Davidi wɛ-loro
69
Amʋ Tu Wɛ,nan joŋi-nɩ n yagɩ!
A tiini a wʋ cam wʋnɩ,
nɩnɛɛnɩ na-fara mʋ lagɩ
kʋ li a yuu.
2 A lagɩ a mʋʋrɩ mʋ mɔrɔ wʋnɩ.
A nɛ maa warɩ sɩ zɩgɩ cɛpɩ.
Amʋ maa yi na-luŋə je,
yɩ na-ŋʋnɩ mʋ lagɩ sɩ ja-nɩ sɩ je.
3 A tɔɔlɩ ni mʋ a beeri zǝnǝ yɩ a ga.
A yɩra laan mʋ cɛ dɩ kərə kam,
a kwǝrǝ dɩ ma kʋ.
A yiǝ maama kɩ dɩ yi-na
a na tiini a loori a Tu Wɛ taan tɩn ŋwaanɩ.
4 Balʋ na culi amʋ kafɛ ŋwaanɩ tɩn
mʋ tiini ba daga
ba dwe a yuuywe sɩm.
Ba maa dʋnɩ amʋ vwan cwǝŋǝ wʋnɩ,
yɩ ba bʋŋɩ sɩ ba cɔge-nɩ.
Ba fɩn amʋ sɩ a joori a ja
woŋo kʋlʋ a na wʋ ŋɔgɩ tɩn
a ja a ba a pa-ba.
5 Amʋ Tu Wɛ, nmʋ mʋ maŋɩ n ye
a na tʋŋɩ jwərim dɩlʋ tɩn.
A lwarɩm kikiǝ bá wanɩ ya səgi
nmʋ yigə nɩ.
6 Paŋwa Tu Baŋa-Wɛ wʋm,
kʋ na yɩ balʋ na jɩgɩ tɩɩna
nmʋ tee nɩ tɩn,
yɩ sɛ sɩ cavɩɩra di-ba
amʋ ŋwaanɩ.
Yisɩrayɛlɩ dwi tiinə Wɛ dɩm,
yɩ pa balʋ na zuli‑m tɩn
vwana parɩ amʋ ŋwaanɩ.
7 Kʋ yɩ a na sɛ nmʋ tɩn ŋwaanɩ
mʋ nɔɔna jɩgɩ-nɩ ba twɩa
yɩ a daa ba jɩgɩ yuu ba yigə nɩ.
8 Amʋ cʋrrʋ laan kɩ nɩnɛɛnɩ
ba yəri-nɩ mʋ te.
A daa ta maa nyɩ dɩ vəru
a tɩtɩ nu-biə bam tee nɩ.a
9 Amʋ tiini a tʋŋɩ dɩ yi-sɩɩna
a pa nmʋ digə kam mʋ.b
Kʋntʋ ŋwaanɩ, nɔɔna na jɩgɩ nmʋ
ba twɩa te tɩn
mʋ joori kʋ tui amʋ baŋa nɩ.
10 A maa yǝni a keeri yɩ a vɔ ni,
pa nɔɔna jɩgɩ-nɩ ba yáala.
11 A maa zʋʋrɩ gwar-zɩnzwara
wʋ-cɔgɔ ŋwaanɩ
yɩ ba jɩgɩ-nɩ ba mwana.c
12 Tɩʋ kʋm nɔɔna na jeeri
mɛ maama tɩn,
ba maa kɩ sawɩa amʋ ŋwaanɩ.
Sa-nyɔra tɩtɩ panɩ le mʋ
amʋ ŋwaanɩ ba leenə.
13 Amʋ Tu Baŋa-Wɛ,
kʋ yɩ nmʋ mʋ a yǝni a loori,
sɩ n nii amʋ baŋa nɩ dɩ yibwənə.
A loori-m! Sɛ amʋ wɛ-loro kʋm,
sɩ n daarɩ n joŋi-nɩ n yagɩ
n sono kʋm ŋwaanɩ.
14 Vaŋɩ-nɩ n ja n nuŋi
mɔrɔ kʋntʋ wʋnɩ,
sɩ na bam yɩ kwəli-nɩ.
Yɩ sɛ sɩ balʋ na culi-nɩ tɩn
wanɩ-nɩ ba ja.
Liiri-nɩ n ja n nuŋi
na-luŋə kam wʋnɩ.
15 Nan yɩ sɛ sɩ dʋ-fara tɩm
ja amʋ ba je.
Yɩ pa na-luŋə kam li amʋ.
Yɩ yagɩ sɩ a zʋ tʋʋnɩ goŋo.
16 Amʋ Tu Baŋa-Wɛ,
ləri amʋ wɛ-loro kʋm,
nmʋ sono kʋm na tiini
kʋ lana tɩn ŋwaanɩ.
Nan pipiri n nii amʋ seeni,
sɩ nmʋ tiini n duri nɔɔna yibwənə mʋ.
17 Yɩ ma n kwaga n ya-nɩ,
sɩ amʋ yɩ nmʋ tɩntʋŋnʋ mʋ,
yɩ a tiini a wʋ cam wʋnɩ.
Kɩ lɩla n ba n wǝli-nɩ!
18 Nan fʋfɔ n ba n yi amʋ te
sɩ n joŋi-nɩ n yagɩ.
Vrɩ-nɩ a dʋna bam jɩŋa nɩ n yagɩ.
19 Nmʋ nɛ a dʋna bam maama
na kɩ tɩte.
Ba maa jɩgɩ-nɩ ba twɩa yɩ ba yáala,
pa a na a cavɩɩra.
20 Amʋ wʋʋ kʋm cɔɔrɩ mʋ
ba tʋrʋ tɩm ŋwaanɩ.
A vwana yam dɩ ma parɩ.
A ya bʋŋɩ nɩ nɔɔnʋ wʋ́ ba
o duri amʋ ŋwaŋa,
yɩ nɔɔn-nɔɔnʋ wʋ tu.
Nɔɔnʋ tǝrǝ o na wʋ́ pa a bɩcarɩ zuri.
21 Ba nan kwe wo-cɛɛrʋ mʋ
ba kɩ a wʋdiu wʋnɩ.
Na-nyɔm na jɩgɩ-nɩ tɩn
mʋ ba kwe sa-nywana
ba pa-nɩ sɩ a nyɔ.d
22 Wɛ wʋ́ pa ba wʋdi-fwaarʋ tɩm
joori tɩ ja cɔgɩm tɩ ba bantʋ dɩ ba badonnǝ bam baŋa nɩ,
nɩ cɩkʋ na jaanɩ-ba te tɩn.
23 Wɛ wʋ́ pa ba yiǝ dwe,
yɩ ba daa warɩ ba naɩ.
Wɛ wʋ́ pa ba yɩra sɔɔrɩ taan wuu.
24 Wɛ, pa n banɩ zaŋɩ ba baŋa nɩ
n daarɩ n waarɩ-ba.
Pa n ban-lʋm cɔgɩ-ba.
25 Wɛ wʋ́ pa ba sam dɩm
ji di-dwəənu
sɩ nɔɔn-nɔɔnʋ daa yɩ daarɩ
je sɩm kʋntʋ nɩ.e
26 Bɛŋwaanɩ, nmʋ na yǝni
n vaŋɩ balʋ zwa tɩn
mʋ bantʋ beeri sɩ ba zəli-ba.
Kʋ ta na yɩ balʋ
n na kɩ-ba zʋnnɩ tɩn mʋ,
ba yǝni ba ŋɔɔnɩ ba yaara yam taanɩ.
27 Nan yɩ swe ba kǝm-balwaarʋ tɩm swiə, dɩ tɩ dɩdʋa dɩ.
Yɩ sɛ sɩ n joŋi-ba
sɩ ba na ba cɩga.
28 Kʋ maŋɩ sɩ n saarɩ ba yɩra mʋ,
sɩ ya yɩ taa wʋ ŋwɩa tɔnɔ kʋm wʋnɩ.
Yɩ pa ba yɩra taa pʋpʋnɩ ya tiŋi
ya wǝli balʋ na tɔgɩ Wɛ cwǝŋǝ tɩn yɩra wʋnɩ.f
29 Amʋ Tu Wɛ, kʋ tiini kʋ ni amʋ,
yɩ a vwana dɩ laan parɩ.
Kʋntʋ tɩn, ba n joŋi-nɩ,
sɩ a wanɩ a zaŋɩ wɛɛnɩ.
30 Amʋ wʋ́ zaŋɩ a leeni ləŋə
a ma tee Wɛ yɩrɩ!
A ta wʋ́ kɩ DƖ le yɩ a pa DƖ yɩrɩ zaŋɩ.
31 A na zuli‑DƖ kʋntʋ doŋ,
kʋʋ́ poli DƖ wʋʋ
kʋ dwǝni a na mɛ na-bɩa
a ma a kɩ kaanɩm a pa‑DƖ.
Kʋ na maŋɩ kʋ yɩ na-bɩa
kalʋ na bɩgɩ ka ti tɩn,
kʋ ya bá yi a zulə yam.
32 Nabwənə maa wʋ́ na
Wɛ na joŋi-nɩ te tɩn
yɩ kʋ pa ba wʋʋ poli zanzan.
Abam balʋ na kwarɩ Wɛ tɩn,
Wɛ wʋ́ pa á bɩcara fɔgɩ
ya kɩ dam!
33 Bɛŋwaanɩ, Baŋa-Wɛ yǝni DƖ cəgi
yinigə tiinə wɛ-loro mʋ.
DƖ ba swiə DƖ tɩtɩ nɔɔna
na nɛ bɛɛsɩm tɩn swiə.
34 Woŋo maama maŋɩ sɩ kʋ zuli Wɛ!
Wɛyuu dɩ tɩga baŋa wǝǝnu,
kʋ wǝli dɩ wǝǝnu tɩlʋ
na wʋ nanɩɩrʋ tɩm wʋnɩ tɩn,
tɩ maama wʋ́ taa tee Wɛ!
35 Wɛ mʋ wʋ́ vrɩ Siyɔn tɩʋ kʋm DƖ yagɩ
yɩ DƖ joori DƖ lɔ
Zuda tɩɩnɩ dɩm maama.
DƖ tɩtɩ nɔɔna bam laan wʋ́ taa zʋʋrɩ je sɩm kʋntʋ nɩ.
Baá taa te tɩga kam kʋntʋ.
36 DƖ tɩntʋŋna dwi tiinə bam wʋ́ joŋi tɩga kam ba taa te.
Balʋ maama na soe Wɛ tɩn
wʋ́ taa zʋʋrɩ da.