Siyɔn yɩ Wɛ tɩtɩ tɩʋ mʋ
Kʋra bu-baara dɛɛn panɩ ləŋə kantʋ.
48
Dɩbam Tu Baŋa-Wɛtiini DƖ jɩgɩ kamunni!
DƖ yɔɔrɩ DƖ maŋɩ mʋ
sɩ nɔɔna taa tee‑DƖ
DƖ tɩtɩ tɩʋ kʋm wʋnɩ.
Piu kʋlʋ DƖ na pɔɔrɩ DƖ pa DƖ tɩtɩ tɩn
baŋa nɩ mʋ kʋntʋ.
2 Piu kʋm tiini kʋ lamma mʋ
kʋ gaalɩ
dɩ kʋ na diini wɛɛnɩ te tɩn.
Lʋgʋ baŋa je maama
wʋ́ di ywəəni kʋ ŋwaanɩ.
Siyɔn piu kʋm nyɩ dɩ Zafon piu
kʋlʋ na wʋ jazɩm baŋa seeni tɩn mʋ.
Kʋ maa yɩ Pa-farʋ wʋm tɩʋ kʋm.
3 Wɛ mʋ pɛ kʋ ji dalɩm je
sɩ nɔɔna taa tui ba səgi
DƖ woro kʋm wʋnɩ.
4 Nii-na! Lʋgʋ baŋa pwa bam
kɩ ni daanɩ,
yɩ ba nuŋi sɩ ba zaŋɩ najara
dɩ Siyɔn tɩʋ kʋm.
5 Ba laan na yi da tɩn,
ba ma nii ba na kʋ na yɩ te,
yɩ kʋ sʋ-ba.
Fʋʋnɩ ma ja-ba
pa ba pipiri ba duri ba viiri.
6 Dáanɩ mʋ ba yɩra saɩ dɩ fʋʋnɩ.
Liǝ maa jɩgɩ-ba,
nɩ kaanɩ wʋlʋ na vri pugə
sɩ o lʋ tɩn.
7 Kʋ ta nyɩ dɩ nmʋ pɛ vu-dɩʋ zaŋɩ
wa-puli je nɩ kʋ ba
kʋ cɔgɩ nabwǝǝru tɩlʋ na nuŋi Tarsisi nɩ pipiu ŋwaanɩ tɩn.
8 Dɩ́ ya maŋɩ dɩ́ ni
Wɛ tɩtʋŋa yam ŋwa,
sɩ lele kʋntʋ dɩ́ tɩtɩ yiǝ
laan mʋ nɛ-ya.
Dɩ́ wʋ Paŋwa Tu Baŋa-Wɛ tɩtɩ
tɩʋ kʋm nɩ.
Dɩbam Tu Wɛ dɩm tɩʋ kʋm
mʋ kʋntʋ.
Wɛ wʋ́ pa kʋ zɩgɩm taa dana
sɩ kʋ taa ve maŋa kalʋ na ba ti tɩn.
9 Dɩbam Tu Wɛ, dɩ́ tu dɩ́ zɩgɩ
nmʋ digə kam nɩ,
yɩ dɩ́ bʋŋɩ n sono cɩga cɩga kʋm wʋbʋŋa.
10 N yɩrɩ dɩm na zaŋɩ wɛɛnɩ te tɩn,
kʋntʋ doŋ mʋ nɔɔna wʋ́ taa tee‑m lʋgʋ baŋa je maama nɩ.
Nmʋ jazɩm dɩm jɩgɩ dam,
yɩ n pa cɩga wʋra
je maama nɩ.
11 Kʋntʋ ŋwaanɩ Siyɔn tiinə bam
wʋʋ poli zanzan.
Zuda tɩɩnɩ dɩm dɩ maa jɩgɩ wʋpolo,
nmʋ na bʋrɩ cɩga bʋra tɩn ŋwaanɩ.
12 Zaŋɩ-na á kaagɩ Siyɔn tɩʋ kʋm,
sɩ á nii kʋ na yɩ te tɩn.
Jeeli-na kʋ di-dɩdwaarʋ tɩm ni.
13 Ta maanɩ-na kabri sɩlʋ
na lɔgɩ sɩ pɩ tɩʋ kʋm tɩn ni nɩ,
sɩ á daarɩ á nii kʋ dalɩm je sɩm
na dana te tɩn.
Kʋntʋ, á wʋ́ wanɩ á maŋɩ á brɩ
dwi dɩlʋ na wʋ kwaga nɩ tɩn
yɩ á wɩ:
14 Dɩbam Tu Wɛ dɩm mʋ tɩntʋ.
DƖ wʋ́ taa nii dɩ́ baŋa nɩ maŋa maama
sɩ kʋ vu kʋ yi kweelim maŋa kam.a