Le Tɔnɔ 2
Le 42-72
Amʋ tiini a lagɩ sɩ a taa wʋ Wɛ tee nɩ
Kʋra bu-baara dɛɛn panɩ ləŋə kantʋ.
42
Amʋ Tu Wɛ,nmʋ fra tiini ya zʋ amʋ,
nɩnɛɛnɩ na-nyɔm na jɩgɩ fərə
yɩ ka beeri na-zurə
sɩ ka nyɔ te tɩn.a
2 Ŋwɩa Tu Baŋa-Wɛ,
amʋ tiini a lagɩ‑m
nɩ na-nyɔm na jɩgɩ-nɩ te tɩn.b
Maŋa kɔɔ mʋ amʋ wʋ́ na cwǝŋǝ
sɩ a ba nmʋ te
a zɩgɩ nmʋ yigə nɩ a zuli‑m?
3 Wɩa dɩ tɩtɩɩ maama a yǝni
a keeri zanzan a kanɩ yi-na,
yɩ yi-na bantʋ yɩranɩ mʋ
yɩ a ni-wʋdiu.
Balʋ na culi amʋ tɩn tɛ ba wɩ:
«N Wɛ dɩm nan bɛ?»
4 Amʋ na yǝni a guli
kʋ dɛɛn na yɩ te tɩn,
a wʋʋ mʋ tiini kʋ cɔgɩ.
Kantʋ maŋa kam nɩ, amʋ mʋ
tɔgɩ nɔn-kɔgɔ kʋm yigə
yɩ dɩ́ vu nmʋ digə kam
sɩ dɩ́ zuli‑m.
Dɩ́ na maa ve tɩn,
dɩ́ bagɩ dɩdaanɩ ywəəni
yɩ dɩ́ kɔgɔ kʋm maama leeni le
dɩ́ ma zuli nmʋ yɩrɩ.
5 Amʋ bwe a tɩtɩ wʋnɩ a wɩ:
«Bɛɛ mʋ pɛ a yigə nywanɩ?
Bɛɛ mʋ yɩ a wʋʋ tiini kʋ cɔgɩ?»c
A nan wʋ́ pa a tɩɩna
taa wʋ Wɛ tee nɩ mʋ!
A daa ta wʋ́ taa tee‑DƖ,
Dɩntʋ na yɩ amʋ Wɛ
yɩ DƖ joŋi-nɩ DƖ yagɩ tɩn ŋwaanɩ.
6 Cɩga tɩn, amʋ wʋʋ tiini kʋ cɔgɩ.
Amʋ nan wʋ́ guli nmʋ gulə dɩ n lanyɩranɩ dɩm na yɩ te tɩn.
A maa wʋ yo seeni,
Hɛrmɔn dɩdaanɩ Mizari
pweeru tɩm laŋa nɩ
mɛ Zʋrdɛn bugə kam na buli da tɩn.
7 A na wʋra tɩn, a ni bwi sɩm
na cuuri tɩga nɩ sɩ kɩ sɔɔ,
sɩ tɔgɩ amʋ baŋa
sɩ maa kɛa dɩ dam
pa a tʋ tɩga nɩ
dɩdaanɩ wʋ-cɔgɔ.
8 Dɛ maama wʋnɩ Baŋa-Wɛ paɩ
a lwarɩ nɩ DƖ sono kʋm mʋ
wʋ amʋ tee nɩ.
Tɩtɩɩ maama nɩ DƖ pa a leeni ləŋə mʋ a maa war‑DƖ,
DƖ na yɩ dɩlʋ na te a ŋwɩa kam tɩn ŋwaanɩ.
9 Amʋ wʋ́ ta dɩ Wɛ, DƖ na yɩ piu kʋlʋ amʋ na salɩ kʋ yɩra nɩ tɩn a wɩ:
«Bɛɛ mʋ yɩ nmʋ laan swe
amʋ swiə kʋntʋ?
Amʋ dʋna bam ta wʋ́ taa bɛɛsɩ-nɩ
pa a keerǝ kʋntʋ taa mʋ na?»
10 Bantʋ maa jɩgɩ-nɩ ba twɩa
yɩ ba mwana
pa a yɩra cɛ yɩ a lagɩ a tɩ.
Ba maa tɛ ba wɩ: «Nmʋ Wɛ dɩm bɛ?»
11 Amʋ bwe a tɩtɩ wʋnɩ a wɩ:
«Bɛɛ mʋ pɛ a yigə nywanɩ?
Bɛɛ mʋ yɩ a wʋʋ tiini kʋ cɔgɩ?»
A nan wʋ́ pa a tɩɩna
taa wʋ Wɛ tee nɩ mʋ!
A daa ta wʋ́ taa tee‑DƖ,
Dɩntʋ na yɩ amʋ Wɛ
yɩ DƖ joŋi-nɩ DƖ yagɩ tɩn ŋwaanɩ.