Wɛ-loro Zeruzalɛm ŋwaanɩ
Azafɩ dɛɛn panɩ ləŋə kantʋ.
79
Dɩbam Tu Wɛ,dwi-gɛ tiinə bam mʋ tu
ba li nmʋ tɩtɩ tɩga kam dɩ najara.
Ba laan ma digimi nmʋ digə
kalʋ na yɩ lanyɩranɩ fasɩ tɩn,
yɩ ba ta daarɩ ba pa Zeruzalɛm ji di-dwəənu yɩranɩ.a
2 Ba gʋ n tɩtɩ tɩntʋŋna bam
yɩ ba yagɩ ba yɩra yam pwələ nɩ,
sɩ duurə dɩdaanɩ ga-vara
laan taa tui ba di-ya.
3 Ba ta pɛ n nɔɔna bam jana mʋ pwəri Zeruzalɛm je sɩm maama nɩ,
nɩnɛɛnɩ ba na pwəri na te tɩn.
Nɔɔn-nɔɔnʋ daa wʋ daarɩ sɩ kʋ tu kwe twa bam o kɩ tɩga nɩ.
4 Tɩɩnɩ dɩlʋ na bwələ dɩdaanɩ dɩbam tɩn mʋ gooni dɩbam.
Ba maa jɩgɩ dɩbam ba twɩa
yɩ ba mwana.
5 Dɩbam Tu Baŋa-Wɛ,
n banɩ dɩm wʋ́ taa wʋ
dɩbam yuu nɩ taa
sɩ dɩ vu dɩ maŋɩ yən mʋ?
N ban-lʋm dɩm wʋ́ taa wʋra wuu mʋ
nɩ bulu mim na?
6 Joori n kɩ sɩ n banɩ dɩm zaŋɩ dwi-gɛ tiinə bam baŋa nɩ,
ba na wʋ sɛ sɩ ba kwarɩ nmʋ tɩn ŋwaanɩ.
Bantʋ maa ba tɔgɩ nmʋ yɩrɩ ŋwaanɩ ba warɩ ba wara.
7 Ba nan yɔɔrɩ ba ti
Zakɔbɩ dwi tiinə bam
yɩ ba daarɩ ba cɔgɩ
ba tɩga kam mʋ.
8 Nan yɩ kwe dɩ́ kwə bam lwarɩm
sɩ n ma n waarɩ dɩbam ya ŋwaanɩ.
Nan kɩ lɩla n ba n duri dɩ́ yibwənə,
sɩ dɩ́ tɩɩna maama ti mʋ.
9 Dɩbam Tu Wɛ, ba n wǝli dɩbam,
nmʋ na yɩ dɩ́ Vɩrnʋ tɩn ŋwaanɩ.
Da nmʋ tɩtɩ yɩrɩ dɩm ŋwaanɩ
n ba n vrɩ dɩbam n yagɩ,
sɩ n daarɩ n yagɩ dɩ́ lwarɩm
n ma n cɛ dɩbam.
10 Bɛŋwaanɩ mʋ dwi-gɛ tiinə bam
wʋ́ taa jɩgɩ dɩbam ba goonə
yɩ ba tɛ ba wɩ:
«Bantʋ Wɛ dɩm nan bɛ?»
Dwi-gɛ tiinə bam kʋntʋ pɛ
n nɔɔna bam jana pwəri.
A loori-m! Kɩ kǝm sɩ dɩ́ nii,
sɩ ba lwarɩ nɩ n lagɩ n ŋwɩ
ba lwarɩm jɩnɩ mʋ ba baŋa nɩ.
11 Cəgi pɩɩna bam na ŋʋʋsɩ te tɩn!
Kʋ na yɩ balʋ na maŋɩ sɩ ba gʋ-ba tɩn,
joŋi ba ŋwɩa n yagɩ
sɩ ba ta taa ŋwɩ.
12 Baŋa-Wɛ, joori n ŋwɩ n jɩnɩ
tɩɩnɩ dɩlʋ na bwələ dɩdaanɩ dɩbam tɩn baŋa nɩ kuni bɩrpɛ,
dɩ ba na tiini ba twɩ‑m te tɩn.
13 Kʋntʋ laan maa wʋ́ pa
dɩ́ taa tee‑m maŋa maama.
Dɩ́ nan yɩ n nɔɔna mʋ
yɩ n dɩ nii dɩ́ baŋa nɩ,
nɩ nayɩrʋ na nii o pe-kɔgɔ te tɩn.
Dɩ́ wʋ́ taa zuli nmʋ wuu,
sɩ dɩ́ biə dɩdaanɩ bantʋ dɩ biə
dɩ ba ba zuli‑m maŋa maama.