Davidi wɛ-loro
61
Amʋ Tu Wɛ,cəgi a kərə kam,
sɩ n daarɩ n sɛ a wɛ-loro kʋm.
2 A maa zɩgɩ lʋgʋ kʋm yigə yigə nɩ
yɩ a keeri a loori‑m.
Amʋ tɩɩna maama ti mʋ.
Nan da amʋ yigə sɩ n ja-nɩ
n vu n yi piu kʋlʋ
na diini wɛyuu kʋ dwe amʋ tɩn,
sɩ a na jǝŋǝ je dáanɩ.
3 Bɛŋwaanɩ, nmʋ mʋ yɩ wʋlʋ
a na səgi n woro wʋnɩ tɩn.
N ma n yɩ a dalɩm je na kwəli-nɩ
pa a dʋna warɩ sɩ ba yi-nɩ tɩn.
4 Sɛ sɩ amʋ taa zʋʋrɩ n sɔŋɔ kʋm nɩ
maŋa maama,
sɩ a wanɩ a səgi n woro kʋm wʋnɩ,
nɩ nmʋ na yarɩgɩ n vwana
n kwəli-nɩ te tɩn.
5 Bɛŋwaanɩ, amʋ Tu Wɛ,
nmʋ maŋɩ n ni a na dugi durə
te maama tɩn.
N ta ma pa a na nyɔɔrɩ
nɩ kʋ na maŋɩ sɩ n pa
balʋ na kwarɩ-m tɩn.
6 Pa Pɛ wʋm taa jɩgɩ mʋmwɛ-dɛɛrɩ.
Sɛ sɩ o taa ŋwɩ taan
sɩ o na dwi zanzan.
7 Wɛ, pa cwǝŋǝ
sɩ o jǝni o paarɩ dɩm nɩ taan
yɩ n nii o baŋa nɩ.
Nmʋ na zɩgɩ n cɩga wʋnɩ tɩn,
pa n sono kʋm taa cʋ-o
maŋa maama.
8 Kʋntʋ tɩn, amʋ wʋ́ taa leeni
a zuli n yɩrɩ dɩm
yɩ a bá yagɩ.
Dɛ maama wʋnɩ, a ta wʋ́ taa kɩ
a sui kʋlʋ maama
a na dugi durə nɩ a wʋ́ kɩ tɩn.