Ləŋ-ŋwɩ Tɔnɔ 3
Ləŋ-ŋwɩ 73-89
Baŋa-Wɛ lamma
Azafɩ dɛɛn panɩ ləŋə kantʋ.a
73
Kʋ na yɩ cɩga tɩn,Wɛ sɩɩnɩ DƖ kɩ Yisɩrayɛlɩ dwi tiinə bam lanyɩranɩ.
DƖ maa yǝni DƖ zǝni
balʋ bɩcara na pɩɩrɩ tɩn mʋ.
2 Kʋ nan na yɩ amʋ,
kʋ ya gɛ fɩɩn mʋ sɩ a naga seeri
sɩ a daarɩ a ywəri
Wɛ cwǝŋǝ kam nɩ.
3 Bɛŋwaanɩ tɩn,
a na nɛ nɔn-balwaarʋ tɩm jɩjɩgɩrʋ tɩm tɩn
mʋ a jɩgɩ wʋ-gʋʋ dɩ ba,
ba na brɩ ba tɩtɩ tɩn ŋwaanɩ.b
4 Nɔn-balwaarʋ tɩm ba naɩ cam
dɩ fɩnfɩɩn dɩ.
Ba ta maa damma,
yɩ yazurə yi-ba lanyɩranɩ.
5 Kʋ na yɩ yaara yalʋ dwi
na yǝni ya jaanɩ nɔɔna tɩn,
bantʋ ba na-ya.
Yawɩɩrʋ dɩ ba yi-ba
nɩnɛɛnɩ nɔɔna badonnǝ
na na-tɩ te tɩn.
6 Ba na brɩ ba tɩtɩ te tɩn
nyɩ dɩ ba kwe paarɩ zambili
ba dɩ ba ban nɩ mʋ.
Ba maa mɩ dɩ wʋ-lʋŋ-tɩtʋŋa
nɩnɛɛnɩ ya yɩ gwaarʋ tɩlʋ
ba na zʋʋrɩ dɛ maama tɩn mʋ.
7 Ba na lagɩ paarɩ tɩn ŋwaanɩ
mʋ ba yǝni ba tʋŋɩ lwarɩm yɩranɩ.
Ba bɩcara dɩ maa tɔgɩ pu-sɩŋa yɩranɩ.
8 Ba maa jɩgɩ nɔɔna ba mwana,
yɩ ba ŋwaŋa maama yɩ lwarɩm.
Ba na brɩ ba tɩtɩ te tɩn,
ba maɩ yaara mʋ ba fugi nɔɔna.
9 Ba maa ŋɔɔnɩ wo-kamunə
ba ma lwɛ Wɛ.
Ba ni-taanɩ dɩm maa brɩ
ba tɩtɩ kamunni,
nɩnɛɛnɩ bantʋ mʋ te
lʋgʋ baŋa maama.
10 Kʋ ma pa nɔɔna bam wʋbʋŋa vugimi.
Ba maa yɔɔrɩ ba joŋi ba taanɩ maama ba pa dɩ yɩ cɩga.
11 Ba maa tɛ ba wɩ:
«Wɛ wʋ́ wanɩ DƖ lwarɩ
kʋlʋ na jɩgɩ kʋ tʋŋɩ tɩn na?
Yuutu Baŋa-Wɛ dɩm yǝri
kʋlʋ na wʋra tɩn.»c
12 Nii-na! Mʋ nɔn-balwaarʋ tɩm
na yɩ te!
Kʋlʋkʋlʋ ba yaarɩ-ba.
Ba jɩjɩgɩrʋ tɩm yǝni tɩ puli mʋ
tɩ gaalɩ.
13 Cɩga ŋwaanɩ tɩn, amʋ na cɩgɩ a bɩcarɩ dɩ digiru
sɩ a yɩ digimi a tɩtɩ,
yɩ a vɩn lwarɩm kǝm tɩn,
kʋ maama yɩ kafɛ ŋwaanɩ mʋ na?
14 Amʋ yǝni a na yaara mʋ
dɛ maama wuu.
A na zaŋɩ zɩzɩŋa maama nɩ,
kʋ yɩ cam mʋ a yɩra nɩ.
15 Amʋ nan ya na tagɩ a wɩ:
«Amʋ wʋ́ taa ŋɔɔnɩ kʋntʋ doŋ mʋ,»
a yaá taa yɩ pipiri-nyɩm mʋ
yɩ a ywəri nmʋ biə bam kwaga nɩ.
16 A ma tiini a kwaanɩ sɩ a bʋŋɩ
a lwarɩ kʋ na sɩɩnɩ kʋ yɩ te tɩn.
Kʋ nan cana kʋ pa-nɩ
sɩ a wanɩ a lwarɩ kʋ kuri cɩga cɩga.
17 Amʋ nan na ve a zʋ Wɛ-digə kam tɩn
mʋ a laan tu a lwarɩ nɔn-balwaarʋ tɩm gurim na wʋ́ taa yɩ te tɩn.
18 Kʋ na yɩ cɩga tɩn,
nmʋ yagɩ-ba mʋ
pa ba nɔnɩ sisərə baŋa.
Nmʋ wʋ́ pa ba seeri ba tʋ
sɩ ba daarɩ ba je.
19 Yibʋgɩsa wʋnɩ mʋ
cɔgɩm lagɩ dɩ tʋ ba baŋa nɩ!
Fʋʋnɩ wʋ́ taa tiini dɩ jɩgɩ-ba
yɩ ba ŋwɩa saarɩ lʋgʋ baŋa nɩ.
20 Ba ŋwɩa kam lagɩ ka je mʋ,
nɩnɛɛnɩ nɔɔnʋ na dwɛ dɩndwɛ
o zaŋɩ dɔɔm wʋnɩ pa dɩ je te tɩn.
Baŋa-Wɛ, nmʋ na zaŋɩ,
n daa n bá ta n bʋŋɩ ba wʋbʋŋa.
21 Amʋ wʋʋ ya cɔgɩ zanzan,
yɩ a pa wǝǝnu tiini tɩ daanɩ-nɩ.
22 A wʋbʋŋa maama tɔgɩ jwərim yɩranɩ mʋ.
A maa yǝri cɩga kam.
A na tʋŋɩ te a pa nmʋ tɩn
nyɩ dɩ ga-vara na yǝni ba kɩ te tɩn mʋ.
23 Dɩ kʋntʋ maama dɩ,
a ta salɩ nmʋ yɩra nɩ mʋ
maŋa maama.
Nmʋ yǝni n jɩgɩ amʋ jɩŋa mʋ
yɩ dɩ́ veǝ.
24 Kʋ yɩ nmʋ zaasɩm dɩm mʋ yɩrɩ-nɩ
pa a wʋ cwə-laa wʋnɩ.
Kʋ kwaga seeni,
nmʋ wʋ́ pa a na zulə nmʋ tee nɩ.
25 Nɔɔn-nɔɔnʋ tǝrǝ wɛyuu nɩ
o na wʋ́ zəni-nɩ,
kʋ na daɩ nmʋ.
Tɩga baŋa nɩ amʋ daa ba beeri nɔɔn-nɔɔnʋ
a wǝli nmʋ wʋnɩ.d
26 Amʋ yɩra yam wʋ́ ba ya bugi ya ti.
A wʋbʋŋa dɩ wʋ́ ywəri
cwǝŋǝ kam nɩ.
Nmʋ Wɛ nan mʋ yɩ amʋ dalɩm je,
nmʋ pa a bɩcarɩ fɔgɩ dɩ jɩgɩ dam.
Nmʋ yɩ wʋlʋ na maŋɩ dɩ amʋ
maŋa maama tɩn mʋ.
27 Cɩga tɩn, balʋ maama na wʋ
yigə yigə nmʋ tee nɩ tɩn
wʋ́ ba ba je.
Nmʋ wʋ́ yɔɔrɩ n cɔgɩ
balʋ na mɛ ba kwaga ba ya nmʋ tɩn.
28 Sɩ kʋ na yɩ amʋ,
kʋ lamma mʋ kʋ pa-nɩ
dɩ a na salɩ Wɛ yɩra nɩ te tɩn.
Amʋ pɛ nmʋ Yuutu Baŋa-Wɛ
ji amʋ dalɩm je,
sɩ a daarɩ a ta wo-kamunə yalʋ maama n na tʋŋɩ tɩn,
sɩ nɔɔna lwarɩ jaja!