Wɛ-loro dɩ́ tɩʋ kʋm ŋwaanɩ
Azafɩ dɛɛn panɩ ləŋə kantʋ.
74
Dɩbam Tu Wɛ, bɛɛ mʋ yɩ n laan yɔɔrɩ n vɩn dɩbam kʋntʋ?Bɛŋwaanɩ mʋ n pɛ n ban-lʋm tʋ dɩ́ baŋa nɩ?
Dɩ́ nan yɩ n nɔɔna mʋ
yɩ n nii dɩ́ baŋa nɩ,
nɩ nayɩrʋ na nii o pe-kɔgɔ te tɩn.
2 Nan guli dɩbam balʋ na yɩ n kɔgɔ kʋm tɩn gulə!
Kʋ nuŋi faŋa mʋ n dɛɛn joŋi dɩbam.
Dɩ́ maa yɩ dwi dɩlʋ n na vrɩ n yagɩ
sɩ dɩ́ taa yɩ n tɩtɩ nyɩm tɩn.
Daa ta guli Siyɔn piu kʋm gulə,
n dɛɛn na zʋʋrɩ mɛ tɩn.
3 Pipiri n ba n nii dɩ́ tɩʋ kʋm
na yɔɔrɩ kʋ ji di-dwəənu te tɩn.
Ba n nii dɩ́ dʋna bam na cɔgɩ
n digə kam
dɩ ka zɩla yam maama te tɩn.
4 Jǝgǝ kalʋ nmʋ ya na yǝni
n jeeri dɩbam tɩn
mʋ n dʋna bam tɔɔlɩ tiguri-kaasa ka tɩtarɩ nɩ.
Ba ma cwi ba jara-kǝm drapoo daanɩ.
5 Ba na kɩ najara dɩ́ tɩʋ kʋm
baŋa nɩ te tɩn,
ba nyɩ dɩ nɔɔna na maɩ doorə
ba goni tweeru zanzan
ba dɩ tɩga nɩ te tɩn mʋ.
6 Ba dɛɛn kwe ba doorə
dɩ ba gwərə mʋ
ba ma yarɩ dɛ sɩlʋ nɔɔna na fɔgɩ ba gɔgɩrɩ tɩn.
7 Ba ma kwe mim ba zwɛ
nmʋ di-ŋʋŋa kam.
Kʋntʋ tɩn ba cɔgɩ jǝgǝ kalʋ
nɔɔna ya na zuli n yɩrɩ da tɩn
yɩ ba guri ka maama ba dɩ tɩga nɩ.a
8 Ba dɛɛn tagɩ ba tɩtɩ wʋbʋŋa nɩ
ba wɩ:
«Pa-na sɩ dɩ́ cɔgɩ-ba fasɩ!»
Tɩga kam wʋnɩ je sɩlʋ maama
nɔɔna na zuli Wɛ tɩn
mʋ ba zwɛ kulə.
9 Dɩ́ daa ba naɩ wo-kɩnkagɩla yalʋ Wɛ na tʋŋɩ tɩn.
Wɛ nijoŋnə dɩ daa maa tǝrǝ
dɩ́ tee nɩ.
Nɔɔn-nɔɔnʋ nan yǝri yaara yantʋ
na wʋ́ daanɩ dɩbam tee nɩ te tɩn.
10 Dɩbam Tu Wɛ, dɩ́ dʋna bam wʋ́ taa jɩgɩ-m ba mwana taan
sɩ ba vu ba maŋɩ yən mʋ?
Ba ta wʋ́ taa jɩgɩ n yɩrɩ dɩm
ba gooni mʋ taan na?
11 Bɛɛ mʋ kɩa yɩ n wʋ kwe n jazɩm dɩm n waarɩ-ba?
Nan bwǝli n jɩŋa sɩ n cɔgɩ-ba fasɩ!
12 Amʋ Tu Wɛ, kʋ zɩgɩ faŋa mʋ
nmʋ maŋɩ n yɩ amʋ Pɛ.
Kuni zanzan n yǝni n tʋŋɩ tɩga kam baŋa nɩ mʋ
sɩ n joŋi dɩbam n yagɩ.
13 Nmʋ dɛɛn mɛ n dam-fɔrɔ mʋ
n pɔɔrɩ nɩnɩʋ kʋm.
N ta ma n cɩcʋgɩ nɩnɩʋ wʋ jur-kamunə yam yum.
14 Cɩga tɩn, nmʋ mʋ cɩcʋgɩ nɩnɩʋ wʋ juru Prənyoŋo yum tɩm,
yɩ n daarɩ n kwe o yɩra yam
n pa kagʋa wʋ vara bam
sɩ ba kwe ba di.
15 Nmʋ ma n pa buli-yiə ta
ya nuŋi ya burǝ.
Kʋ ta na yɩ bu-tʋlɩ sɩm,
n pɛ sɩ wɩ mʋ.
16 Nmʋ pɛ wɩa dɩ tɩtɩɩ pɔɔrɩ daanɩ
yɩ tɩ maama yɩ nmʋ nyɩm.
N daa n ta ma n kwe cana kam dɩ wɩa kam
n zɩgɩ sɩ zɩga je nɩ.
17 Nmʋ pɛ tɩga dwi maama
jɩgɩ ka sisəm mʋ.
N ta pɛ yadɛ dɩdaanɩ tɩ-pwəŋə wʋra.
18 Baŋa-Wɛ, nan guli n dʋna bam
ya na jɩgɩ-m ba mwana te tɩn.
Nɔn-jwəəru dɩ maa gooni
nmʋ yɩrɩ dɩm.
19 Nmʋ yǝni n nii dɩ́ kɔgɔ kʋm
nɩ kʋ yɩ kunkwǝŋǝ tɩn mʋ.
Nan yɩ kwe n kunkwǝŋǝ kam
n pa ga-vara sɩ ba wanɩ-ka ba di.
Yɩ yɔɔrɩ n swe dɩbam balʋ
na yɩ n nɔɔna
yɩ dɩ́ wʋ yaara wʋnɩ tɩn ni nɩ.
20 Nan guli n na goni ni
sɩ n kɩ kʋlʋ n pa dɩbam tɩn.
Bɛŋwaanɩ, nɔn-balwaarʋ mʋ səgi
tɩga kam baŋa gugwəəru dwi maama wʋnɩ.
21 Yɩ sɛ sɩ dɩbam balʋ nɔɔna na bɛɛsɩ tɩn joori kwaga,
sɩ cavɩɩra ja dɩbam.
Nan pa nabwənə dɩ yinigə tiinə bam na cwǝŋǝ
sɩ ba taa tee n yɩrɩ dɩm.
22 Dɩbam Tu Wɛ, zaŋɩ wɛɛnɩ
sɩ n zɩgɩ n cɩga kam kwaga nɩ.
Nan guli nɔn-jwəəru na jɩgɩ-m
ba twɩa dɛ maama wʋnɩ te tɩn.
23 Yɩ swe n dʋna bam na tɛ wǝǝnu
tɩlʋ ba ma yáalɩ nmʋ tɩn.
Ba kɩ kʋntʋ mʋ taa yɩ ba ba yaga.