Cam maŋa wɛ-loro
Azafɩ dɛɛn panɩ ləŋə kantʋ.
77
Amʋ lagɩ a keeridɩ kwǝr-dɩa mʋ a loori Wɛ.
A na loori‑DƖ,
DƖ wʋ́ cəgi a taanɩ dɩm.
2 Amʋ cam maŋa kam nɩ mʋ
a fʋfɔ a twɛ a Yuutu Wɛ te.
Tɩtɩɩ dɩm maama nɩ mʋ
a zǝŋi a jɩn sɩm wɛɛnɩ
a loori‑DƖ.
Amʋ nan wʋ nɛ zurim a bɩcarɩ nɩ.
3 A na yǝni a guli Wɛ gulə,
kʋ yǝni kʋ pa a ŋʋʋsɩ mʋ.
A ta na bʋŋɩ DƖ wʋbʋŋa,
a maa warɩ a tɩtɩ a ja.
4 Baŋa-Wɛ, nmʋ pɛ dɔɔm ba tui
a yiǝ nɩ.
A brɩ a warɩ a ŋɔɔnɩ dɩ,
a wʋ-cɔgɔ kʋm ŋwaanɩ.
5 A nan yǝni a guli faŋa faŋa
da yam gulə.
A ma bʋŋɩ bɩna yalʋ na kɛ tɩn wʋbʋŋa.
6 A maa wɩ: «Tɩtɩɩ nɩ mʋ a lagɩ a guli
le sɩlʋ a dɛɛn na leeni tɩn gulə.
A ta wʋ́ taa bʋŋɩ wǝǝnu tɩm wʋbʋŋa a bɩcarɩ nɩ.»
Kʋntʋ tɩn, a kwaanɩ sɩ a ni
kʋlʋ na kɩ tɩn kuri,
7 yɩ a wɩ: «Baŋa-Wɛ dɩm wʋ́ vɩ-nɩ
maŋa maama mʋ na?
DƖ daa bá joori DƖ kɩ-nɩ yu-yoŋo na?
8 DƖ sono kʋlʋ na wʋra
dɩbam ŋwaanɩ tɩn
laan yɔɔrɩ kʋ ti mʋ na?
DƖ kampwəli sɩm daa ba tʋŋɩ mʋ na?
9 Wɛ swe sɩ DƖ duri dɩ́ ŋwaŋa
mʋ na?
DƖ ta pɛ DƖ ban-zɔŋɔ kʋm ləni
DƖ yu-yoŋo dɩm yuu nɩ mʋ na?»a
10 Amʋ laan ma ta a wɩ:
«Woŋo kʋlʋ na pɛ a wʋʋ cɔgɩ tɩn mʋ tɩntʋ:
Yuutu Baŋa-Wɛ daa ba tʋŋɩ
DƖ wǝli dɩbam.»
11 Amʋ nan wʋ́ guli wo-kamunnu tɩlʋ Baŋa-Wɛ na kɩ tɩn gulə.
Cɩga ŋwaanɩ tɩn, Baŋa-Wɛ,
a bá swe wo-kɩnkagɩla yalʋ
nmʋ dɛɛn na kɩ tɩn ni nɩ.
12 A lagɩ a bʋŋɩ n tɩtʋŋa yam maama wʋbʋŋa,
sɩ a daarɩ a jeeli ya maama dɩdʋa dɩdʋa mʋ.
13 Dɩbam Tu Wɛ dɩm,
cwǝŋǝ kalʋ nmʋ na tɔgɩ tɩn
lana fasɩ.
Wɛ dɩdoŋ tǝrǝ dɩ na jɩgɩ dam
nɩ nmʋ na jɩgɩ dam te tɩn.
14 Nmʋ yɩranɩ mʋ tʋŋɩ wo-kɩnkagɩla.
N ta ma pa dwi-gɛ tiinə bam
lwarɩ n dam dɩm ni nɩ.
15 Kʋ na yɩ n tɩtɩ nɔɔna bam
na yɩ Zakɔbɩ dɩdaanɩ Zʋzɛfʋ
dwi dɩm tɩn,
n dɛɛn kwe n dam-fɔrɔ kʋm
n ma n vrɩ-ba n yagɩ.
16 Dɩbam Tu Wɛ,
na-fara bam na nɛ nmʋ tɩn,
fʋʋnɩ dɛɛn jaanɩ-ba.
Na-luŋə kam yɩra dɩ ma zizigi.
17 Kunkwǝǝnu tɩm ma cuuri dɩdaanɩ dʋa,
yɩ dʋa kam dɩ bagɩ pɩna-pɩna.
Ka ta daarɩ ka pɩpɩlɩ
je sɩm maama nɩ.
18 Nmʋ kwǝrǝ kam na bagɩ kʋntʋ tɩn,
viu kʋm tiini kʋ wuuri mʋ.
Dʋa kam dɩ na pɩpɩlɩ te tɩn pɛ
pooni yi lʋgʋ baŋa je maama.
Tɩga kam baŋa dɩ ma tiini ka sisiŋi.
19 Nmʋ dɛɛn tɔgɩ nɩnɩʋ kʋm wʋ n bɛ.
Nmʋ cwǝŋǝ kam maa wʋ
na-fara bam tɩtarɩ nɩ,
yɩ nɔɔn-nɔɔnʋ nan wʋ nɛ
n na-bwərə kam.
20 Nmʋ dɛɛn ma n tɔgɩ Moyisi
dɩ Arɔn baŋa nɩ
n da n nɔɔna bam yigə n vu,
nɩ nayɩrʋ na kalɩ o pe-kɔgɔ te tɩn.b