Baŋa-Wɛ wʋ́ di nabiinǝ maama taanɩ
Davidi dɛɛn panɩ ləŋə kantʋ.
58
Abam balʋ na yɩ dɩdɛɛra tɩn,á yǝni á tɔgɩ cɩga
dɩ á na di nɔɔna taanɩ te tɩn na?
Á wʋ́ sɛ á bʋrɩ cɩga bʋra
á pa nabiinǝ na?
2 Awo! Lwarɩm kikiǝ yɩranɩ mʋ
á bʋŋɩ ya wʋbʋŋa.
Á na tʋŋɩ te tɩn paɩ wʋ-lʋŋ-tɩtʋŋa
sui tɩga kam baŋa maama.
3 Nɔn-balwaarʋ tɩm yǝni ba cɔgɩ mʋ
kʋ zɩgɩ ba lʋra maŋa nɩ.
Ba lʋgɩ-ba dɩdaanɩ ba maŋɩ
ba ywəri cwǝŋǝ wʋnɩ mʋ
yɩ ba kaagɩ ba fɔɩ vwan.
4 Ba ni-taanɩ tiini dɩ cana,
nɩ bɩsankwɩa vɩan na yɩ te tɩn mʋ.
Ba ma sɩn ba zwa sɩ ba yɩ cəgi,
nɩ kapaa dɩ na kɩ te tɩn.
5 Ka ba sɛ sɩ ka cəgi liri mwaanʋ tiinə
balʋ na kwaanɩ sɩ ba ja-ka tɩn,
dɩ ba na maŋɩ ba kɩ swan te maama.
6 Amʋ Tu Wɛ, nan bwəri
a dʋna bam yələ,
ba na nyɩ dɩ nyoŋ-pwalɩ
na lagɩ sɩ sɩ tʋrɩ-nɩ tɩn ŋwaanɩ.
Baŋa-Wɛ, guri ba yələ yam n yagɩ!
7 Pa ba wɩ nɩnɛɛnɩ na
na logi ba kɩ tɩga nɩ te tɩn.
Ba na tagɩ ba cɩna yam,
pa ya taa ba jɩgɩ ni sɩ ya zɔ.
8 Ta pa ba taa nyɩ nɩnɛɛnɩ
kunkwərə na yǝni ya kʋ
ya daarɩ ya kogolə yɩranɩ te tɩn,
sɩ ba ta taa nyɩ dɩ
bu-tʋa balʋ ba na lʋga
yɩ ba bá fɔgɩ ba na wɩa pooni tɩn.
9 Wɛ wʋ́ kɩ lɩla o saarɩ-ba o yagɩ,
ba nɔn-dʋnnʋ dɩdaanɩ
ba nankwɩn maama,
pa ba je lɩla
ba dwǝni kambiə na lʋnɩ lɩla
mim nɩ te tɩn.
10 Nɔn-ŋʋna wʋʋ wʋ́ poli
nɩnɛɛnɩ nɔn-balwaarʋ tɩm na nɛ
waarɩm dɩlʋ na maŋɩ dɩ ba tɩn.
Ba ta wʋ́ vu ba zarɩ ba nɛ
dɩ nɔn-balwaarʋ jana bam.
11 Nɔɔna laan maa wʋ́ ta ba wɩ:
«Nii-na nɔn-ŋʋna bam
na nɛ nyɔɔrɩ te tɩn.
Cɩga ŋwaanɩ tɩn, Wɛ wʋra
yɩ DƖ bʋrɩ cɩga bʋra
lʋgʋ baŋa nɩ.»