Wɛ-loro Yisɩrayɛlɩ tiinə bam zǝnǝ ŋwaanɩ
Azafɩ dɛɛn panɩ ləŋə kantʋ.
80
Dɩbam Tu Wɛ,cəgi dɩbam loro kʋm!
Nmʋ yɩ Yisɩrayɛlɩ dwi tiinə bam nayɩrʋ mʋ.
N yǝni n tɔgɩ Zʋzɛfʋ dwi tiinə bam yigə n veǝ
nɩ nayɩrʋ na kalɩ o peeni te tɩn mʋ.
Nmʋ yɩ wʋlʋ na di paarɩ
Serubɛn sɩm tɩtarɩ laŋa nɩ.a
Nan pa n paarɩ-zulǝ yam nyɩɩnɩ
kʋ lwarɩ jaja,
2 kʋ pa Efrayim, dɩ Bɛnzamɛn,
dɩ Manasɩ dwi tiinə bam.
Zaŋɩ dɩ n dam sɩ n daarɩ n ba
n joŋi dɩbam n yagɩ!
3 Dɩbam Tu Wɛ, pa dɩ́ joori
dɩ́ zɩgɩ dɩ dam!
Pa n yibiyə jeeri dɩbam seeni
sɩ dɩ́ na vrɩm.
4 Paŋwa Tu Baŋa-Wɛ,
nmʋ nɔɔna bam yǝni
ba loori zǝnǝ n tee nɩ,
yɩ n banɩ zaŋɩ ba baŋa nɩ
sɩ bɛɛ mʋ?
Kʋ ta wʋ́ taa yɩ kʋntʋ mʋ taan
sɩ kʋ vu kʋ maŋɩ yən mʋ?
5 Nmʋ pɛ dɩ́ na tiini dɩ́ ka
yi-na balʋ tɩn mʋ ji
dɩbam ni-wʋdiu.
Dɩ́ maa nyɔ dɩ́ yi-na bam dɩ́ su.
6 Nmʋ ta pɛ tɩɩnɩ dɩlʋ
na gilimi dɩbam tɩn
banɩ zaŋɩ dɩbam ŋwaanɩ.
Dɩ́ dʋna bam maa jɩgɩ dɩbam
ba mwana.
7 Paŋwa Tu Wɛ dɩm,
pa dɩ́ joori dɩ́ zɩgɩ dɩ dam!
Pa n yibiyə jeeri dɩbam seeni
sɩ dɩ́ na vrɩm.
8 Nmʋ dɛɛn na jaanɩ dɩ́ kwə bam
n ja n nuŋi Ezipi nɩ tɩn,
kʋ nyɩ dɩ vinyə tiu mʋ n na kwe
n ja n vu sɩ n jəri te tɩn.
N zəli dwi-gɛ tiinə bam
n daarɩ ba tɩga kam
sɩ n jəri dɩbam je sɩm kʋntʋ nɩ. b
9 N kwɛ tɩga kam n pa dɩbam,
yɩ dɩ́ fɔgɩ dɩ́ kwin dɩ́ su
tɩga kam maama.
10 Kʋ nyɩ dɩ vinyə tiu vɔɔrʋ tɩm
na kwǝli pweeru tɩm,
yɩ kʋ nɛ sɩm nuŋi sɩ vu sɩ yi
Sɛdrɩ tweeru kamunnu tɩm
sɩ li-tɩ te tɩn mʋ.
11 Kʋ nɛ sɩm ta ma jagɩ
sɩ yi tɩga kam maama
kʋ na zɩgɩ Mediterane nɩnɩʋ kʋm ni nɩ
sɩ kʋ vu kʋ yi Efratɩ
bugə kam seeni tɩn.
12 Kʋntʋ tɩn, bɛɛ nan daa mʋ kɩa
yɩ n pa tɩga kam laan ji di-dwəənu?
Vərə dɩ nɛ cwǝŋǝ sɩ ba zʋ
ba vrɩ ba wʋbʋŋa wǝǝnu.
13 Kʋ nyɩ dɩ ga-tərə mʋ nuŋi
kagʋa wʋnɩ ya ve ya nɔnɩ
ya cɔgɩ vinyə tiu kʋm,
yɩ ga-vara dɩ ve ba di
tiu biə bam maama.
14 Paŋwa Tu Wɛ dɩm,
pipiri n joori n ba dɩbam te!
Zɩgɩ wɛyuu nɩ n tiiri
n nii dɩbam seeni.
Fɔgɩ n nii dɩbam balʋ
na yɩ n nɔɔna tɩn baŋa nɩ.
15 Dɩ́ yɩ vinyə tiu kʋlʋ
nmʋ tɩtɩ na jəri tɩn mʋ.
Nan ba n kwɛ n bu wʋlʋ
n na kɔnɩ sɩ o kɩ nɔɔnʋ tɩn.
16 Dɩ́ dʋna bam goni nmʋ vinyə tiu kʋm ba dɩ tɩga nɩ,
yɩ ba daarɩ ba zwɛ-kʋ.
Zaŋɩ n bwɛ-ba sɩ ba na cɔgɩm.
17 Kʋ daarɩ sɩ n pa wʋlʋ n na kuri tɩn
zɩgɩ dɩ dam,
o na yɩ nabiinu bu wʋlʋ n na kɔnɩ sɩ o kɩ nɔɔnʋ tɩn ŋwaanɩ.
18 Kʋntʋ, dɩ́ daa bá joori
dɩ́ lɔ nmʋ kwaga nɩ.
Nan pa dɩ́ joori dɩ́ na ŋwɩa,
sɩ dɩ́ wanɩ dɩ́ bəŋi n yɩrɩ dɩm
dɩ́ pa‑m zulə.
19 Paŋwa Tu Baŋa-Wɛ
pa dɩ́ joori dɩ́ zɩgɩ dɩ dam!
Pa n yibiyə jeeri dɩbam seeni
sɩ dɩ́ na vrɩm.