Wɛ-loro
Kʋra bu-baara dɛɛn panɩ ləŋə kantʋ.
44
Dɩbam Tu Wɛ, dɩ́ niwo-kamunnu tɩlʋ n na kɩ
n pa dɩ́ nabaara bam faŋa faŋa tɩn ŋwa.
Ba tagɩ tɩ taanɩ ba brɩ dɩbam
yɩ dɩ́ fɔgɩ dɩ́ cəgi.
2 Nmʋ tɩtɩ mʋ zəli dwi-gɛ tiinə bam
yɩ n daarɩ n kwe dɩ́ nabaara bam
n jǝni ba tɩga kam baŋa nɩ.
Nmʋ yɔɔrɩ n cɔgɩ
dwi-gɛ tiinə bam mʋ,
yɩ n pa n tɩtɩ nɔɔna bam
zʋʋrɩ da dɩ yazurə.
3 Ba dɛɛn na wanɩ tɩga kam maama ba te tɩn,
kʋ daɩ ba jara-kǝm zɩla
dam ŋwaanɩ mʋ
naa ba tɩtɩ dam ŋwaanɩ.
Kʋ nan yɩ nmʋ dam-fɔrɔ kʋm ŋwaanɩ.a
Nmʋ lanyɩranɩ dɩm ma kwǝli-ba,
n yi na pagɩ ba baŋa nɩ tɩn ŋwaanɩ.
4 Nmʋ mʋ yɩ amʋ Pɛ,
yɩ n ta yɩ a Wɛ dɩm.
Nan pa n nɔɔna
Zakɔbɩ dwi tiinə bam di wɔnɔ!
5 Dɩ́ wʋ́ da nmʋ dam dɩm ŋwaanɩ
dɩ́ yigi dɩ́ dʋna bam
sɩ ba joori kwaga.
Dɩ́ laan maa wʋ́ nɔnɩ-ba
dɩ́ sɩn tɩga nɩ.
6 Amʋ bá kwe a tɩɩna a daŋɩ
a taŋa naa a sʋ-lɔŋɔ baŋa nɩ.
Tɩntʋ bá wanɩ-nɩ tɩ joŋi tɩ yagɩ.
7 Kʋ nan yɩ nmʋ mʋ joŋi dɩbam
n yagɩ dɩ́ dʋna bam jɩŋa nɩ.
Nmʋ ta paɩ balʋ maama
na culi dɩbam tɩn
naɩ ba lɛɛrʋ mʋ.
8 Dɛ maama wʋnɩ dɩ́ yǝni
dɩ́ jɩgɩ wʋpolo Wɛ ŋwaanɩ.
Dɩ́ wʋ́ taa tee DƖ yɩrɩ mʋ maŋa maama.
9 Lele kʋntʋ nan nmʋ mɛ n kwaga mʋ n ya dɩbam,
pa dɩ́ di dɩ́ cavɩɩra.
Dɩ́ laan na nuŋi sɩ dɩ́ zaŋɩ najara
nmʋ daa n ba tɔgɩ
dɩ́ jar-kərə bam yigə n veǝ.
10 Nmʋ ma n pa dɩ́ duri
dɩ́ dʋna bam yigə nɩ,
pa ba dɩ ba ba vrɩ dɩ́ jɩjɩgɩrʋ.
11 N yagɩ dɩbam mʋ sɩ ba zaŋɩ
dɩ́ baŋa nɩ
yɩ ba daarɩ ba gʋ dɩbam
nɩnɛɛnɩ dɩ́ yɩ peeni mʋ tɩn.
N ma n jagɩ dɩbam balʋ na daarɩ tɩn
n yagɩ sa-tɩɩnɩ wʋnɩ.
12 Nmʋ yɔɔrɩ n kwe
n tɩtɩ nɔɔna bam mʋ
n yəgi zaanɩ n pa ba dʋna bam.
N wʋ pɛ ba jɩgɩ yuu ba pa‑m.
13 Nmʋ pɛ dwi-gɛ tiinə
balʋ na gilimi dɩbam tɩn
jɩgɩ dɩbam mʋ ba mwana,
yɩ ba ta yáalɩ dɩbam.
14 Lʋgʋ baŋa dwi tiinə bam
maa paɩ dɩ́ yɩ sinsərə woŋo mʋ.
Ba maa dʋlɩ ba yum
ba twɩ dɩbam.
15 Dɛ dɩm maama wʋnɩ
cavɩɩra mʋ di-nɩ.
A maa naɩ a lɛɛrʋ maŋa maama.
16 Bɛŋwaanɩ, dɩ́ dʋna bam yɔɔrɩ
ba twɩ dɩbam mʋ,
yɩ ba jɩgɩ dɩbam ba goonə.
17 Dɩbam nan wʋ vɩn nmʋ,
naa dɩ́ joori ni dɩlʋ nmʋ na goni dɩ dɩbam tɩn kwaga nɩ.
Dɩ kʋ dɩ, n ta pɛ dɩ́ na
lɛɛrʋ tɩntʋ maama.
18 Dɩ́ wʋ lɔgɩ nmʋ kwaga nɩ.
Dɩ́ maa wʋ ywəri
nmʋ cwǝŋǝ kam wʋnɩ.
19 Nmʋ nan yɔɔrɩ
n cɩcʋgɩ dɩbam mʋ,
pa ga-kakuri gilimi dɩbam
sɩ sɩ di.
Nmʋ ta pɛ lim mʋ ba
dɩ kwǝli dɩbam.
20 Dɩbam nan ya na nuŋi
dɩ́ Wɛ dɩm kwaga nɩ,
yɩ dɩ́ daarɩ dɩ́ pipiri dɩ́ zuli wa-gaa,
21 Wɛ tɩtɩ ya bá lwarɩ kʋ ni nɩ na?
Bɛŋwaanɩ DƖ maŋɩ o ye dɩ́ wʋbʋŋa
wo-sisəgiru tɩm maama.
22 Dɩ́ na yɩ DƖ nɔɔna tɩn mʋ
paɩ dɩ́ da tʋʋnɩ te dɩ́ kɛ
dɛ maama wʋnɩ.
Ba kwe dɩbam ba ma ji peeni sɩlʋ
ba na lagɩ ba gʋ tɩn mʋ.b
23 Baŋa-Wɛ, zaŋɩ wɛɛnɩ!
N ta dɔ mʋ na?
Zaŋɩ n ba n zǝni dɩbam!
Yɩ ma n kwaga n ya dɩbam
taan wuu.
24 Bɛɛ mʋ yɩ n kɩ n yigə dáa dáa?
Bɛŋwaanɩ mʋ n yigə tǝri dɩ́ cam
dɩ dɩ́ yaara yam wʋnɩ?
25 Dɩbam yɔɔrɩ dɩ́ tʋ tɩga nɩ mʋ
buri buri.
Dɩ́ yɩra yam maama taagɩ
dɩ kasʋlʋ mʋ.
26 Kʋntʋ tɩn, zaŋɩ wɛɛnɩ n ba
n zǝni dɩbam!
Joŋi dɩbam n yagɩ,
nmʋ na yɔɔrɩ n jɩgɩ dɩbam sono tɩn ŋwaanɩ.