Baŋa-Wɛ dam dɩm taanɩ
Azafɩ dɛɛn panɩ ləŋə kantʋ.
76
Wɛ lɩ DƖ tɩtɩ DƖ brɩZuda dwi tiinə bam.
DƖ yɩrɩ dɩm dɩ maa tiini
dɩ yɩ kamunu
Yisɩrayɛlɩ tiinə bam tee nɩ.
2 DƖ maa zʋʋrɩ Salɛma nɩ,
Siyɔn piu kʋm baŋa nɩ.
3 Dáanɩ mʋ DƖ jaanɩ dɩ́ dʋna bam
cɩna yam,
dɩ ba najara cɩ-kwɛn,
dɩ ba sʋ-lwaanʋ,
kʋ wǝli dɩ ba jara-kǝm zɩla yam maama,
DƖ ja DƖ bwəri o yagɩ.
4 Nmʋ nɩnwaŋa kam tiini ka brɩ jaja.
N kamunni dɩm daga dɩ dwe
pweeru tɩlʋ n na tɔɔrɩ tɩ baŋa nɩ tɩn.
5 Nmʋ wanɩ dɩ́ dʋna bam pamaŋna bam,
pa dɩ́ vrɩ ba jɩjaanʋ maama
ba jɩŋa nɩ.
Ba maama tɩgɩ mʋ
ba tigi da cɩmm.
Ba daa warɩ kʋlʋkʋlʋ ba kɩ,
dɩ ba na yɩ pamaŋ-bɩbɛ te dɩ.
6 Zakɔbɩ dwi tiinə bam Wɛ dɩm,
nmʋ na fugi dɩ dʋna bam tɩn
mʋ ba siseŋ-nɔɔna bam
dɩ sɩ diinǝ bam
zɩgɩ ba maŋɩ da cɩmm.
7 Nmʋ yɩranɩ mʋ maŋɩ
sɩ nɔɔna taa kwarɩ-m.
Nmʋ banɩ na zaŋɩ dɩ wʋlʋ,
kʋ tu warɩ sɩ o zɩgɩ
nmʋ yigə nɩ o na bʋra.
8 Nmʋ nan zɩgɩ wɛyuu nɩ mʋ
n di n dʋna bam taanɩ.
Fʋʋnɩ ma zʋ nabiinǝ maama
pa ba yɩ cɩmm.
9 Dɩbam Tu Wɛ, nmʋ dɛɛn zaŋɩ
sɩ n di ba taanɩ,
sɩ n daarɩ n joŋi balʋ na nɛ
bɛɛsɩm tɩga kam baŋa nɩ tɩn
n yagɩ.
10 Nɔɔna maama wʋ́ taa tee‑m,
kʋ na maŋɩ kʋ yɩ balʋ
banɩ na zaŋɩ dɩ nmʋ tɩn dɩ.
Nmʋ nan wʋ́ pa ba lwarɩ n ban-lʋm dɩm na yɩ te tɩn cɩga cɩga.
11 Du-na durə á pa á Tu Baŋa-Wɛ,
sɩ á daarɩ á kɩ kʋlʋ á na goni ni
sɩ á kɩ tɩn maama.
Kʋ maŋɩ sɩ nɔɔna taa kwarɩ-DƖ,
sɩ balʋ na bwələ dɩd-o tɩn
ja pɛɛra ba ba ba pa‑DƖ.
12 DƖ paɩ dɩdɛɛra gooni ba tɩtɩ mʋ.
Lʋgʋ baŋa pwa bam dɩ maa kwarɩ-DƖ lanyɩranɩ.