Yibwənə wɛ-loro
Davidi dɛɛn panɩ ləŋə kantʋ maŋa kalʋ Wɛ nijoŋnu Natan na tu o te o bwɛ‑o o tusim dɩm ŋwaanɩ, dɩ o na kɩ kabwəŋə dɩ Bat-Seba tɩn.a
51
Amʋ Tu Wɛ,da n sono kʋm ŋwaanɩ
sɩ n duri amʋ yibwənə.
A loori‑m sɩ n saarɩ
amʋ lwarɩm n yagɩ,
nmʋ na tiini n jɩgɩ nabiinǝ ŋwaŋa tɩn ŋwaanɩ.
2 Zarɩ-nɩ sɩ a daa yɩ taa jɩgɩ tɩtʋŋ-lwaannʋ,
sɩ n daarɩ n kwɛ-nɩ
sɩ a nuŋi tusim wʋnɩ.b
3 Bɛŋwaanɩ, amʋ ye a lwarɩm dɩm ni nɩ.
Wɩa dɩ tɩtɩɩ maama wʋnɩ,
a warɩ a swe a tusim dɩm.
4 Amʋ na kɩ a cɔgɩ tɩn,
kʋ yɩ nmʋ yɩranɩ yigə nɩ mʋ.
A kɩ lwarɩm zanzan
a cɔgɩ nmʋ ni dɩm.
Nmʋ jɩgɩ cɩga dɩ nmʋ na bwe amʋ te tɩn.
Nmʋ na pɛ a tʋ dɩ a bʋra tɩn,
n ta jɩgɩ cɩga. c
5 Kʋ maŋɩ kʋ zɩgɩ a lʋra dɛ nɩ mʋ
amʋ su dɩ lwarɩm.
A nu na jaanɩ a pugə tɩn,
a maŋɩ a wʋ tusim nɩ mʋ.
6 Nmʋ nan na lagɩ kʋlʋ tɩn mʋ yɩ
sɩ nɔɔnʋ taa jɩgɩ cɩga
o bɩcarɩ nɩ,
sɩ o yɩ səgi kʋlʋkʋlʋ
nmʋ yigə nɩ.
Pa n swan yam taa sui a wʋbʋŋa
sɩ a yi pʋʋrɩ lanyɩranɩ.
7 A loori‑m sɩ n saarɩ a lwarɩm dɩm n yagɩ,
sɩ n kwɛ amʋ bɩcarɩ
sɩ a taa jɩgɩ wʋ-poŋo fasɩ.d
8 Pa-nɩ pwələ sɩ a daa joori
a ni wʋpolo taanɩ.
Nmʋ pɩɩnɩ amʋ n pa a na cɔgɩm.
Laan pa a joori a na ywəəni zanzan
a ŋwɩa wʋnɩ.
9 Daa n yɩ pa a lwarɩm taa wʋ
n yigə nɩ.
Saarɩ amʋ kǝm-balwaarʋ tɩm
n yagɩ dáa nɩ.
10 Amʋ Tu Wɛ, joori n naanɩ
bɩcarɩ dɩlʋ na yɩ lanyɩranɩ tɩn
n pa-nɩ.
Sɛ sɩ a taa jɩgɩ wʋbʋŋ-dʋʋra yalʋ
na tɔgɩ nmʋ ni tɩn.e
11 A loori‑m sɩ n yɩ zəli-nɩ
nmʋ yigə nɩ.
Nan yɩ lɩ n Joro kʋm
n daarɩ amʋ.
12 Sɛ sɩ amʋ daa joori a na ywəəni
a ŋwɩa wʋnɩ,
nmʋ na joŋi-nɩ n yagɩ tɩn ŋwaanɩ.
Wǝli-nɩ sɩ a wʋbʋŋa joori
ya taa tɔgɩ nmʋ niə yam.
13 Amʋ laan wʋ́ wanɩ
a brɩ lwarɩm-kərə
nmʋ cwə-laarʋ tɩm,
sɩ ba dɩ pipiri ba joori
ba ba nmʋ te.
14 Amʋ Tu Wɛ, nmʋ yɩ dɩlʋ
na joŋi-nɩ n yagɩ tɩn mʋ.
Yagɩ n cɛ-nɩ sɩ a yɩ maŋɩ dɩ tʋʋnɩ.
Kʋntʋ tɩn, amʋ wʋ́ ma a ni
a ma zuli nmʋ yɩrɩ,
nmʋ na jɩgɩ cɩga
yɩ n vrɩ nɔɔna tɩn ŋwaanɩ.
15 Amʋ Yuutu Wɛ, pa a ni dɩm
puri dɩ taa ŋɔɔna,
sɩ a wanɩ a leeni a səni-m.
16 Vara kaanɩm nan ba poli nmʋ wʋʋ,
sɩ a yaá ja tɩntʋ a ba a pa‑m.
Amʋ na jaanɩ varɩm a ba
sɩ a zwɛ a pa‑m,
nmʋ bá sɛ n joŋi.
17 Amʋ Tu Wɛ,
kʋlʋ yɩranɩ nmʋ na lagɩ
sɩ nɔɔnʋ kwe o pa‑m tɩn
mʋ yɩ bɩcarɩ dɩlʋ
na ba jɩgɩ fiə tɩn.
Wʋlʋ na tu o tɩtɩ nmʋ yigə nɩ,
yɩ o na culi o kǝm-balwaarʋ tɩm,
nmʋ bá vɩn kʋ tu.f
18 A loori‑m,
nmʋ tɩtɩ lanyɩranɩ dɩm ŋwaanɩ,
sɩ n wǝli Siyɔn tɩʋ kʋm.
Pa Zeruzalɛm kabri sɩm joori
sɩ lɔ sɩ zɩgɩ wɛɛnɩ dɩ dam.
19 Kʋntʋ na kɩa, dɩ́ wʋ́ joori
dɩ́ ja vara dɩ́ zwɛ dɩ́ pa‑m,
pa kʋ brɩ kaanɩm dɩlʋ
na tɔgɩ cwǝŋǝ cɩga cɩga
yɩ dɩ poli nmʋ wʋ tɩn.
Dɩ́ wʋ́ ja nabɛ dɩ́ ba dɩ́ kaanɩ
nmʋ bimbim dɩm baŋa nɩ.