Baŋa-Wɛ wʋ́ wanɩ DƖ dʋna bam
Davidi dɛɛn panɩ ləŋə kantʋ.
68
Wɛ lagɩ DƖ zaŋɩDƖ zɩgɩ wɛɛnɩ mʋ,
pa DƖ dʋna bam jagɩ saɩ!
Balʋ na culi Wɛ tɩn wʋ́ duri
sɩ ba lu DƖ yigə nɩ.
2 DƖ lagɩ DƖ zəli-ba mʋ pa ba je,
nɩnɛɛnɩ viu na fuli nyʋa te
yɩ ka je tɩn.
Nɔn-balwaarʋ maa wʋ́ saarɩ
Wɛ yigə nɩ
nɩ maarʋ na nyɩɩnɩ mim wʋnɩ
te tɩn.
3 Kʋ nan na yɩ nɔn-ŋʋna,
bantʋ wʋ́ zɩgɩ Wɛ yigə nɩ mʋ
ba di ywəəni,
yɩ ba cakɩ dɩ wʋpolo.
4 Leeni-na le sɩ á tee Wɛ,
sɩ á daarɩ á zuli DƖ yɩrɩ dɩm.
DƖ yɩrɩ mʋ yɩ Baŋa-Wɛ.
DƖ maa yǝni DƖ dɔgɩ
kunkwǝǝnu baŋa nɩ DƖ veǝ.
Zuli-DƖ-na sɩ á di ywəəni DƖ tee nɩ!
5 DƖ yɩ bɩtara dwi maama ko mʋ.
DƖ daa ta maa zɩgɩ kadənə
dwi maama kwaga nɩ.a
Dɩ́ Tu Wɛ mʋ kʋntʋ,
DƖ na zʋʋrɩ je sɩlʋ
na yɩ lanyɩranɩ fasɩ tɩn wʋnɩ.
6 DƖ maa paɩ balʋ na yɩ ba yɩranɩ tɩn naɩ dwi.
DƖ ta maa yǝni DƖ pʋrɩ pɩɩna DƖ yaga
pa ba na zurim ba ŋwɩa wʋnɩ.b
Kʋ daarɩ vɩɩna
wʋ́ taa zʋʋrɩ kagʋa yuu
mɛ na na tǝrǝ tɩn wʋnɩ mʋ.
7 Dɩ́ Tu Wɛ, nmʋ dɛɛn nuŋi
n tɔgɩ n nɔɔna bam yigə
n ja-ba n bɛ kagʋa kam.
8 Maŋa kam kʋntʋ nɩ,
tɩga kam dɛɛn sisiŋi mʋ,
yɩ dʋa dɩ tiini ka nɩ taan.
Kʋ maa yɩ nmʋ Wɛ yigə nɩ mʋ
kʋ kɩ kʋntʋ.
Nmʋ yɩ Sinayi piu Baŋa-Wɛ dɩm mʋ,
yɩ n ta yɩ Yisɩrayɛlɩ tiinə bam Wɛ.
9 Dɩ́ Tu Wɛ, n ta ma pa dʋa nɩ
n tɩtɩ tɩga kam baŋa nɩ.
Ka na jigi tɩ-kʋra tɩn,
n pɛ ka joori ka zurǝ.
10 N tɩtɩ nɔn-kɔgɔ kʋm tu
ba jǝni ka baŋa nɩ.
Nmʋ tɔgɩ n yu-yoŋo dɩm baŋa nɩ mʋ
n pa yinigə tiinə laan jɩga.
11 Dɩ́ Yuutu Wɛ dɩm tɔɔlɩ DƖ kwǝrǝ mʋ,
yɩ kaana kɔgɔ kɔgɔ dɩ pa
sɩ ka jagɩ je maama nɩ.
12 Ba maa wɩ:
«Pwa dɩ ba jar-kərə bam
duri lɩla mʋ sɩ ba lu.»
Ka-yʋrrʋ tɩm dɩ ma pɔɔrɩ jɩjɩgɩrʋ
tɩlʋ bantʋ na viiri ba daarɩ tɩn.
13 Abam balʋ dɩ na maŋɩ kwaga nɩ
yɩ á yɩrɩ peeni sɩm tɩn,
á nɛ kunkwənə nyɩnyʋrʋ tɩlʋ
ba na mɛ səbu-poŋo ba kwǝli
yɩ ya vwana yam dɩ yɩ səbu-sɩŋa mʋ ba mɛ ba kwǝli-ya tɩn.
14 Dam-fɔrɔ Tu Wɛ dɩm na pɛ
sɩ pwa bam jagɩ saɩ kʋntʋ tɩn,
kʋ nyɩ dɩ dʋ-kambana mʋ nɩgɩ
Salɩmon piu kʋm yuu nɩ.
15 Basan pweeru tɩm jɩgɩ nɩnwaŋa zanzan.
Tɩ maa diini tɩ yi wɛyuu baŋa baŋa.
16 Pu-kamunnu tɩm, bɛɛ mʋ yɩ
á nii Wɛ tɩtɩ piu kʋm
á gooni-kʋ kʋntʋ?
Wɛ kuri piu kʋm kʋntʋ
sɩ DƖ di DƖ paarɩ dáanɩ.
Dáanɩ mʋ Baŋa-Wɛ wʋ́ taa zʋʋrɩ
maŋa maama.
17 Dɩ́ Yuutu Wɛ dɩm maa jɩgɩ sise-tərikooru mʋrrʋ kuni mʋrrʋ zanzan.
DƖ dɛɛn tɔgɩ dɩ-tɩ
DƖ zɩgɩ Sinayi piu kʋm nɩ mʋ
DƖ ba DƖ zʋ DƖ digə kam nɩ.
18 DƖ na diini wɛyuu kʋntʋ tɩn,
DƖ kalɩ DƖ dʋna bam
DƖ na wanɩ-ba tɩn DƖ ja vu.
DƖ ma daarɩ DƖ joŋi pɛɛra
nɔɔna tee nɩ,
dɩ ba na maŋɩ
ba jɩgɩ wʋ-lʋŋʋ mʋ dɩ.
Kʋntʋ tɩn, Yuutu Baŋa-Wɛ
laan wʋ́ taa zʋʋrɩ dáanɩ.
19 Pa-na dɩ́ taa tee dɩ́ Yuutu Wɛ dɩm,
dɩ DƖ na təli dɩbam
DƖ maa yɩ wʋlʋ na vrɩ dɩbam
DƖ yagɩ tɩn.
20 Dɩbam Yuutu Baŋa-Wɛ dɩm
joŋi nɔɔna mʋ DƖ yaga.
DƖ maa yǝni DƖ cʋ dɩbam
sɩ tʋʋnɩ yɩ wanɩ dɩbam dɩ ja.
21 Kʋ nan na yɩ Wɛ dʋna bam,
DƖ lagɩ DƖ lɔ ba yum mʋ.
DƖ ta wʋ́ cɩcʋgɩ ba yukwəli,
ba na soe lwarɩm kikiǝ te tɩn ŋwaanɩ.
22 Dɩ́ Yuutu Wɛ dɩm maa wɩ:
«Amʋ wʋ́ ja a dʋna bam mʋ
a pa ba zɩgɩ Basan seeni
ba joori ba ba.
Ba ta na maŋɩ ba wʋ
nɩnɩʋ kʋm kuri kuri nɩ dɩ,
amʋ ta wʋ́ ja-ba a nuŋi.
23 Kʋntʋ wʋ́ pa abam cwǝŋǝ
sɩ á ma ba jana bam
á ma á zarɩ á nɛ.
Á kakuri sɩm tɩtɩ wʋ́ dəlimi
a dʋna yɩra yam,
yɩ ba di ba na lagɩ te tɩn ba su.»
24 Amʋ Tu Wɛ, nmʋ mʋ yɩ amʋ Pɛ.
Nɔɔna laan naɩ
nmʋ kwaga kɔgɔ kʋm na toŋi gɩna
ba maa ve n digə kam tɩn.
25 Lən-leenə mʋ wʋ kɔgɔ kʋm yigə nɩ.
Wo-magɩna dɩ ma saŋɩ ba kwaga.
Kabwənə maa wʋ ba tɩtarɩ nɩ
yɩ ba jɩgɩ sɩnyɛ ba maga.c
26 Ba maa leeni ba wɩ:
«Pa-na dɩ́ kɔgɔ kʋm maama
taa tee Baŋa-Wɛ!
Yisɩrayɛlɩ dwi tiinə maama,
zuli-DƖ-na!»
27 Nii-na, Bɛnzamɛn dwi dɩm
na muri tɩn mʋ
wʋ ba maama yigə nɩ.
Zuda dwi dɩm nakwa
dɩ ba kɔgɔ kʋm maama
maa tɔgɩ ba wʋra,
kʋ ta wǝli dɩ Zabulɔn dwi dɩm
dɩ Nɛfitali dwi dɩm
nakwa bam maama.
28 Dɩbam Tu Wɛ, pa n dam dɩm
zaŋɩ dɩ brɩ jaja!
Fɔgɩ n tʋŋɩ dɩ n dam dɩm,
nɩ n dɛɛn na kɩ n pa dɩbam te tɩn.
29 N na zʋʋrɩ n digə kam
Zeruzalɛm nɩ tɩn,
lʋgʋ baŋa pwa bam wʋ́ ja pɛɛra
ba ba ba pa‑m.
30 Nan zaŋɩ n bwɛ tɩʋ kʋlʋ
na nyɩ dɩ ga-varɩm yɩ kʋ səgi
nancan-gullu wʋnɩ tɩn.
Daa ta bwɛ tɩɩnɩ dɩlʋ
na brɩ ba tɩtɩ nɩ ba yɩ nabɛ
yɩ ba wʋ na-pwalɩ tɩtarɩ nɩ tɩn.
Bantʋ maŋɩ sɩ ba tu ba tɩtɩ mʋ
ba daarɩ ba ja səbu-poŋo wǝǝnu
ba ba ba pa‑m.
Pa tɩɩnɩ dɩlʋ na soe jara-kǝm tɩn jagɩ saɩ.
31 Ezipi tiinə wʋ́ tʋŋɩ dɩdɛɛra
sɩ ba ba.
Kusi tiinə dɩ wʋ́ ba ba sɛ ba pa Wɛ.
32 Lʋgʋ baŋa tɩɩnɩ dɩm maama,
leeni-na á tee Wɛ.
Leeni-na á zuli Baŋa-Wɛ.
33 Dɩntʋ mʋ maŋɩ DƖ dɔgɩ wɛyuu baŋa kam nɩ faŋa faŋa DƖ veǝ.
Nii-na! DƖ kwǝr-dɩa kam bagɩ mʋ
pɩna-pɩna.
34 Sɛ-na nɩ Wɛ tiini DƖ jɩgɩ dam!
Dɩntʋ mʋ di paarɩ
Yisɩrayɛlɩ tiinə baŋa nɩ.
DƖ dam dɩm maa brɩ jaja
wɛyuu nɩ.
35 Dɩ́ Tu Wɛ, nmʋ na zʋʋrɩ
n digə kam nɩ tɩn,
n yɔɔrɩ n jɩgɩ fʋʋnɩ.
DƖ maa yɩ Yisɩrayɛlɩ tiinə Wɛ dɩm,
yɩ DƖ paɩ DƖ nɔɔna bam jɩgɩ dam dɩ baarɩ.
Pa-na sɩ dɩ́ tee Wɛ!