Kɩ n wʋ-dɩdʋa dɩdaanɩ Baŋa-Wɛ
Davidi dɛɛn panɩ ləŋə kantʋ maŋa kalʋ Filisi tiinə na jaan‑o Gatɩ tɩʋ wʋnɩ tɩn.a
56
Amʋ Tu Wɛ, duri amʋ ŋwaŋa.A dʋna mʋ zaŋɩ a baŋa nɩ
yɩ ba bɛɛsɩ-nɩ dɛ dɩm maama wʋnɩ.
2 Ba maa nwana a baŋa nɩ
maŋa maama,
yɩ ba zanzan mʋ brɩ ba tɩtɩ
ba jaŋɩ dɩ-nɩ.
3 Fʋʋnɩ nan na yǝni dɩ ja-nɩ,
a daa ta wʋ́ kɩ a wʋ-dɩdʋa dɩ nmʋ.b
4 A Tu Wɛ, a lagɩ a tee nmʋ,
dɩ ni dɩlʋ n na tiŋi tɩn.
A sɩɩnɩ a kɩ a wʋ-dɩdʋa dɩ Wɛ.
Kʋntʋ ŋwaanɩ a daa bá taa kwarɩ fʋʋnɩ.
Nabiinǝ daa bá wanɩ
ba kɩ amʋ kʋlʋkʋlʋ.
5 Dɛ dɩm maama wʋnɩ tɩn,
ba jɩgɩ-nɩ ba daana.
Ba wʋbʋŋa maama maa yɩ
sɩ ba kɩ-nɩ lwarɩm.
6 Ba tiŋi yi mʋ ba yɩrɩ
a na-vəli maama,
yɩ ba lagɩ cwǝŋǝ mʋ
sɩ ba ma zi-nɩ.
Ba maa tɩɩnɩ nɩ
ba wʋ́ na laŋa ba gʋ-nɩ.
7 Ba na yɔɔrɩ ba tʋŋɩ lwarɩm tɩn,
nmʋ wʋ́ pa-ba cwǝŋǝ
sɩ ba lu na?
Amʋ Tu Wɛ, nan pa n banɩ zaŋɩ
dɩ nɔɔna bam,
pa ba na cɔgɩm.
8 Kʋ na yɩ liǝ yalʋ na yǝni
ya daanɩ-nɩ tɩn,
n jeeli ya maama.
N ta ma n la a yi-na bam
n kɩ kunkwələ wʋnɩ
sɩ n lwarɩ a na keeri te maama.
N pʋpʋnɩ ya maama n tiŋi
n tɔnɔ kʋm nɩ.c
9 Dɛ dɩm a na wʋ́ bəŋi Wɛ yɩrɩ
sɩ DƖ ba DƖ zəni-nɩ tɩn,
a dʋna bam laan wʋ́ titwəni
ba joori kwaga.
Kʋntʋ maa paɩ a ye nɩ:
Wɛ mʋ zɩgɩ a kwaga nɩ.
10 A lagɩ a tee Wɛ mʋ
dɩ ni dɩlʋ DƖ na tiŋi tɩn.
Cɩga tɩn, a wʋ́ taa tee Baŋa-Wɛ
DƖ ni-taanɩ dɩm ŋwaanɩ.
11 A sɩɩnɩ a kɩ a wʋ-dɩdʋa dɩ Wɛ.
Kʋntʋ ŋwaanɩ a daa bá taa kwarɩ fʋʋnɩ.
Nabiinǝ daa bá wanɩ
ba kɩ amʋ kʋlʋkʋlʋ.d
12 Amʋ Tu Wɛ, a maŋɩ sɩ a tɔgɩ
ni dɩlʋ a na dugi dɩ nmʋ tɩn.
A maa wʋ́ ja le-kǝm pɛɛra
a ba a pa‑m.
13 Bɛŋwaanɩ, nmʋ mʋ kwəli-nɩ
pa a wʋ tɩgɩ.
N ta ma n cɩ-nɩ
pa a wʋ tʋ tɩga nɩ.
N kɩ kʋntʋ sɩ a taa waɩ a ve
Wɛ cwǝŋǝ wʋnɩ
yɩ ŋwɩa pooni wʋ a tee nɩ.