Jɩjɩgɩrʋ taanɩ
Kʋra bu-baara dɛɛn panɩ ləŋə kantʋ.
49
Lʋgʋ baŋa dwi tiinə maama,cəgi-na!
Abam balʋ maama na zʋʋrɩ
tɩga baŋa nɩ tɩn
pʋrɩ-na á zwa!
2 Abam maama cəgi-na,
kʋ na maŋɩ kʋ yɩ dɩdɛɛra
dɩ nabwənə dɩ,
kʋ ta wǝli dɩ nadunə
dɩ yinigə tiinə maama.
3 Amʋ ni-taanɩ wʋ́ brɩ swan lanyɩranɩ.
A bʋbʋŋ-ŋʋna yam dɩ wʋ́ pa
sɩ nɔɔna yi pʋʋrɩ.
4 Amʋ wʋ́ kwaanɩ a zaasɩ dɩndɩ.
A ta wʋ́ daarɩ a ta kɔnɔ
yɩ a leeni a maŋɩ sɩ kuri
a brɩ nɔɔna.
5 Lɛɛrʋ na tʋ a baŋa nɩ,
a nan bá taa kwarɩ fʋʋnɩ,
nɩnɛɛnɩ kampin-nyɩna na gilimi-nɩ ba kɩ tɩtarɩ nɩ.
6 Bantʋ kɩ ba cɩga dɩdaanɩ
ba jɩjɩgɩrʋ mʋ,
yɩ ba jɩgɩ tɩɩra dɩ ba na yɩ nadunə tɩn.
7 Nɔɔn-nɔɔnʋ bá wanɩ o ŋwɩ
o doŋ jɩnɩ
sɩ o joŋi kʋ tu ŋwɩa.
N bá wanɩ n ŋwɩ
n ŋwɩa kam kwǝrǝ n pa Wɛ.
8 Nabiinu ŋwɩa tiini ka jɩgɩ kuri.
N bá wanɩ n ŋwɩ
sɩ kʋ yi ka kwǝrǝ kʋ ti.
9 Kʋntʋ tɩn, nabiinu bá taa ŋwɩ taan wuu
sɩ o yɩra daa yɩ pɔ tɩga kuri nɩ.
10 Nmʋ wʋ́ maanɩ nɩ nɔɔna maama tʋa,
kʋ na maŋɩ kʋ yɩ yi-pʋrɩ-nyɩna,
dɩ nɔn-jwəəru, dɩ nayəri-nyɩna dɩ.
Ba maama wʋ́ tɩ
yɩ ba daarɩ ba jɩjɩgɩrʋ ba yagɩ
ba pa nɔɔna badonnǝ mʋ.
11 Ba yibeelǝ laan maa wʋ́ ji ba sam
mɛ ba na wʋ́ taa zʋʋrɩ taan wuu tɩn.
Ba ta wʋ́ maŋɩ da
sɩ kʋ taa ve wuu,
dɩ ba dɛɛn na jɩgɩ ba tɩtɩ tɩga
te maama tɩn dɩ.
12 Nabiinu na maŋɩ o jɩgɩ nɩnwaŋa
te maama dɩ,
o bá maŋɩ tɩga baŋa nɩ taan wuu.
Nabiinǝ dɩ vara maama
guri bɩdwɩ mʋ.
13 Tɩntʋ mʋ jwəəru tɩlʋ na bʋŋɩ
ba tɩtɩ kamunni tɩn wʋ́ guri,
kʋ ta wǝli dɩ balʋ maama
na tɔgɩ bantʋ cwe sɩm tɩn.a
14 Bantʋ maama lagɩ ba tɩ mʋ,
nɩ peeni te tɩn.
Tʋʋnɩ wʋ́ ja-ba
dɩ kalɩ dɩ ja vu curu.
Tɩga na pʋʋrɩ, nɔn-ŋʋna wʋ́ di dam ba baŋa nɩ.
Ba yɩra maa wʋ́ pɔ tɩga kuri nɩ.
Ba daa bá taa jɩgɩ ba tɩtɩ sam
sɩ ba taa zʋʋrɩ dɩ wʋnɩ.
15 Wɛ nan mʋ wʋ́ vrɩ amʋ
tʋʋnɩ jɩŋa nɩ.
DƖ wʋ́ vaŋɩ-nɩ sɩ a taa wʋ DƖ tee nɩ.
16 Nɔɔnʋ na yɔɔrɩ o ji nadum
pa o di paarɩ o sɔŋɔ nɩ,
yɩ pa kʋ taa daanɩ‑m.
17 Bɛŋwaanɩ, kʋ tu na tɩga,
o bá wanɩ o ja kʋlʋkʋlʋ
o wǝli da o kɛ.
O jɩjɩgɩrʋ tɩm bá tɔg-o
tɩ zʋ tɩga kuri.b
18 Kʋ tu ta na ŋwɩ: oó bʋŋɩ nɩ
Wɛ yɔɔrɩ DƖ kɩ o yu-yoŋo,
nɔɔna na zul‑o
o yigə-vəŋə ŋwaanɩ tɩn.
19 Dɩ kʋntʋ maama, o dɩ lagɩ o tɩ mʋ
o vu o wǝli o nabaara bam wʋnɩ.
Dáanɩ mʋ o daa bá fɔgɩ
o na wɩa pooni dɛ dɩ dɛ.
20 Nabiinu na maŋɩ o jɩgɩ nɩnwaŋa
te maama dɩ,
yɩ o yi na wʋ pʋʋrɩ,
kʋ tu dɩ vara maama guri bɩdwɩ mʋ.