Wɛ wʋ́ di nɔɔna taanɩ
Aza dɛɛn panɩ ləŋə kantʋ.
50
Dam-fɔrɔ Tu Baŋa-Wɛ dɩmmʋ dwanɩ DƖ kwǝrǝ.
DƖ ma bəŋi nabiinǝ balʋ maama
na wʋ tɩga kam baŋa nɩ
kʋ zɩgɩ wa-puli seeni sɩ kʋ vu
kʋ yi wa-zʋʋrɩ seeni tɩn.
2 Siyɔn mʋ yɩ tɩʋ kʋlʋ na lamma
kʋ dwe tɩɩnɩ maama tɩn.
Wɛ maa zɩgɩ daanɩ mʋ
DƖ nyɩɩnɩ pooni sɩ dɩ nuŋi.
3 Dɩ́ Tu Wɛ dɩm mʋ titwəni
DƖ maa bɩɩna.
DƖ nan za ba ve cɩmm yoo!
Min-vʋgʋ wʋ DƖ yigə nɩ mʋ
kʋ di wǝǝnu maama bugi-bugi.
Vu-dɩʋ dɩ maa gilimi‑DƖ
kʋ kɩ tɩtarɩ nɩ.
4 DƖ ma bəŋi wɛyuu dɩ tɩga baŋa
sɩ tɩ ba tɩ nii,
sɩ DƖ laan di DƖ nɔɔna bam taanɩ.
5 DƖ ma ta DƖ wɩ: «Bəŋi-na
balʋ na kɩ ba cɩga dɩ amʋ tɩn
sɩ ba ba ba jeeri amʋ yigə nɩ.
Bantʋ yɩ balʋ na kɩ kaanɩm ba pa-nɩ
pa dɩ́ goni ni daanɩ tɩn mʋ.»
6 Wɛyuu kʋm tɩtɩ tɔɔlɩ
Wɛ cɩga kam taanɩ.
Wɛ mʋ lagɩ DƖ bʋrɩ nabiinǝ bʋra!
Wɛ tagɩ DƖ wɩ:
7 «Amʋ nɔɔna Yisɩrayɛlɩ tiinə bam,
cəgi-na!
A lagɩ a ŋɔɔnɩ a brɩ nɩ
á kɩ á cɔgɩ mʋ.
Amʋ nan mʋ yɩ Wɛ cɩga cɩga.
A maa yɩ abam Wɛ dɩm.
8 Amʋ na bwɛ abam kʋntʋ tɩn,
kʋ daɩ á na yǝni á kɩ kaanɩm
á pa-nɩ,
naa á zwɛ pɛɛra maŋa maama
á pa-nɩ te tɩn ŋwaanɩ.
9 Kʋ nan daɩ sɩ a joŋi nabɛ sɩlʋ
na wʋ á nabwǝǝru wʋnɩ tɩn,
dɩ bʋbwaalʋ tɩlʋ
na wʋ á bʋn-turu wʋnɩ tɩn.
10 Bɛŋwaanɩ, kagʋa wʋ vara bam maama yɩ amʋ nyɩm mʋ.
Amʋ mʋ te naanɩ dɩlʋ maama
na wʋ pweeru mʋrʋ yuu nɩ tɩn.
11 Zunə balʋ maama
na jaanɩ wɛɛnɩ tɩn mʋ
amʋ nii ba baŋa nɩ.
Amʋ daa ta mʋ te
ga-vara maama dɩ.
12 Nɩnɛɛnɩ kana mʋ ya na jɩgɩ-nɩ,
a ya bá ta a brɩ abam,
lʋgʋ baŋa
dɩ kʋ wʋ wǝǝnu tɩm maama
na yɩ amʋ nyɩm tɩn ŋwaanɩ.
13 Kʋ na yɩ nabɛ, amʋ mʋ di sɩ nwana na?
Amʋ wʋ́ nyɔ bʋbwaalʋ jana na?
14 Nan pa-na sɩ pɛɛrɩ dɩlʋ
á na wʋ́ kwe á kaanɩ á pa-nɩ tɩn
taa yɩ le-kǝm.a
Tɔgɩ-na ni dɩlʋ á na goni ni dɩ amʋ tɩn,
amʋ na yɩ Yuutu Baŋa-Wɛ dɩm tɩn ŋwaanɩ.
15 Cam na yi abam,
loori-na zǝnǝ amʋ tee nɩ,
sɩ a laan wʋ́ joŋi abam a yagɩ.
Kʋntʋ tɩn, á wʋ́ zuli-nɩ
nɩ kʋ na maŋɩ sɩ á kɩ te tɩn.»
16 Wɛ ma ta dɩ nɔn-balwaarʋ tɩm DƖ wɩ:
«Abam ba jɩgɩ cwǝŋǝ sɩ á tɔgɩ
á ŋɔɔnɩ amʋ niə yam taanɩ.
Bɛɛ mʋ yɩ á brɩ nɩ á sɛ
amʋ ni-gonim dɩm?
17 Bɛŋwaanɩ, á wʋ sɛ sɩ a kʋrɩsɩ abam
a dɩ cwǝŋǝ nɩ.
Á ta ma daarɩ á vɩn a zaasɩm dɩm mʋ.
18 Abam na nɛ ŋwɩɩnʋ,
o kikiə mʋ su á yi.
Á maa mɩ dɩ balʋ
na tɔgɩ boorim kikiə tɩn.
19 Á sɛ sɩ á ni-taanɩ taa paɩ
lwarɩm mʋ pulǝ.
Á kaagɩ á ŋɔɔnɩ vwan yɩranɩ mʋ.
20 Á yǝni á ba bɩbara á paɩ á cʋrʋ.
Á maa ŋɔɔnɩ á cɔgɩ o yigə
dɩ o na maŋɩ o yɩ á nu-pugə bu mʋ dɩ.
21 Abam na tʋŋɩ kǝm-balwaarʋ tɩntʋ maama tɩn,
a cɩm mʋ.
Abam ga bʋŋɩ nɩ amʋ dɩ abam maama yɩ bɩdwɩ mʋ.
Amʋ laan nan wʋ́ zaŋɩ a bwɛ abam,
sɩ á lwarɩ jaja nɩ á cɔgɩ mʋ.
22 Abam balʋ yigə na tǝri amʋ wʋnɩ tɩn,
taá ye-na amʋ taanɩ dɩm ni nɩ!
Á na wʋ ləni á wʋʋ,
amʋ wʋ́ zaŋɩ á baŋa nɩ
a kaarɩ abam a yagɩ,
yɩ nɔɔn-nɔɔnʋ tǝrǝ
sɩ o joŋi abam o yagɩ.
23 Wʋlʋ nan na kɩ le-kǝm pɛɛrɩ
o pa-nɩ,
kʋ tu zuli-nɩ cɩga cɩga mʋ.
Kʋ na yɩ balʋ maama na sɩɩnɩ ba yiǝ ba tɔgɩ cwǝŋǝ tɩn,
amʋ Wɛ wʋ́ pa ba na amʋ vrɩm dɩm.»