Wɛ-loro kʋkwɩɩrʋ ŋwaanɩ
71
Amʋ Tu Baŋa-Wɛ,a tu a dalɩ nmʋ woro nɩ mʋ.
Yɩ pa cavɩɩra di-nɩ.
2 Nan tɔgɩ n cɩga kam ŋwaanɩ
n joŋi-nɩ n yagɩ.
Pʋrɩ n zwa sɩ n cəgi
a wɛ-loro kʋm,
sɩ n daarɩ n ba n vrɩ-nɩ n yagɩ.
3 Ta n kwəli-nɩ sɩ a wanɩ
a dalɩ nmʋ woro nɩ,
nɩ n yɩ piu mʋ te tɩn.
Dáanɩ mʋ amʋ wʋ́ yǝni
a duri a vu a səgi.
Tɔgɩ n ni dɩm baŋa nɩ
n vrɩ-nɩ n yagɩ,
nmʋ na yɩ a dalɩm je tɩn ŋwaanɩ.
4 Amʋ Tu Wɛ, joŋi-nɩ n yagɩ
nɔn-balwaarʋ jɩŋa nɩ,
sɩ nɔn-wʋ-lʋŋ-nyɩna yɩ wanɩ-nɩ ba ja.
5 Amʋ Yuutu Wɛ,
nmʋ yɩranɩ baŋa nɩ mʋ
amʋ tɩɩna yam daŋɩ da.
Kʋ na zɩgɩ a biini nɩ tɩn
a kɩ a cɩga dɩ nmʋ mʋ.a
6 Cɩga tɩn, kʋ zɩgɩ a lʋra maŋa nɩ
a salɩ nmʋ yɩra nɩ mʋ.
N jaanɩ-nɩ n nuŋi a nu pugə nɩ
yɩ n nii amʋ baŋa nɩ.
Amʋ wʋ́ taa tee‑m
maŋa maama wʋnɩ.
7 Amʋ laan jigi maana mʋ
nɔɔna zanzan yigə nɩ.
Nmʋ nan yɩ amʋ dalɩm je
mɛ na damma tɩn mʋ.
8 Dɛ maama wuu a yǝni a tee nmʋ,
yɩ a tɔɔlɩ nmʋ nɩnwaŋa taanɩ
a ba yaga.
9 A loori‑m sɩ n yɩ zəli-nɩ n yigə nɩ
a kʋkwɩɩrʋ maŋa kam nɩ.
A dam dɩm na tu dɩ ti maama,
nan yɩ viiri n daarɩ-nɩ.
10 Bɛŋwaanɩ, a dʋna bam yǝni
ba tɛ amʋ taanɩ.
Ba maa jɩgɩ ba bwɛ daanɩ mʋ
sɩ ba gʋ-nɩ.
11 Ba maa ŋɔɔnɩ ba wɩ:
«Wɛ mʋ maŋɩ DƖ lɔ o kwaga nɩ.
Pa-na dɩ́ vu dɩ́ da dɩ́ ja-o,
sɩ o daa ba jɩgɩ nɔɔnʋ
wʋlʋ na wʋ́ zən‑o tɩn.»
12 Amʋ Tu Wɛ, yɩ ta n yɩ yigə yigə
dɩdaanɩ amʋ.
Nan kɩ lɩla n ba n wǝli-nɩ.
13 Pa cavɩɩra ja balʋ
na jɩgɩ-nɩ ba bɛɛsɩ tɩn
sɩ ba daarɩ ba na cɔgɩm.
Pa balʋ na bʋŋɩ
sɩ ba kɩ amʋ zʋnnɩ tɩn
tʋ tɩga nɩ dɩ cavɩɩra.
14 Kʋ nan na yɩ amʋ,
amʋ tɩɩna yam wʋ́ fɔgɩ
ya lɔ nmʋ baŋa nɩ mʋ.
Amʋ ta wʋ́ taa ve yigə mʋ
sɩ a tiini a taa tee‑m.
15 A maa wʋ́ puri a ni a ta
nmʋ na tʋŋɩ cɩga te tɩn.
Dɛ maama wʋnɩ a lagɩ a ŋɔɔnɩ
n vrɩm dɩm taanɩ,
yɩ a nan warɩ a ni
dɩ maama kuri a ti.
16 Yuutu Baŋa-Wɛ,
amʋ wʋ́ ta nmʋ tɩtʋŋ-kamunə yam taanɩ.
A ta wʋ́ pa nɔɔna lwarɩ nɩ
nmʋ yɩranɩ mʋ bʋrɩ cɩga bʋra.
17 Amʋ Tu Wɛ, kʋ maŋɩ kʋ zɩgɩ
a biini wʋnɩ mʋ
n yǝni n pa-nɩ zaasɩm.
Dɩ zɩm maama dɩ, a ta tɛ
nmʋ wo-kɩnkagɩla yam taanɩ
a brɩ nɔɔna.
18 Amʋ nan na tu a kwɩn zanzan
yɩ a yuu kʋm maama pɩɩrɩ,
yɩ lɔ amʋ kwaga nɩ.
Bɛŋwaanɩ, a lagɩ a ta
nmʋ dam-fɔrɔ kʋm taanɩ
a brɩ a dwi dɩlʋ
na wʋ́ saŋɩ a kwaga tɩn mʋ.b
19 Amʋ Tu Wɛ,
nmʋ nɔn-ŋʋnnɩ dɩm daga mʋ
pa kʋ gɩɩnɩ kʋ di wɛyuu.
Nmʋ doŋ tǝrǝ,
dɩ n na tiini n kɩ tɩtʋŋ-kamunə te tɩn.c
20 Nmʋ pɛ cwǝŋǝ sɩ a na cam
dɩ lɛɛrʋ zanzan.
Dɩ kʋ dɩ, nmʋ ta wʋ́ pa
a ŋwɩa joori ka kɩ dam.
Nmʋ wʋ́ lɩ-nɩ tɩga kuri
goŋ-canluŋu wʋnɩ
sɩ a joori a zɩgɩ a zɩga je sɩm nɩ.
21 N ta wʋ́ pa a tiini a na yɩrɩ,
sɩ n daarɩ n joori n pa
a wʋʋ taa tigi tɩga nɩ.
22 Amʋ Tu Wɛ dɩm na yɩ Yisɩrayɛlɩ dwi dɩm Wʋ-poŋo Tu wʋm tɩn,
a lagɩ a kwe kɔnɔ mʋ
a ma a leeni a tee‑m,
nmʋ na yɔɔrɩ n zɩgɩ
n cɩga wʋnɩ tɩn ŋwaanɩ.d
23 Amʋ lagɩ a puri a ni mʋ
a yeeri wʋpolo sɔɔ,
dɩ a na leeni a tee‑m te tɩn.
Bɛŋwaanɩ, amʋ yɩ wʋlʋ
nmʋ na vrɩ n yagɩ tɩn mʋ.
24 Dɛ maama wʋnɩ amʋ wʋ́ taa tɛ jaja
n na bʋrɩ cɩga bʋra te tɩn.
Bɛŋwaanɩ, kʋ na yɩ balʋ ya na bʋŋɩ sɩ ba kɩ-nɩ zʋnnɩ tɩn,
vuvugə tʋ ba tɩtarɩ nɩ mʋ,
yɩ cavɩɩra di-ba.