Tee-na Baŋa-Wɛ!
66
Nabiinǝ maama,yeeri-na dɩ wʋpolo sɔɔ
á ma á tee Wɛ.
2 Leeni-na á zuli
DƖ yɩrɩ kamunu kʋm.
Səni-na DƖ paarɩ-zulǝ yam
sɩ á ma á tee‑DƖ.
3 Ta-na á brɩ Wɛ nɩ:
«Nmʋ tiini n tʋŋɩ wo-kɩnkagɩla naa!
N dam dɩm dɩ tiini dɩ daga
dɩ gaalɩ,
pa n dʋna maama kwarɩ fʋʋnɩ
yɩ ba sɛ ba pa‑m.
4 Nabiinǝ maama tiiri tɩga nɩ mʋ
ba zuli‑m.
Ba maama leeni ba səni-m.
N yɩrɩ dɩm mʋ ba leeni
ba zuli-dɩ.»
5 Ba-na á nii á na
Wɛ na kɩ kʋlʋ maama tɩn.
DƖ yɔɔrɩ DƖ kɩ wo-kɩnkagɩla mʋ
DƖ pa nabiinǝ.
6 DƖ dɛɛn pɛ nɩnɩʋ kʋm ji tɩ-kʋra.a
Dɩ́ nabaara bam dɛɛn tɔgɩ
bugə kam wʋ dɩ ba nɛ ba bɛ.
Pa-na sɩ dɩ́ kɩ wʋpolo
DƖ kənə yam kʋntʋ ŋwaanɩ.
7 Wɛ jɩgɩ dam mʋ DƖ ma
DƖ di DƖ paarɩ maŋa maama.
DƖ yiǝ maa dʋlɩ ya nii
lʋgʋ baŋa tɩɩnɩ dɩm maama.
Vɩɩna nan yɩ brɩ ba tɩtɩ
DƖ yigə nɩ.
8 Lʋgʋ baŋa dwi tiinə maama,
səni-na dɩbam Tu Wɛ dɩm.
Kaasɩ-na DƖ tiə yam á yagɩ wɛ wɛ!
9 Dɩntʋ mʋ yǝni DƖ cʋ dɩ́ ŋwɩa kam.
DƖ maa wʋ pɛ pwələ
sɩ dɩ́ tri dɩ́ tʋ tɩga nɩ.
10 Dɩ́ Tu Wɛ, nmʋ mʋ maŋɩ dɩbam n nii.
Nmʋ ta pɛ
dɩ́ fɔgɩ dɩ́ kwɛ lanyɩranɩ,
nɩ ba na kwɛ səbu-poŋo te tɩn.
11 N jaanɩ dɩbam n zʋ
cɩkʋ wʋnɩ,
yɩ n daarɩ n pa cam
jɩgɩ dɩbam dɩ daana.
12 Nmʋ pɛ dɩ́ dʋna bam pwələ
pa ba jɩgɩ dɩbam ba nwana.
Dɩ́ ma tɔgɩ mim wʋnɩ
dɩdaanɩ na-fara wʋnɩ dɩ́ kɛ.
Nmʋ laan ma n pa dɩ́ vu dɩ́ jǝni
je sɩlʋ na yɩ falalala tɩn nɩ.
13 Amʋ laan nan wʋ́ ja pɛɛra mʋ
a zʋ n digə kam wʋnɩ
a ma kɩ zwɛɛm kaanɩm a pa‑m.
A ta wʋ́ kɩ a su a na dugi durə
sɩ a kɩ kʋlʋ a pa‑m tɩn.
14 Amʋ cam maŋa kam nɩ mʋ
a dɛɛn puri a ni
a du durə dɩm kʋntʋ.
15 Amʋ laan lagɩ a kwe vara
balʋ na nugi lanyɩranɩ tɩn,
a ma a kɩ zwɛɛm kaanɩm a pa‑m.
A maa wʋ́ zwɛ pi-balɩ sɩ sɩ lwəm taa ywəmmə nmʋ tee nɩ.
A ta wʋ́ kwe nabɛ dɩ bʋbwaalʋ mʋ a kɩ kaanɩm.
16 Abam balʋ maama na kwarɩ Wɛ tɩn,
ba-na á cəgi woŋo.
Amʋ laan wʋ́ lwǝni
woŋo kʋlʋ maama Wɛ na kɩ
DƖ pa-nɩ tɩn a brɩ abam.
17 A ya keeri mʋ a loori Wɛ
sɩ DƖ wǝli-nɩ.
A ma puri a ni a tee‑DƖ.
18 Amʋ fra ya na wʋ
lwarɩm kikiə wʋnɩ,
a Yuutu Wɛ dɩm ya bá sɛ
DƖ cəgi-nɩ.
19 Wɛ nan sɩɩnɩ DƖ ni a kwǝrǝ kam
yɩ DƖ daarɩ DƖ cəgi
a wɛ-loro kʋm.
20 Wɛ maŋɩ dɩ tiə.
A na loori‑DƖ tɩn, DƖ wʋ vɩ-nɩ.
DƖ ta wʋ dwanɩ DƖ sono kʋm
DƖ daarɩ-nɩ.