Davidi wɛ-loro kwǝlim ŋwaanɩ
64
Amʋ Tu Wɛ,cəgi amʋ wɛ-loro
dɩ a na wʋ cam wʋnɩ te tɩn.
Ta n cʋ-nɩ a dʋna bam tɩtarɩ nɩ
dɩ ba na fugi-nɩ te tɩn.
2 Ta n kwəli-nɩ,
sɩ nɔn-balwaarʋ na banɩ daanɩ
sɩ ba cɔge-nɩ te tɩn
yɩ wanɩ kʋ yi-nɩ.
Yɩ sɛ sɩ kəm-balwaarʋ tiinə
zʋ kɔgɔ wʋnɩ
ba kɩ lwarɩm a yuu nɩ.
3 Bantʋ dindəlimə yam goni mʋ
nɩnɛɛnɩ sʋ-lwaanʋ niə te tɩn.
Ba ni-taanɩ dɩ maa zɔ nɔɔna
nɩnɛɛnɩ cɩna te tɩn.
4 Ba yǝni ba səgi mʋ
ba da ba ta nɔn-ŋʋna,
yɩ ba ba kwarɩ fʋʋnɩ.
5 Ba yəni ba pa-da baarɩ mʋ
sɩ ba yɔɔrɩ ba kɩ lwarɩm
nɩ ba wʋbʋŋa na jaanɩ
sɩ ba kɩ te tɩn.
Ba banɩ daanɩ mʋ sɩ ba cɩ cɩgɩrʋ ba donnǝ ŋwaanɩ,
yɩ ba wɩ: «Nɔɔn-nɔɔnʋ ba naɩ
dɩ́ kənə yam.»
6 Ba na jǝni ba banɩ
kǝm-balwaarʋ bana kʋntʋ,
ba laan yǝni ba ta mʋ nɩ:
«Kʋ yɩ wo-laa mʋ dɩ́ banɩ.»
Cɩga tɩn, nabiinǝ bɩcarɩ dɩ ba wʋbʋŋa maama baŋwɛ maŋa dɩ maŋa.
7 Wɛ nan mʋ wʋ́ kwe
DƖ cɩna yam DƖ ta-ba,
pa ba da ba na zʋnnɩ.
8 Bantʋ tɩtɩ ni-taanɩ dɩm
mʋ lagɩ dɩ joori dɩ di-ba,
pa ba tʋ tɩga nɩ.
Wʋlʋ maama na nɛ-ba,
kʋ tu yɩra wʋ́ taa saɩ.
9 Nɔɔna maama laan maa
wʋ́ taa kwarɩ fʋʋnɩ.
Ba ta wʋ́ tɔɔlɩ Wɛ tɩtʋŋa yam tɔla,
yɩ ba daarɩ ba kɩ DƖ kikiə yam
ba wʋbʋŋa nɩ.a
10 Nɔn-ŋʋna wʋ́ di ywəəni mʋ
Baŋa-Wɛ ŋwaanɩ.
Dɩntʋ wʋnɩ mʋ baá na ba woro.
Balʋ na yɔɔrɩ cwə-laa wʋnɩ tɩn
wʋ́ taa jɩgɩ wʋpolo
dɩ Baŋa-Wɛ na kɩ kʋlʋ tɩn.