Wɛ sono kʋm daga
Davidi dɛɛn panɩ ləŋə kantʋ maŋa kalʋ o na wʋ Zuda kagʋa kam wʋnɩ tɩn.a
63
Amʋ Tu Wɛ,nmʋ sɩɩnɩ n yɩ a Wɛ mʋ.
Nmʋ fra tiini ya zʋ-nɩ,
nɩnɛɛnɩ na-nyɔm na jɩgɩ-nɩ te tɩn.
Amʋ tiini a lagɩ‑m dɩ a wʋʋ maama,
nɩ tɩ-kʋra na tigə yɩ na tǝrǝ tɩn.
2 Amʋ na zʋ n digə kam nɩ tɩn,
a nɛ nmʋ dɩ n dam dɩm maama,
kʋ wǝli dɩ n paarɩ-zulǝ yam.
3 Nmʋ na tiini n jɩgɩ amʋ sono tɩn,
kʋ garɩ ŋwɩa kam tɩtɩ kʋ pa-nɩ.
Kʋntʋ ŋwaanɩ amʋ wʋ́ ma a ni dɩm a pa‑m zulə.
4 Amʋ ta na jɩgɩ ŋwɩa tɩn,
amʋ wʋ́ tee‑m.
Amʋ wʋ́ zǝŋi a jɩa a loori‑m.
5 Amʋ bɩcarɩ laan wʋ́ zuri,
nɩnɛɛnɩ a na nɛ wʋdi-fɔrɔ
a di a su te tɩn.
A maa wʋ́ daarɩ a leeni le
a zuli‑m dɩ wʋpolo.
6 Tɩtɩɩ nɩ, amʋ na yǝni a pəni sɩ a dɔ,
a guli nmʋ gulə mʋ maŋa maama,
yɩ a bʋŋɩ nmʋ wʋbʋŋa.
7 Kʋ zɩgɩ pulim nɩ,
nmʋ maŋɩ n yɩ amʋ zənnu mʋ.
A maa səgi n woro kʋm wʋnɩ.
Kʋntʋ ŋwaanɩ a leeni le dɩ wʋpolo.
8 Amʋ wʋ́ taa salɩ‑m mʋ,
sɩ n ma n jazɩm dɩm
n ma n təli-nɩ.
9 Balʋ dwi maama na beeri
sɩ ba gʋ-nɩ tɩn,
nmʋ wʋ́ cɔgɩ.
Bantʋ wʋ́ tɩ ba vu tɩga kuri kuri
ba daarɩ amʋ.
10 Jar-kərə wʋ́ ma sʋ-lwaanʋ mʋ
ba gʋ-ba.
Ga-kakuri maa wʋ́ ja ba yɩra yam sɩ di.
11 Wɛ ŋwaanɩ mʋ Pɛ wʋm nan
wʋ́ di ywəəni lanyɩranɩ.
Balʋ maama na yǝni ba goni ni
Wɛ yɩrɩ dɩm ŋwaanɩ tɩn wʋ́ zuli‑DƖ.
Kʋ daarɩ sɩ vwa-fɔra dwi maama niə pu.