Wɛ-loro zǝnǝ ŋwaanɩ
Solɔmɔn dɛɛn panɩ ləŋə kantʋ.
72
Amʋ Tu Wɛ,nmʋ na yɩ cɩga tu tɩn,
pa dɩbam pɛ wʋm dɩ taa jɩgɩ
nmʋ cɩga kam doŋ.
Pa pɛ wʋm bu swan sɩ o wanɩ
o taa bʋrɩ cɩga bʋra.a
2 Kʋntʋ, oó taa tɔgɩ cɩga
o di nmʋ tɩtɩ nɔɔna bam taana,
sɩ nabwənə tɩtɩ dɩ na ba bʋra.
3 Kʋ na yɩ pweeru tɩm
dɩdaanɩ zwəənu tɩm dɩ,
tɩga kam maama wʋ́ ja yazurə
ka ba ka pa nɔɔna bam,
ba na tɔgɩ nmʋ cɩga kam tɩn ŋwaanɩ.
4 Pɛ wʋm wʋ́ taa zɩgɩ
nabwənə bam kwaga nɩ,
sɩ o taa joŋi yinigə tiinə
biə bam o yaga.
Kʋ nan na yɩ wʋlʋ
na jɩgɩ-ba o bɛɛsɩ tɩn,
pɛ wʋm wʋ́ yɔɔrɩ o cɔgɩ kʋ tu.
5 Nɩnɛɛnɩ wɩa kam dɩ cana kam
na wʋra taan te tɩn,
nɔɔna bam dɩ ba dwi dɩm
wʋ́ taa kwarɩ nmʋ Wɛ,
sɩ kʋ taa ve wuu.
6 Pɛ wʋm wʋ́ taa zǝni o nɔɔna bam,
nɩnɛɛnɩ dʋa na nɩ
tɩga baŋa nɩ te tɩn.
7 O paarɩ dɩm da yam nɩ,
nmʋ cɩga kam wʋ́ nuŋi
ka puli lanyɩranɩ.
Yazurə wʋ́ taa wʋra taa wuu,
nɩnɛɛnɩ cana kam
na wʋ wɛyuu nɩ te tɩn.
8 Nan pa pɛ wʋm taa te nɔɔna
je maama nɩ
kʋ na zɩgɩ nɩnɩʋ ni dɩdʋa nɩ
sɩ kʋ vu kʋ yi
nɩnɩʋ kʋdoŋ ni nɩ tɩn.
Pa o paarɩ laŋa kam taa zɩgɩ
Efratɩ bugə kam seeni
ka vu ka yi tɩga baŋa
kweelim je sɩm.
9 Dwi-gɛ tiinə balʋ na zʋʋrɩ
kagʋa yuu nɩ tɩn
wʋ́ ba ba tiiri o yigə nɩ ba zul‑o.
O dʋna bam dɩ wʋ́ vin ba yibiyə tɩga nɩ o yigə nɩ.
10 Tarsisi dɩ tɩɩnɩ dɩlʋ
na wʋ nɩnɩʋ kʋm ni nɩ tɩn
pwa bam maama
wʋ́ ja pɛɛra ba ba ba pa‑o.
Pwa balʋ na te Seba dɩ Sabaa tɩɩnɩ tɩn
dɩ wʋ́ kɩ kʋntʋ doŋ.
11 Pwa maama wʋ́ tiiri o yigə nɩ
ba zul‑o.
Tɩɩnɩ dɩm maama wʋ́ taa tʋŋɩ
ba pa‑o.b
12 Pɛ wʋm wʋ́ joŋi yinigə tu wʋlʋ
maama na keeri o loor-o tɩn,
kʋ wǝli dɩ nabwənə balʋ
na gɛ zənnu tɩn maama.
13 Kʋ na yɩ nabwənə
dɩ yinigə tiinə maama,
oó taa jɩgɩ yibwənə o pa-ba.
O ta wʋ́ vrɩ balʋ na wʋ cam wʋnɩ tɩn ŋwɩa o yagɩ.
14 Oó ja-ba o ja o nuŋi yaara
dɩ vuvugə maama wʋnɩ,
ba ŋwɩa na jɩgɩ nyɔɔrɩ
ka pa‑o tɩn ŋwaanɩ.
15 Wɛ wʋ́ pa pɛ wʋm
mʋmwa-dɩdɔrɔ!
Sɩ ba ja səbu-sɩŋa kalʋ na nuŋi Seba nɩ tɩn ba ba ba pa‑o.
Sɩ ba taa loori Wɛ
maŋa maama ba pa‑o
sɩ Wɛ yu-yoŋo taa wʋ o yuu nɩ
dɛ maama wʋnɩ.
16 Wɛ wʋ́ pa wʋdiu tiini kʋ gaalɩ
tɩga kam maama wʋnɩ,
sɩ zwəənu tɩm yuu maama
faarɩ dɩ mɩna.
Wɛ wʋ́ pa tweeru tɩm
taa ləri biə lanyɩranɩ
nɩnɛɛnɩ Liban tweeru tɩm
na ləri te tɩn.
Wʋdiiru tɩm maama maa
wʋ́ taa daga,
nɩnɛɛnɩ gaarʋ na nuŋi
tɩ puli te tɩn.
17 Wɛ wʋ́ pa pɛ wʋm yɩrɩ zaŋɩ
dɩ taa wʋra taan wuu,
nɩnɛɛnɩ wɩa kam ta na wʋ wɛyuu nɩ ka nyɩɩna te tɩn.
Dwi tiinə maama wʋ́ ma o yɩrɩ
sɩ ba taa loori Wɛ yu-yoŋo.
Ba maama wʋ́ sɛ nɩ
Wɛ yu-yoŋo wʋ o yuu nɩ.
18 Pa-na dɩ́ taa tee Baŋa-Wɛ dɩm
na yɩ Yisɩrayɛlɩ tiinə Wɛ tɩn!
Kʋ yɩ Dɩntʋ yɩranɩ mʋ
tʋŋɩ wo-kɩnkagɩla.
19 Pa-na dɩ́ zǝŋi DƖ yɩrɩ kamunu kʋm wɛɛnɩ maŋa maama!
Wɛ paarɩ-zulǝ yam maŋɩ sɩ kʋ jagɩ
kʋ yi lʋgʋ baŋa je maama.
Amina! Amina!
20 Kʋntʋ mʋ guri Zese bu Davidi wɛ-loro kʋlʋ maama o na pʋpʋnɩ o tiŋi tɩn.