Baŋa-Wɛ dɩ DƖ nɔɔna bam taanɩ
Azafɩ dɛɛn panɩ ləŋə kantʋ.
78
Amʋ nɔɔna bam, pʋrɩ-na á zwasɩ á cəgi kʋlʋ a na jɩgɩ
sɩ a ta a brɩ abam tɩn.
2 A lagɩ a puri a ni mʋ
a ŋɔɔnɩ bɩtar-dɩndɩ.
A ta wʋ́ ŋɔɔnɩ faŋa faŋa
wo-sisəgiru taanɩ.
3 Tɩ maa yɩ wǝǝnu tɩlʋ dɩ́ kwə
na tagɩ ba brɩ dɩbam
yɩ dɩ́ cəgi tɩn.
4 Dɩbam dɩ maa wʋ́ lwəni-tɩ
sɩ ba dwi dɩm ni.
Dɩ́ wʋ́ pa dɩ́ biə balʋ
na wʋ kwaga nɩ tɩn lwarɩ
Baŋa-Wɛ na kɩ wo-kɩnkagɩla yalʋ tɩn ni nɩ.
Dɩ́ ta wʋ́ brɩ-ba DƖ dam-fɔrɔ kʋm na yɩ te,
dɩdaanɩ tɩtʋŋ-kamunə yalʋ
dwi maama DƖ na kɩ tɩn.a
5 Wɛ dɛɛn kwe DƖ zaasɩm dɩm
dɩ DƖ niə yam mʋ
DƖ pa Yisɩrayɛlɩ tiinə bam
na yɩ Zakɔbɩ dwi tiinə tɩn.
DƖ ma daarɩ DƖ pa dɩ́ nabaara bam ni nɩ:
ba taa jɩgɩ-ya ba brɩ ba biə bam.
6 DƖ kɩ kʋntʋ sɩ ba kwaga kam
mʋ lwarɩ DƖ niə yam,
kʋ na maŋɩ kʋ yɩ dwi dɩlʋ
ba ta na wʋ lʋgɩ tɩn.
Bantʋ dɩ maa wʋ́ lwəni-ya
ba brɩ ba biə bam.
7 Kʋntʋ baŋa nɩ mʋ baá wanɩ
ba kwe ba cɩga
ba daŋɩ Wɛ yɩra nɩ,
sɩ ba daa yɩ swe DƖ tɩtʋŋa yam ni nɩ
yɩ ba daarɩ ba tʋŋɩ
ba tɔgɩ DƖ niə yam.
8 Ba daɩ sɩ ba taa lwǝni
ba nabaara bam kikiə.
Bɛŋwaanɩ ba kwə dɛɛn yɩ zwabani-nyɩna
balʋ wʋʋ na digili tɩn mʋ.
Ba wʋ kɩ ba cɩga dɩdaanɩ Wɛ,
yɩ ba lɔ DƖ kwaga nɩ.
9 Efrayim tiinə jar-kərə bam
dɛɛn fɔgɩ ba cɩ ba tɩtɩ
dɩdaanɩ jara-kǝm zɩla.
Dɩ kʋ dɩ, najara yam dɛ dɩm
laan na yi tɩn,
ba ma pipiri ba duri ba lu.
10 Ba brɩ ba wʋ kɩ ba tɔgɩ Wɛ ni-gonim dɩm na brɩ te tɩn.
Ba maa wʋ tɔgɩ DƖ zaasɩm dɩm cwǝŋǝ.
11 Ba dɛɛn swe Wɛ tɩtʋŋa yam
ni nɩ mʋ,
dɩdaanɩ wo-kɩnkagɩla yalʋ
DƖ na kɩ DƖ brɩ-ba tɩn.
12 DƖ dɛɛn kɩ tɩtʋŋ-kamunə
ba nabaara bam tɩtarɩ nɩ mʋ.
Sʋan laŋa kam na wʋ Ezipi nɩ tɩn mʋ kʋntʋ.
13 DƖ ma pɔɔrɩ nɩnɩʋ kʋm bɩle,
yɩ DƖ daarɩ DƖ pa ba tɔgɩ kʋ wʋnɩ ba bɛ.
DƖ pɛ na bam zɩgɩ mʋ cɛpɩ
jagwiə dɩ jazɩm maama
ba daarɩ cwǝŋǝ ba tɩtarɩ nɩ.
14 Wɩa maama nɩ DƖ dɛɛn yǝni DƖ pa
sɩ kunkoŋo mʋ tɔgɩ ba yigə
kʋ brɩ-ba cwǝŋǝ sɩ ba taa veǝ.
Kʋ daarɩ tɩtɩɩ nɩ,
DƖ tɔgɩ min-vʋgʋ baŋa nɩ mʋ
DƖ pa-ba pooni yɩ ba veǝ.
15 Ba na wʋ kagʋa yuu nɩ tɩn
mʋ DƖ yarɩ pweeru,
pa na ta ba nuŋi
tɩga kuri kuri nɩ,
yɩ ba nyɔ ba su.
16 DƖ ma pa na bam buri
pweeru tɩm nɩ
ba cuuri ba vu
nɩ bu-tʋla na duri te tɩn. b
17 Dɩ kʋntʋ maama dɩ,
ba ta yɔɔrɩ ba kɩ lwarɩm
ba cɔgɩ Yuutu Baŋa-Wɛ yigə
kagʋa kam wʋnɩ,
dɩ ba na vri ba kwaga
ba ya‑DƖ te tɩn.
18 Ba dɛɛn yɔɔrɩ ba paalɩ mʋ
ba maŋɩ Wɛ ba nii,
dɩ ba na loori‑DƖ sɩ DƖ pa-ba wʋdiiru tɩlʋ ba fra na zʋ tɩn.
19 Ba ma tiini ba gooni Wɛ yɩ ba wɩ:
«Wɛ za wʋ́ wanɩ DƖ na wʋdiu cɩga cɩga
sɩ DƖ pa dɩbam kagʋa kantʋ wʋnɩ na?
20 Cɩga tɩn, DƖ magɩ piu kʋm
pa na zanzan nuŋi kʋ wʋnɩ
ba cuurə.
Sɩ kʋ na yɩ wʋdiu,
DƖ za wʋ́ wanɩ DƖ na nwana
DƖ pa dɩbam sɩ dɩ́ dʋ na?»
21 Baŋa-Wɛ nan na ni
kʋlʋ ba na tagɩ tɩn,
DƖ banɩ ma tiini dɩ zaŋɩ ba baŋa nɩ.
DƖ ban-lʋm dɩm ma fufugi
dɩdaanɩ Yisɩrayɛlɩ dwi tiinə bam
pa mim tʋ ba tɩtarɩ nɩ.
22 Bɛŋwaanɩ, ba wʋ kɩ ba wʋ-dɩdʋa
dɩ Wɛ.
Ba maa ba jɩgɩ tɩɩna nɩ
DƖ wʋ́ wanɩ DƖ joŋi-ba DƖ yagɩ.
23 Wɛ ma pa wɛyuu baŋa kam ni
sɩ ka pʋrɩ nɩnɛɛnɩ bwəəru mʋ te.
24 DƖ ma pa Maanɩ tɔgɩ da
ya tʋ tɩga nɩ
pa nɔɔna bam di.
Mɩna yalʋ na nuŋi Wɛ-sɔŋɔ nɩ tɩn mʋ kʋntʋ.
25 Kʋntʋ tɩn, nabiinǝ dɛɛn di malɛsɩ sɩm wʋdiu mʋ.
Wɛ dɛɛn pɛ-ba wʋdiu kʋlʋ maama na wʋ́ maŋɩ ba dim tɩn.
26 DƖ ma pa wa-puli seeni viu
zaŋɩ wɛyuu nɩ kʋ fuli.
Kʋ ta na yɩ jagwiə seeni viu kʋm,
DƖ mɛ DƖ dam mʋ DƖ kalɩ-kʋ
DƖ ja DƖ nuŋi.
27 Kʋntʋ baŋa nɩ mʋ DƖ pɛ zunə tu
ba faarɩ tɩga kam je maama nɩ.
Ba dɛɛn daga zanzan
nɩ nɩnɩʋ ni kasʋlʋ doŋ mʋ,
pa DƖ nɔɔna bam na nwana ba di.
28 Wɛ ma pa zunə bam jaanɩ ba ba
ba tʋ DƖ nɔɔna bam kaporo
jǝgǝ kam tɩtarɩ nɩ,
ba na cwi ba vwə yam mɛ tɩn.
29 Ba maama ma di ba su ba daarɩ,
Wɛ na pɛ-ba ba fra na zʋ
wʋdiu kʋlʋ tɩn ŋwaanɩ.
30 Wʋdiu kʋm nan ya ta na wʋ
ba ni nɩ
yɩ ba wʋ di ba su ba fra yam tɩn,
31 Wɛ banɩ zaŋɩ ba baŋa nɩ.
DƖ ma gʋ balʋ na tiini ba yɩ nɔn-babɛ ba wʋnɩ tɩn.
Yisɩrayɛlɩ tiinə nɔn-dʋnnʋ tɩm zanzan mʋ DƖ ti kʋntʋ.
32 Dɩ kʋntʋ maama dɩ,
Wɛ nɔɔna bam dɛɛn ta yɔɔrɩ
ba kɩ lwarɩm mʋ.
Ba ta wʋ kɩ ba wʋ-dɩdʋa dɩ DƖ,
dɩ DƖ na maŋɩ DƖ kɩ wo-kɩnkagɩla
te maama tɩn dɩ.
33 Kʋntʋ ŋwaanɩ, Wɛ ma pa
ba ŋwɩa kam ji kafɛ yɩranɩ,
pa fʋʋnɩ ja-ba
yɩ ba daarɩ ba tɩ lɩla.
34 Wɛ na yǝni DƖ gʋ ba badonnǝ tɩn,
balʋ na daarɩ tɩn laan pipiri
ba fʋfɔ ba yi DƖ te.
Ba ma sɩɩnɩ ba yiǝ
ba joori ba sɛ‑DƖ.
35 Ba dɛɛn laan guli nɩ Yuutu Baŋa-Wɛ mʋ yɩ ba dalɩm je,
yɩ DƖ ta kwǝri DƖ yɩ ba Vrɩnʋ wʋm.
36 Ba nan na tee-DƖ te tɩn
yɩ ba ni-vɔɔ wʋnɩ yɩranɩ mʋ.
Ba ma kwɩn ba yələ dɩ DƖ
yɩ ba fɔɩ vwan ba pa‑DƖ.
37 Ba dɛɛn wʋ zɩgɩ cɩga wʋnɩ
ba pa‑DƖ.
Ba nan wʋ sɛ ba tɔgɩ ni dɩlʋ
DƖ na goni dɩ ba tɩn.
38 Kʋntʋ maama dɩ,
Wɛ ta duri ba yibwənə.
DƖ yagɩ ba lwarɩm DƖ ma DƖ cɛ-ba,
yɩ DƖ pɩɩnɩ DƖ banɩ pa
DƖ wʋ cɔgɩ-ba.
39 DƖ nan kɩ DƖ wʋbʋŋa nɩ DƖ wɩ
ba yɩ nabwənə yɩranɩ mʋ.
Ba maa nyɩ dɩ viu mʋ na dʋlɩ
kʋ kɛ te tɩn.
40 Ba dɛɛn na beeri
kagʋa kam wʋnɩ tɩn,
kuni zanzan mʋ ba dɛɛn yǝni
ba nuŋi Wɛ ni dɩm kwaga nɩ,
pa DƖ wʋʋ tiini kʋ cɔgɩ.
41 Ba na maŋ-o ba nii te kʋntʋ tɩn
daɩ kuni dɩdʋa baŋa nɩ.
Ba dɛɛn nan pɛ Yisɩrayɛlɩ dwi dɩm
Wʋ-poŋo Tu wʋm yɩra cɛ.
42 Ba ma swe DƖ dam-fɔrɔ kʋm ni nɩ,
dɩ DƖ na vrɩ-ba ba dʋna bam jɩŋa nɩ te tɩn maama.
43 Maŋa kam kʋntʋ nɩ
Wɛ dɛɛn kɩ wo-kɩnkagɩla mʋ
Sʋan laŋa kam na wʋ Ezipi nɩ tɩn wʋnɩ.c
44 DƖ dɛɛn ləni na balʋ
na wʋ Ezipi bwi sɩm nɩ tɩn mʋ
pa ba ji jana.
Kʋntʋ ŋwaanɩ ba ma ga na
sɩ ba mɔ bwi sɩm nɩ ba nyɔ.
45 Wɛ dɛɛn ta pɛ nanjwɛ mʋ ba
tɩ məəli Ezipi tiinə bam tɩ dʋ.
Yoorə dɩ ma joŋi je sɩm maama sɩ cɔgɩ tɩga kam.
46 DƖ dɛɛn ta pɛ kayɩra mʋ ba
sɩ dəlimi ba wʋdiiru
dɩ ba tweeru tɩm maama nyɔ!
47 Kʋ ta na yɩ ba vinyə tweeru tɩm,
dɩ ba kapʋrrʋ tɩm,
Wɛ dɛɛn pɛ dʋ-kambana
dɩdaanɩ dʋ-fara mʋ cɔgɩ-tɩ.
48 Dʋ-kambana mʋ DƖ mɛ DƖ dʋlɩ
ba naanɩ dɩm o gʋ.
Dʋa kam ma pɩpɩlɩ ka bagɩ
ba vara bam pa ba dɩ tɩ.
49 Wɛ dɛɛn pɛ DƖ ban-lʋm yɔɔrɩ
dɩ zaŋɩ ba baŋa nɩ mʋ.
DƖ wʋʋ ma tiini kʋ fuli pa
DƖ tʋŋɩ lɛɛrʋ ba yuu nɩ,
tɩ na nyɩ dɩ malɛsɩ kɔgɔ kʋlʋ
na jaanɩ tʋʋnɩ kʋ ba tɩn.
50 DƖ maa wʋ zuri DƖ banɩ dɩ fɩnfɩɩn dɩ.
DƖ nan wʋ sɛ sɩ DƖ cɩ
Ezipi tiinə bam dɩ tʋʋnɩ.
DƖ dɛɛn pɛ yawɩ-cɛɔ mʋ ja-ba
kʋ gʋ.
51 DƖ tɔgɩ cwǝŋǝ kam kʋntʋ mʋ
DƖ gʋ ba bu-kwɩn sɩm maama.
Samɩ dwi dɩm bu-kwɩn sɩm mʋ kʋntʋ.
52 Kʋ daarɩ kʋ na yɩ DƖ tɩtɩ nɔɔna bam,
DƖ jaanɩ-ba mʋ DƖ ja DƖ nuŋi
Ezipi tɩʋ kʋm wʋnɩ.
DƖ ma kalɩ-ba pa ba tɔgɩ
kagʋa kam wʋ ba veǝ,
nɩ ba yɩ DƖ pe-kɔgɔ kʋm mʋ te.
53 DƖ maa nii ba baŋa nɩ yɩ ba veǝ,
yɩ fʋʋnɩ tǝrǝ ba tee nɩ.
Kʋ nan na yɩ ba dʋna bam,
nɩnɩʋ kʋm mʋ kwǝli-ba
pa ba tɩ ba maŋɩ na bam wʋnɩ.
54 Wɛ dɛɛn mʋ jaanɩ DƖ nɔɔna bam
DƖ ja DƖ vu DƖ yi tɩga kalʋ
DƖ na pɔɔrɩ DƖ pa DƖ tɩtɩ tɩn.
Je sɩm kʋntʋ dɛɛn yɩ pweeru laŋa mʋ,
Wɛ na mɛ DƖ dam dɩm DƖ wanɩ-ka tɩn.
55 DƖ ma zəli dwi-gɛ tiinə bam
DƖ daarɩ tɩga kam
DƖ pa DƖ nɔɔna bam.
DƖ laan ma cɛ tɩga kam DƖ pa-ba,
sɩ Yisɩrayɛlɩ dwiə yam maama
taa te ba nyɩm,
yɩ ba zʋʋrɩ ka baŋa nɩ.
56 Ba dɛɛn nan ta maŋɩ Yuutu Baŋa-Wɛ wʋm ba nii,
yɩ ba daarɩ ba lɔ DƖ ni dɩm kwaga nɩ.
Ba ma vɩn sɩ ba tɔgɩ DƖ zaasɩm dɩm.
57 Ba yɔɔrɩ ba kɩ nɩ ba kwə bam
dɩ dɛɛn na kɩ te tɩn mʋ.
Ba mɛ ba kwaga ba ya Baŋa-Wɛ
yɩ ba tɔgɩ zwabaniə kikiə.
Ba maa yɩ yɔɔ yɩranɩ,
nɩnɛɛnɩ taŋa kalʋ na gugwǝli
yɩ ka yɩ te tɩn.
58 Ba dɛɛn zaŋɩ Wɛ banɩ mʋ,
dɩ ba na lɔgɩ je sɩlʋ
ba na zuli jwǝnǝ da tɩn.
Kʋ ma pa DƖ wʋʋ zaŋɩ dɩ ba,
ba jwǝnǝ kaanɩm tɩn ŋwaanɩ.d
59 Wɛ ma lwarɩ DƖ nɔɔna bam
na kɩ te tɩn,
yɩ DƖ banɩ tiini dɩ zaŋɩ dɩ ba.
DƖ ma yɔɔrɩ DƖ vɩn Yisɩrayɛlɩ tiinə bam DƖ wɩ
ba daa daɩ DƖ nɔɔna.
60 Kʋ na yɩ vwe dɩlʋ
Wɛ na cwi Siloo nɩ
yɩ DƖ dɛɛn zʋʋrɩ da
nabiinǝ tɩtarɩ nɩ tɩn,
DƖ ma nuŋi je sɩm kʋntʋ
DƖ viiri DƖ daarɩ-ba.e
61 DƖ ma daarɩ DƖ pa ba dʋna bam pwələ sɩ ba vrɩ
DƖ ni-gonim daka kam na brɩ DƖ dam dɩ DƖ nɩnwaŋa na maɩ te tɩn.
62 Wɛ banɩ na tiini dɩ zaŋɩ
DƖ tɩtɩ nɔɔna bam baŋa nɩ kʋntʋ tɩn,
DƖ yagɩ-ba mʋ pa ba tɔgɩ
najara baŋa nɩ ba tɩ.
63 Mim dɛɛn mʋ di ba nɔn-dʋnnʋ tɩm.
Ba bukwa bam dɩ daa ba naɩ baara sɩ ba zʋ.
64 Ba kaanɩm tiinə bam dɩ tɩgɩ
dam tʋʋnɩ mʋ,
yɩ ba kaana bam wʋ nɛ pwələ
sɩ ba keeri ba lwi.
65 Baŋa-Wɛ dɩm laan ma pɛ DƖ zaŋɩ
nɩnɛɛnɩ nɔɔnʋ na zaŋɩ
dɔɔm wʋnɩ tɩn.
DƖ ma tɔɔlɩ tiguri-kaasa,
nɩ babɩa kalʋ na nyɔgɩ sana
yɩ DƖ banɩ zaŋɩ tɩn.
66 Wɛ dɛɛn laan ma zəli
DƖ dʋna bam pa ba jagɩ saɩ,
yɩ DƖ daarɩ DƖ kɩ cavɩɩra
ba kuri nɩ taan wuu.
67 DƖ daa ta na lagɩ zʋʋrɩm je tɩn,
DƖ vɩn Zʋzɛfʋ bu Efrayim dwi tiinə laŋa kam mʋ.
68 DƖ ma kuri Zuda dwi tiinə laŋa kam,
sɩ DƖ taa zʋʋrɩ Siyɔn piu kʋm baŋa nɩ.
Jǝgǝ kalʋ DƖ na soe tɩn mʋ kʋntʋ.
69 DƖ ma fɔgɩ DƖ lɔ DƖ di-ŋʋŋa kam DƖ zɩgɩ
nɩ wɛyuu baŋa kam na yɩ te tɩn.
DƖ ma pa ka tiini ka dana,
nɩ DƖ na naanɩ tɩga baŋa kam
sɩ ka taa wʋra maŋa maama te tɩn.
70 Wɛ dɛɛn ta kuri Davidi mʋ.
DƖ ma vaŋ-o DƖ ja
DƖ nuŋi vara pwələ nɩ
sɩ o taa yɩ DƖ tɩntʋŋnʋ.
71 Davidi dɛɛn ya jɩgɩ peeni mʋ o niə.
Wɛ ma pa o ji nayɩrʋ wʋlʋ
na nii Zakɔbɩ dwi tiinə bam
baŋa nɩ tɩn.
Bantʋ maa yɩ Wɛ tɩtɩ nɔɔna
Yisɩrayɛlɩ tiinə bam.f
72 Davidi maa jɩgɩ-ba o nii lanyɩranɩ
dɩ o bɩcarɩ maama.
O dɛɛn dɛ o swan baŋa nɩ mʋ
o kalɩ-ba o kɩ daanɩ.