Candiə dim ləŋə
Azafɩ dɛɛn panɩ ləŋə kantʋ.
81
Wɛ mʋ yɩ dɩlʋna paɩ dɩbam dam tɩn.
Leeni-na dɩ kwǝr-dɩa á zuli‑DƖ!
Kaasɩ-na dɩ wʋpolo á zuli Zakɔbɩ dwi tiinə Wɛ dɩm.
2 Kaasɩ-na ləŋə! Wɔ-na sɩnyɛ,
sɩ á daarɩ á ta-na kwaanʋ dwi dwi
sɩ tɩ kwǝri taa ywəmmə.
3 Wu-na nabwaanʋ can-dʋŋa kam maŋa nɩ,
sɩ kʋ wǝli dɩ can-pwəŋə
maŋa kam dɩ,
dɩ́ na puli dɩ́ candiə dim tɩn nɩ.
4 Zakɔbɩ dwi tiinə bam Wɛ dɩm mʋ pɛ ni
sɩ á kɩ kʋntʋ Yisɩrayɛlɩ tɩʋ kʋm nɩ.
5 DƖ dɛɛn na nuŋi sɩ DƖ vrɩ Zʋzɛfʋ dwi tiinə bam
DƖ yagɩ Ezipi tiinə bam jɩŋa nɩ tɩn
mʋ DƖ pɛ zaasɩm dɩm kʋntʋ.
Amʋ ni kwǝrǝ mʋ
yɩ a wʋ lwarɩ ka tu.
Ka maa wɩ:
6 «Amʋ dwanɩ zɩla yalʋ ya na wʋ
á bakalɩ baŋa nɩ tɩn
a yagɩ dáa nɩ,
yɩ a daarɩ a joŋi á tɩtʋŋ-dɛɛra yam á jɩŋa nɩ sɩ á sin.
7 Cam na jaanɩ abam yɩ
á loori zǝnǝ amʋ tee nɩ tɩn,
a ma sɛ pa a joŋi abam a yagɩ.
Dʋa na bagɩ kunkwən-liluru wʋnɩ tɩn,
a tɔgɩ da a ləri á wɛ-loro kʋm.
A ta ma maŋɩ abam sɩ a nii
Meriba buli-yi dɩm seeni.a
8 Amʋ nɔɔna bam, cəgi-na,
sɩ amʋ mʋ lagɩ a zaasɩ abam
Yisɩrayɛlɩ tiinə bam,
kʋ ya maŋɩ sɩ á sɛ
sɩ á cəgi amʋ zaasɩm dɩm.
9 Kʋ daɩ sɩ á daa taá jɩgɩ wɛ-gaa
á wǝli amʋ wʋnɩ.
Yɩ tiiri-na tɩga nɩ á zuli wɛ dɩlʋ
na yɩ vərə nyɩm tɩn.
10 Amʋ yɩranɩ mʋ yɩ abam Tu
Baŋa-Wɛ dɩm,
a na jaanɩ abam a ja
a nuŋi Ezipi tɩʋ nɩ tɩn.
Puri-na á niə jaja,
sɩ a lagɩ a kɩ wo-laarʋ zanzan mʋ da a pa abam.
11 Dɩ kʋntʋ maama dɩ,
amʋ nɔɔna bam ba lagɩ
sɩ ba taa cəgi amʋ taanɩ dɩm.
Amʋ nɔɔna Yisɩrayɛlɩ tiinə bam
wʋ sɛ ba pa-nɩ.
12 Kʋntʋ ŋwaanɩ mʋ a yagɩ-ba
sɩ ba taa kɩ ba tɔgɩ
ba wʋ-dɛɔ kʋm na lagɩ te tɩn.
A ma pa-ba pwələ sɩ ba tʋŋɩ
ba su ba fra.
13 Kʋ nan ya maŋɩ sɩ a nɔɔna Yisɩrayɛlɩ tiinə bam sɛ a ni,
yɩ ba ta tɔgɩ a cwe sɩm.b
14 Ba ya na kɩ kʋntʋ, a yaá wanɩ ba dʋna bam lɩla,
dɩ a jɩŋa na yɔɔrɩ ka zʋ-ba te tɩn.
15 Wʋlʋ maama dɩ na culi-nɩ tɩn
maa wʋ́ ba o gwanɩ
amʋ yigə nɩ dɩ fʋʋnɩ.
Kʋ tu maa wʋ́ na waarɩm taan wuu.
16 Amʋ nan yaá pa abam
wʋdi-laarʋ dɩdaanɩ tʋʋrʋ
sɩ á taá di á sui.»c