Pa n tɩɩna taa wʋ Wɛ baŋa nɩ
Davidi dɛɛn panɩ ləŋə kantʋ.
62
Amʋ wʋ́ pɩɩnɩ mʋ a taa cəgi Wɛ sɩ DƖ zəni-nɩ,sɩ kʋ yɩ Dɩntʋ yɩranɩ mʋ
wʋ́ wanɩ-nɩ DƖ joŋi DƖ yagɩ.
2 Dɩntʋ yɩranɩ mʋ yɩ piu kʋlʋ
amʋ na salɩ kʋ yɩra nɩ tɩn.
DƖ ta maa yɩ amʋ vɩrnʋ.
DƖ kwǝri DƖ yɩ amʋ dalɩm je mʋ.
Nɔɔn-nɔɔnʋ daa bá wanɩ-nɩ o di.
3 Abam maama wʋ́ kɩ jara
dɩ nɔɔnʋ dɩdʋa taan
sɩ á vu á maŋɩ yən mʋ?
Á lagɩ sɩ á mag-o
á dɩ tɩga nɩ mʋ na?
O nan nyɩ dɩ kəbrə
kalʋ na vɩɩlɩ tɩn mʋ.
4 Á bʋbʋŋɩ dɩm maama yɩ
sɩ á vaŋ-o á dɩ tɩga nɩ mʋ,
dɩ o ya na wʋ wɛyuu nɩ te tɩn.
Á maa soe vwan fɔm yɩranɩ.
Á yǝni á ŋɔɔnɩ ni-sʋnɩ ŋwaŋa mʋ,
yɩ á wʋbʋŋa maama yɩ
sɩ á sɔɔlɩ lwarɩm á pa‑o.
5 Cɩga tɩn, amʋ wʋ́ pɩɩnɩ mʋ
a taa cəgi Wɛ sɩ DƖ zəni-nɩ.
Dɩntʋ yɩranɩ mʋ jɩgɩ a tɩɩna.
6 Dɩntʋ yɩranɩ mʋ yɩ piu kʋlʋ
amʋ na salɩ kʋ yɩra nɩ tɩn.
DƖ ta maa yɩ amʋ vɩrnʋ.
DƖ kwǝri o yɩ amʋ dalɩm je mʋ.
Nɔɔn-nɔɔnʋ daa bá wanɩ-nɩ o di.
7 Kʋ yɩ Wɛ mʋ pɛ a na vrɩm
dɩdaanɩ zulə.
DƖ maa yɩ pu-kamunu kʋlʋ
amʋ na dalɩ da
pa a səgi DƖ woro wʋnɩ tɩn.
8 A nɔɔna bam, kɩ-na á wʋ-dɩdʋa
dɩdaanɩ Wɛ maŋa maama wʋnɩ.
Pa-na sɩ DƖ lwarɩ kʋlʋ maama
na daanɩ á wʋbʋŋa tɩn.
Wɛ mʋ yɩ dɩ́ dalɩm je.
9 Nabiinǝ maama yɩ viu yɩranɩ mʋ,
nabwənə dɩ dɩdɛɛra maama dɩ.
Nmʋ ya na kwe-ba
n maŋɩ ba duuni,
n wʋ́ na nɩ ba ba jɩgɩ yuu.
Ba nan nyɩ dɩ weeru tɩlʋ
viu na kalɩ kʋ ja je tɩn mʋ.a
10 Yɩ ma n dam n pini nɔɔna.
Ta yɩ ta n jɩgɩ tɩɩra dɩ wǝǝnu tɩlʋ
n na vrɩ n donnǝ tee nɩ tɩn.
Nmʋ jɩjɩgɩrʋ tɩm na puli
pa tɩ daga te maama,
ta n ye sɩ n yɩ kwe n bɩcarɩ
n fǝri tɩ baŋa nɩ.b
11 Amʋ ni cɩga kuni bɩle
Wɛ tee nɩ.
Dayigə tu mʋ yɩ nɩ: Wɛ jɩgɩ dam.
Kʋlʋ na wǝli da kʋ kɩ bɩle tɩn
maa yɩ nɩ:
12 Nmʋ Baŋa-Wɛ jɩgɩ nabiinǝ sono cɩga cɩga.
Nmʋ yǝni n ŋwɩ nɔɔnʋ maama mʋ
sɩ kʋ tɔgɩ dɩ o tɩtʋŋa
na yɩ te maama tɩn.