Davidi wɛ-loro
55
Amʋ Tu Wɛ,cəgi a wɛ-loro kʋm.
A na magɩ a japoori a loori n yigə nɩ tɩn,
yɩ səgi n tɩtɩ a tee nɩ.
2 Nan pa n yigə taa wʋ a wʋnɩ
sɩ n daarɩ n ləri-nɩ,
a cam dɩm na pɛ
a yɩra cɛ tɩn ŋwaanɩ.
3 A wʋbʋŋa vugimi dɩ a dʋna bam
na jɩgɩ-nɩ ba baga te tɩn.
Ba nyɩ baarɩ mʋ a baŋa nɩ
pa lɛɛrʋ tiini tɩ yi-nɩ.
Ba maa yɔɔrɩ ba culi-nɩ
dɩ ban-lʋm zanzan.
4 A wʋʋ kʋm maama cɔɔrɩ mʋ.
A maa tiini a kwarɩ fʋʋnɩ
dɩ tʋʋnɩ na lagɩ dɩ zi-nɩ lɩla te tɩn.
5 Liǝ dɩ fʋʋnɩ yɔɔrɩ ya jɩgɩ-nɩ
pa a yɩra saɩ pɔm-pɔm.
6 A maa wɩ: «Wɛ ya na pɛ
sɩ a puli vwana mʋ tɩntʋ,
a yaá jaanɩ mʋ
nɩnɛɛnɩ kunkwǝŋǝ doŋ tɩn
a vu yigə yigə sɩ a wanɩ a lu.»
7 Tɩntʋ a yaá jaanɩ a vu
a yi dáa dáa
sɩ a na jǝgǝ kagʋa yuu nɩ sɩ a sin.
8 A yaá kɩ lɩla a na səgim je
sɩ a dalɩ,
sɩ a dʋna bam vu-dɩʋ kʋntʋ
daa yɩ wanɩ-nɩ kʋ daanɩ.
9 Amʋ Yuutu Wɛ, pa vuvugə tʋ
a dʋna bam tɩtarɩ nɩ!
Ja ba bana yam n jagɩ n yagɩ!
Kikiə yalʋ a na yǝni a na
tɩʋ kʋm nɩ tɩn
mʋ yɩ nakɔɔrɩ dɩ bʋbwaka yɩranɩ.
10 Kikiə yantʋ yǝni ya kaagɩ tɩʋ kʋm
ya ve kʋ kabri sɩm baŋa nɩ
wɩa dɩ tɩtɩɩ maama nɩ.
Pu-sɩŋa dɩ lwarɩm kikiə
dɩ maa su tɩʋ kʋm wʋʋ,
11 yɩ cɔgɩm daga zanzan.
Vwa-tɩtʋŋa dɩ ganɩm yɔɔrɩ ya wʋra mʋ
kʋ yaga kam nɩ.
12 Kʋ nan daɩ a dʋnʋ mʋ jɩgɩ-nɩ
o twɩa.
Kʋ ya na yɩ kʋntʋ,
a yaá wanɩ a taa cʋ a tɩtɩ.
Kʋ ya na yɩ a dʋnʋ mʋ brɩ o tɩtɩ a baŋa nɩ,
a yaá wanɩ a lɔ‑o.
13 Sɩ kʋ yɩ nmʋ wʋlʋ na yɩ
a yuudoŋ tɩn mʋ kɩ kʋntʋ.
Nmʋ yɩ a ciloŋ-yoŋo
yɩ dɩ́ mɩ daanɩ.
14 Dɩ́ dɛɛn yǝni dɩ́ larɩ daanɩ
dɩ́ di ywəəni.
Dɩ́ maa tɔgɩ daanɩ
dɩ Wɛ kɔgɔ kʋm maama
dɩ́ beeri Wɛ digə kam nɩ.
15 Nan pa tʋʋnɩ da dɩ ja
a dʋna bam!
Pa ba vu curu lɩla ŋʋnnɩ.
Bɛŋwaanɩ, lwarɩm yɩranɩ mʋ su
ba sam dɩ ba bɩcara.
16 Amʋ nan wʋ́ keeri a loori Wɛ mʋ.
Baŋa-Wɛ wʋ́ joŋi-nɩ DƖ yagɩ.
17 Dɛ maama wʋnɩ, zɩzɩŋa dɩ wɩa,
dɩ dɩdaan-ni nɩ mʋ
a yǝni a magɩ a japoori a loori Wɛ yigə nɩ
dɩ kərə zanzan.
Wɛ dɩ ma yǝni DƖ cəgi
a wɛ-loro kʋm.
18 Nɔɔna zanzan culi-nɩ,
yɩ Wɛ liiri-nɩ DƖ ja DƖ nuŋi
najara yam wʋnɩ
sɩ a wanɩ a na yazurə.
19 Wɛ mʋ yɩ wʋlʋ na maŋɩ
DƖ di paarɩ faŋa faŋa tɩn.
Dɩntʋ nan wʋ́ sɛ a loro kʋm
yɩ DƖ daarɩ DƖ waarɩ a dʋna bam.
Bɛŋwaanɩ, bantʋ ba sɛ
sɩ ba ləni ba wʋbʋŋa.
Ba maa ba kwarɩ Wɛ.
20 Amʋ yuudoŋ wʋm zaŋɩ
o donnǝ bam baŋa nɩ.
O ma yiri ni dɩlʋ o na kɩ dɩ ba tɩn.
21 O yǝni o ŋɔɔnɩ ni-sʋnɩ ŋwaŋa
yɩ cɔgɩm wʋbʋŋa wʋ o yuu nɩ.
O ni-taanɩ swələ nɩnɛɛnɩ nugə tɩn,
yɩ dɩ maama laan za kɩ nɔɔna zʋnnɩ mʋ
nɩ sʋ-lwaanʋ na kɩ nɔɔna zʋnnɩ te tɩn.
22 Nmʋ na jɩgɩ liǝ yalʋ maama tɩn,
sɩ n kwe-ya n pa Baŋa-Wɛ,
sɩ Dɩntʋ mʋ wʋ́ pa‑m dam.
DƖ bá sɛ sɩ nɔn-ŋʋna tri
ba tʋ tɩga nɩ.
23 Amʋ Tu Wɛ, nmʋ nan wʋ́ ja
nɔn-balwaarʋ bantʋ
n dʋlɩ n yagɩ goŋo kʋlʋ
na luunə tɩn wʋnɩ
sɩ ba yɩra pɔ.
Ba na yɩ nɔn-gʋra dɩ vwa-fɔra tɩn,
n lagɩ n pa ba tɩ mʋ
yɩ ba ta yɩ nɔn-dʋnnʋ.
Amʋ tɩtɩ nan wʋ́ kwe a tɩɩna mʋ
a daŋɩ nmʋ wʋnɩ.