Wɛ yɩranɩ wʋ́ wanɩ dɩ́ dʋna DƖ di
Davidi dɛɛn panɩ ləŋə kantʋ maŋa kalʋ o na kɩ najara dɩ Siiri tiinə badonnǝ, yɩ o jar-kərə bam yigə tu Zoabɩ pipiri o zaŋɩ Edɔm jar-kərə mʋrrʋ fugǝ-tɩle (12,000) baŋa nɩ o gʋ-ba Yɛ bolo kʋm nɩ tɩn.a
60
Dɩbam Tu Wɛ,n nuŋi dɩbam kwaga nɩ,
yɩ n daarɩ n cɔgɩ dɩ́ dam.
N banɩ ya mʋ zaŋɩ
dɩbam baŋa nɩ.
Laan nan pa dɩ́ dam joori
dɩ taa wʋra.
2 Nmʋ mʋ sugi dɩbam tɩga kam
pa ka sisiŋi,
yɩ n daarɩ n pa ka bɔkɩ bɩle.
Nan joori n sɩɩrɩ ka lulooru tɩm,
sɩ tɩga kam daa yɩ taa sisiŋi.
3 Nmʋ pɛ cam yi dɩbam
balʋ na yɩ n nɔɔna bam tɩn,
pa kʋ ni dɩbam zanzan.
Kʋ nyɩ nɩnɛɛnɩ n na pɛ dɩbam sana pa dɩ́ nyɔ
yɩ dɩ́ laan bəri te tɩn.
4 Kʋ nan na yɩ balʋ na kwarɩ nmʋ tɩn,
n zǝŋi nyɩnyʋgʋ woŋo mʋ n pa-ba,
sɩ ba wanɩ ba duri ba vu da
sɩ najara yam yɩ yi-ba.
5 Popo, ləri dɩ́ wɛ-loro kʋm.
Kwe n dam-fɔrɔ kʋm
n ma n joŋi dɩbam n yagɩ.
Kʋntʋ tɩn, n nɔn-sonnu tɩm
wʋ́ taa te ba tɩtɩ.
6 Wɛ zɩgɩ DƖ tɩtɩ digə kam nɩ mʋ DƖ wɩ:
«Amʋ wʋ́ brɩ a dam jaja
a cɛ cɛ Sishɛm laŋa kam,
yɩ a daarɩ a maŋɩ Sukɔtɩ bolo kʋm
a pɔɔrɩ a pa a nɔɔna bam.
7 Galadɩ laŋa kam yɩ amʋ nyɩm,
kʋ ta wǝli dɩ Manasɩ laŋa kam dɩ.
Efrayim maa nyɩ dɩ
a yicəgə kam.
Zuda dɩ maa nyɩ dɩ
a paarɩ nacəgə kam.
8 Kʋ na yɩ Moabɩ laŋa kam,
daanɩ mʋ a lagɩ a taa sanɩ
a jɩn sɩm.
A ta lagɩ a dʋlɩ a natrɩ
Edɔm tɩʋ kʋm seeni mʋ,
sɩ kʋ brɩ nɩ a te-kʋ.
A kwǝrǝ maa wʋ́ bagɩ ka yagɩ
Filisi tiinə bam seeni,
a na wanɩ-ba a di tɩn ŋwaanɩ.»
9 Wɔɔ nan mʋ wʋ́ ja amʋ o vu
tɩʋ kʋlʋ na lɔgɩ kʋ pɩ tɩn wʋnɩ?
Wɔɔ mʋ wʋ́ ja-nɩ o vu
o yi Edɔm tɩʋ kʋm?
10 Dɩbam Tu Wɛ, nmʋ nan nuŋi
dɩ́ kwaga nɩ mʋ na?
Dɩ́ na nuŋi sɩ dɩ́ zaŋɩ najara,
n daa n bá tɔgɩ dɩ́ yigə
sɩ dɩ́ vu na?
11 Nan wǝli dɩbam
sɩ dɩ́ wanɩ dɩ́ dʋna bam,
sɩ nabiinǝ na jɩgɩ zǝnǝ dɩlʋ tɩn maama ba jɩgɩ kuri.
12 Wɛ nan na wʋ dɩbam tee nɩ,
dɩ́ wʋ́ wanɩ dɩ́ dʋna bam dɩ́ di.
Dɩntʋ wʋ́ nɔnɩ-ba DƖ cʋcʋgɩ
DƖ pa dɩbam.b