Dɩbam tɩɩna wʋ Wɛ tee nɩ
Davidi dɛɛn panɩ ləŋə kantʋ.
65
Dɩbam Tu Wɛ,kʋ maŋɩ sɩ dɩ́ taa tee‑m
Siyɔn tɩʋ kʋm wʋnɩ mʋ.
Dɩ́ wʋ́ sɩɩnɩ dɩ́ kɩ kʋlʋ maama
dɩ́ na goni ni sɩ dɩ́ kɩ dɩ́ pa‑m tɩn.
2 Nmʋ mʋ yɩ wʋlʋ
na cəgi dɩbam wara tɩn mʋ.
Tɩga baŋa nɔɔna maama
wʋ́ ba nmʋ te sɩ ba zuli‑m.
3 Dɩbam lwarɩm dɩm daga
ya dwe dɩ́ jam,
yɩ nmʋ ta kwe dɩ́ lwarɩm kikiǝ yam,
n yagɩ n ma n cɛ dɩbam.a
4 Balʋ maama nmʋ na kuri
sɩ ba ba ba taa zʋʋrɩ
nmʋ digə kam wʋnɩ tɩn,
bantʋ jɩgɩ yu-yoŋo!
Dɩbam yi wʋ́ su dɩdaanɩ wo-laarʋ
tɩlʋ na wʋ n di-ŋʋna kam nɩ tɩn.
Dɩ́ wʋ́ na yu-yoŋo
nmʋ tɩtɩ sɔŋɔ kʋm nɩ.
5 Dɩbam Tu Wɛ,
nmʋ mʋ yɩ dɩbam Vɩrnʋ.
Nmʋ yǝni n sɛ dɩ́ wɛ-loro kʋm,
yɩ n tʋŋɩ tɩtʋŋa yalʋ
na kɩ dɩbam yǝǝu tɩn,
sɩ n ma n vrɩ dɩbam.
Lʋgʋ baŋa nɔɔna maama tɩɩna
wʋ nmʋ tee nɩ mʋ,
kʋ ta wǝli dɩ balʋ na kaagɩ
nanɩɩrʋ tɩm nɩ ba ve tɩn.
6 N tɔgɩ n dam dɩm baŋa nɩ mʋ,
n cwi pweeru tɩm
n zɩgɩ kəŋkəŋ.
Kʋ maa brɩ n dam dɩm
na tiini dɩ daga te tɩn.
7 Nanɩɩrʋ tɩm na wuuri te
yɩ na-ŋʋnɩ sɩm pɔgɩlɩ zanzan tɩn,
n pɛ dʋ-fara tɩm maama
maŋɩ da yirr mʋ.b
Lʋgʋ baŋa tɩɩnɩ dɩm dɩ na kɩ sɔɔ tɩn,
n pɛ dɩ yɩ cɩmm mʋ.
8 Balʋ na zʋʋrɩ lʋgʋ baŋa
gugwəəru nɩ yigə yigə tɩn
laan fʋna mʋ dɩ wo-kɩnkagɩla
yalʋ n na kɩ tɩn.
Kʋ na zɩgɩ wa-puli seeni
sɩ kʋ taa ve wa-zʋʋrɩ seeni tɩn
nabiinǝ maama wʋ́ taa leeni
wʋpolo le nmʋ ŋwaanɩ.
9 Nmʋ yigə wʋ tɩga kam wʋnɩ
yɩ n yǝni n pa dʋa nɩa
ka baŋa nɩ,
pa ka ywəmmə lanyɩranɩ.
Nmʋ bwi sɩm su sɩ pɛɛlɩ.
Sɩ na bam maa pa
tɩga kam kɩ wʋdiiru zanzan
ka pa nɔɔna bam.
Nmʋ na yǝni n tʋŋɩ te tɩn
mʋ kʋntʋ.
10 Nmʋ ma n pa dʋa yǝni
ka bugi tɩ-kʋra kam.
Dʋa kam maa yǝni
ka zuri tɩga kam.
Nmʋ ma n tɔgɩ kʋntʋ baŋa nɩ
n pa pwələ sɩ wʋdiiru wanɩ
tɩ kɩ lanyɩranɩ.
11 Faa na yǝni kʋ yi
bɩnɩ maama wʋnɩ,
nmʋ pa wʋdiiru wʋra.
Cwe sɩlʋ maama
n na tɔgɩ da n kɛ tɩn,
wʋdiiru tɩm gaalɩ mʋ.
12 Kagʋɩ sɩm maama laan
kwin mʋ dɩdaanɩ ga-lɛɛrʋ.
Pweeru tɩm je maama
dɩ maa jɩgɩ wo-laarʋ,
pa ywəəni wʋra kʋ ja gaalɩ.
13 Vara mʋ su pwəli sɩm maama.
Mɩna dɩ maa li bwəəlu tɩm.
Kʋ daarɩ je sɩm maama
leeni dɩ kwǝr-dɩa,
wʋpolo na wʋra tɩn ŋwaanɩ.