Wɛ-loro
Davidi dɛɛn panɩ ləŋə kantʋ maŋa kalʋ Pɛ Sooli na tʋŋɩ nɔɔna sɩ ba yɩrɩ Davidi sɔŋɔ kʋm, sɩ ba daarɩ ba gʋ-o tɩn.a
59
Amʋ Tu Wɛ, joŋi-nɩa dʋna bam jɩŋa nɩ n yagɩ!
Ta n cʋ-nɩ,
sɩ balʋ na zɩgɩ amʋ zɩga tɩn
yɩ wanɩ-nɩ.
2 Joŋi-nɩ balʋ na tʋŋɩ lwarɩm tɩn
jɩŋa nɩ,
dɩdaanɩ nɔn-gʋra dɩ jɩŋa nɩ.
3 Nii mʋ! Ba dalɩ gugwəəru wʋnɩ mʋ ba cǝgǝ,
sɩ ba laan nuŋi ba zi-nɩ ba gʋ.
Vɩɩna bam kʋntʋ bʋŋɩ
sɩ ba kɩ-nɩ zʋnnɩ mʋ.
Baŋa-Wɛ, kʋ nan daɩ nɩ
a kɩ woŋo a cɔgɩ ba yigə.
4 Ba ma sɩɩnɩ ba yiǝ
ba duri sɩ ba ja-nɩ,
yɩ kʋ daɩ amʋ mʋ cɔgɩ
dɩ fɩnfɩɩn dɩ.
Kʋntʋ tɩn, zaŋɩ wɛɛnɩ
sɩ n ba n zəni-nɩ.
Nii n na ba na kɩ-nɩ te tɩn.
5 Paŋwa Tu Baŋa-Wɛ,
nmʋ mʋ yɩ dɩbam Yisɩrayɛlɩ tiinə Wɛ dɩm.
Zaŋɩ wɛɛnɩ sɩ n waarɩ
dwi-gɛ tiinə bam.
Kʋ na yɩ vwa-nyɩna bam kʋntʋ
na tʋŋɩ lwarɩm tɩn,
yɩ duri ba yibwənə maŋa dɩ maŋa!
6 Tɩtɩɩ nɩ mʋ a dʋna bam yǝni
ba joori yo seeni.
Ba maa kaagɩ tɩʋ kʋm maama wʋnɩ
yɩ ba weə nɩ kakuri te tɩn.
7 Ta n cəgi ba na ŋɔɔnɩ
kamunni ŋwɛ ŋwaŋa te tɩn!
Ba ni-taanɩ dɩm yǝni
dɩ cɔgɩ nɔɔna,
nɩnɛɛnɩ sʋ-lwaanʋ na kɩ nɔɔna zʋnnɩ te tɩn.
Ba maa bʋŋɩ nɩ:
«Nɔɔn-nɔɔnʋ bá wanɩ o ni dɩ́ ŋwaŋa.»
8 Baŋa-Wɛ, nmʋ nan jɩgɩ-ba mʋ
n mwana.
N jɩgɩ dwi-gɛ tiinə bam maama
mʋ n gweelə.
9 Amʋ Tu Wɛ, nmʋ mʋ jɩgɩ dam
sɩ n kwəli-nɩ.
Amʋ wʋ́ kwǝni a nii nmʋ mʋ,
n na yɩ a dalɩm je tɩn ŋwaanɩ.
10 A Tu Wɛ dɩm wʋ́ ba
DƖ joŋi-nɩ DƖ yagɩ,
DƖ na jɩgɩ a sono maŋa maama tɩn ŋwaanɩ.
DƖ ta wʋ́ pa a wanɩ a dʋna bam
a di.
11 Dɩ́ Yuutu Wɛ, yɩ garɩ n gʋ-ba lɩla,
sɩ a nɔɔna bam garɩ ba swe
ba swiə.
Nan ma n dam-fɔrɔ kʋm
n pa ba taa beeri yɔɔ yɩranɩ,
sɩ n laan daarɩ n pa ba tʋ tɩga nɩ.
Nmʋ Wɛ yǝni n cʋ dɩbam,
nɩ najara cɩ-kwaŋa na kwǝli nɔɔna
najara wʋnɩ te tɩn mʋ.
12 Ba kamun-ŋwɛ yɩ kəm-balwaarʋ yɩranɩ mʋ.
Kʋntʋ tɩn, pa ba na jɩgɩ fiə te tɩn dɩ ba tɩga nɩ.
Ba ta yǝni ba sɔɔlɩ lwarɩm,
yɩ ba fɔɩ vwan.
13 Kʋntʋ ŋwaanɩ,
tɔgɩ n ban-lʋm dɩm baŋa
n cɔgɩ-ba fasɩ, pa ba je.
Kʋntʋ mʋ wʋ́ pa lʋgʋ baŋa
je maama nɔɔna lwarɩ nɩ:
Wɛ mʋ sɩɩnɩ DƖ nii dɩbam Zakɔbɩ dwi dɩmb baŋa nɩ.
14 Tɩtɩɩ nɩ mʋ a dʋna bam yǝni
ba joori yo seeni.
Ba maa kaagɩ tɩʋ kʋm maama wʋnɩ
yɩ ba weə nɩ kakuri te tɩn.
15 Ba maa yǝni ba kaagɩ
ba beeri wʋdiiru sɩ ba di.
Ba na wʋ di ba su,
baá taa suurə mʋ.
16 Kʋ nan na yɩ amʋ, a lagɩ a leeni
a zuli-m n dam dɩm ŋwaanɩ mʋ.
Zɩzɩŋa maama nɩ mʋ,
a ta wʋ́ leeni dɩ kwǝr-dɩa
n na jɩgɩ a sono maŋa maama tɩn ŋwaanɩ.
Bɛŋwaanɩ, nmʋ mʋ yɩ a dalɩm je
mɛ a na wʋ́ wanɩ a vu a kwǝli a tɩtɩ
a cam maŋa nɩ tɩn.
17 Amʋ Tu Wɛ, nmʋ mʋ jɩgɩ dam
sɩ n kwəli-nɩ.
A wʋ́ taa leeni le mʋ a zuli-m.
Bɛŋwaanɩ, nmʋ mʋ yɩ a dalɩm je.
Nmʋ yɩ amʋ Tu Wɛ dɩm
na jɩgɩ a sono maŋa maama tɩn.