N bá wanɩ n gooni Baŋa-Wɛ
Davidi dɛɛn panɩ ləŋə kantʋ.
53
Nɔn-jwəəru yǝni ba tɛba bɩcarɩ nɩ ba wɩ: «Wɛ tǝrǝ.»
Ba maama yɔɔrɩ ba cɔgɩ mʋ
ga fasɩ.
Ba tɩtʋŋa dɩ maa tiini ya cɔgɩ zanzan.
Nɔɔn-nɔɔnʋ tǝrǝ ba wʋnɩ
o na tɔgɩ cwə-laa.
2 Wɛ ma zɩgɩ DƖ wɛyuu sɔŋɔ kʋm nɩ
DƖ tiiri DƖ nii nabiinǝ,
sɩ DƖ lwarɩ ba wʋlʋ jɩgɩ swan
yɩ o tɔgɩ Wɛ.
3 Ba maama ywəri Wɛ cwǝŋǝ wʋnɩ,
yɩ ba wʋbʋŋa yɔɔrɩ ya cɔgɩ mʋ
ga fasɩ.
Nɔɔn-nɔɔnʋ nan tǝrǝ ba wʋnɩ
o na tɔgɩ cwə-laa,
dɩ dɩdʋa dɩ.
4 Wo-lwaanʋ kərə bá sɛ
sɩ ba zaasɩ swan na?
Ba jɩgɩ a nɔɔna bam mʋ ba cɔga
nɩnɛɛnɩ kʋ yɩ wʋdiu mʋ ba di.
Ba nan ba bəŋi Wɛ yɩrɩ ba zuli‑DƖ.
5 Nii-ba mʋ!
Kʋlʋkʋlʋ tǝrǝ kʋ na fugi-ba,
yɩ fʋʋnɩ ta tiini dɩ jɩgɩ-ba.
Kʋ na yɩ á dʋna balʋ na tu
á baŋa nɩ tɩn,
Wɛ lagɩ DƖ cɔgɩ-ba mʋ
DƖ jagɩ ba kwi sɩm.
Á maa wʋ́ pa ba di ba cavɩɩra,
Wɛ na vɩ-ba tɩn ŋwaanɩ.
6 Amʋ nan wʋ́ loori Wɛ
sɩ DƖ zɩgɩ Siyɔn nɩ
DƖ ba DƖ vrɩ Yisɩrayɛlɩ tiinə bam.
Wɛ na sɩɩnɩ DƖ pa DƖ nɔɔna bam
joori ba zɩgɩ dɩ dam,
Yisɩrayɛlɩ tiinə na yɩ Zakɔbɩ dwi dɩm tɩn
wʋ́ taa caka dɩ wʋpolo!