba Kisɔn bugə kam seeni tɩn.a
10 Nmʋ dɛɛn yɔɔrɩ n cɔgɩ-ba mʋ
Eyin-Dɔɔrɩ nɩ,
pa ba yɩra tigi tɩga baŋa
nɩ nɩ pʋpɔnɔ mʋ te.
11 Pa n dʋna nɔn-yum tɩm tɩ
nɩnɛɛnɩ Orɛbɩ dɩ Zɛbɩ
dɛɛn na tɩgɩ tɩte tɩn,
sɩ ba dɩdɛɛra bam dɩ tɩ
nɩ Zeba dɩ Salimuna tʋʋnɩ dɩm
na tɔgɩ te tɩn.b
12 Bantʋ bale dɛɛn mʋ tagɩ ba wɩ:
«Pa dɩ́ vrɩ Wɛ tɩtɩ tɩga kam pwəli sɩm dɩ́ taa te!»
13 Amʋ Tu Wɛ, pa ba jagɩ
je maama nɩ,
nɩnɛɛnɩ viu na kalɩ weeru
dɩ ga-kʋrrʋ kʋ ja je te tɩn.
14 Kɩ-ba nɩ mim na di kagʋa wʋ tweeru
yɩ dɩ tanɩ dɩdaanɩ piu yuu
gaarʋ te tɩn.
15 Nmʋ dɩ nan kɩ kʋntʋ doŋ
n kwe vu-fɔrɔ n ma n zəli-ba
sɩ fʋʋnɩ tiini dɩ ja-ba.
16 Baŋa-Wɛ, ta pa cavɩɩra
yɔɔrɩ dɩ ja-ba
sɩ ba kwǝli ba yibiyə,
yɩ ba daarɩ ba sɛ ba pa n yɩrɩ dɩm.
17 Sɛ sɩ cavɩɩra dɩ fʋʋnɩ ja bantʋ
maŋa maama,
sɩ ba daarɩ ba yáalɩ ba tɩ.
18 Nmʋ wʋlʋ yɩrɩ na yɩ Baŋa-Wɛ tɩn,
pa ba lwarɩ nɩ nmʋ yɩranɩ mʋ
yɩ Yuutu Wɛ dɩm
yɩ n te lʋgʋ kʋm baŋa maama.