Baŋa-Wɛ bʋrɩ cɩga bʋra
Azafɩ dɛɛn panɩ ləŋə kantʋ.
75
Dɩbam Tu Wɛ,dɩ́ kɩ nmʋ le mʋ.
Cɩga ŋwaanɩ tɩn, dɩ́ kɩ n le,
n na tiini n bwələ dɩdaanɩ dɩbam tɩn ŋwaanɩ.
Nɔɔna maa tɛ nmʋ wo-kɩnkagɩla yam taanɩ.
Wɛ maa wɩ:
2 «Amʋ kuri maŋa mʋ a zɩgɩ
sɩ a ma a bʋrɩ nabiinǝ bʋra
dɩdaanɩ cɩga.
3 Tɩga kam baŋa na yǝni ka sisiŋi
yɩ nabiinǝ yɩra dɩ saɩ pɔm-pɔm,
kʋ daa ta yɩ amʋ mʋ fɔgɩ a jɩgɩ ka kuri diŋ-diŋ.
4 A ma yǝni a kaanɩ brɩ-n-tɩtɩ nyɩna nɩ:
‹Yɩ taá jɩgɩ-na kamun-ŋwɛ kʋntʋ!›
A daa ta maa tɛ dɩ nɔn-balwaarʋ nɩ:
‹Yɩ taá tɩɩra á dam ŋwaanɩ.
5 Nan yɩ taá jɩgɩ ja-guli
á dʋlɩ wɛɛnɩ.
Yɩ taá kaagɩ á ŋɔɔnɩ kamunni
á pa á tɩtɩ.› »
6 Lʋgʋ baŋa je maama nɩ
nɔɔn-nɔɔnʋ tǝrǝ o na jɩgɩ dam
sɩ o zǝŋi o doŋ nabiinu wɛɛnɩ.
Kʋ tu na nuŋi wa-puli seeni
naa wa-zʋʋrɩ seeni,
naa o na nuŋi kagʋa yuu mʋ dɩ,
o bá wanɩ o kɩ kʋntʋ.
7 Kʋ nan yɩ Wɛ mʋ bʋrɩ nɔɔna bʋra.
DƖ ma yǝni DƖ ja dɩdʋa DƖ dɩ tɩga nɩ,
yɩ DƖ daarɩ DƖ zǝŋi wʋdoŋ wɛɛnɩ.a
8 Bɛŋwaanɩ, Baŋa-Wɛ ze na-zʋŋa mʋ DƖ jɩŋa nɩ
ka na su dɩ sa-dɛɛra balʋ
dwə-biə na guugi ba wʋnɩ tɩn.
DƖ ma kwe-ka DƖ təni nɔn-balwaarʋ
balʋ maama na wʋ lʋgʋ baŋa nɩ tɩn niə nɩ.
Kʋ maŋɩ sɩ ba nyɔ Wɛ ban-zɔŋɔ sana bam maama mʋ
sɩ ba maama vu ba ti.
9 Kʋ nan na yɩ amʋ,
a ta wʋ́ taa tɛ Wɛ tɩtʋŋa yam taanɩ taan.
A lagɩ a leeni a zuli
Zakɔbɩ dwi tiinə Wɛ dɩm mʋ.
Wɛ maa wɩ:
10 «Amʋ mʋ lagɩ a cɔgɩ nɔn-balwaarʋ tɩm dam maama.
A maa wʋ́ daarɩ a pa
nɔn-ŋʋna bam tiini ba na dam
sɩ kʋ ja gaalɩ.»