Baŋa-Wɛ, duri amʋ yibwənə!
Davidi dɛɛn panɩ ləŋə kantʋ.
41
Nɔɔnʋ wʋlʋ yigəna wʋ nabwənə wʋnɩ tɩn mʋ,
Wɛ yu-yoŋo wʋ o yuu nɩ lanyɩranɩ.
Cam na yi kʋ tu,
Baŋa-Wɛ wʋ́ joŋ-o DƖ yagɩ.
2 Baŋa-Wɛ wʋ́ cʋ-o sɩ o yɩ tɩ.
DƖ ta wʋ́ kɩ o yu-yoŋo
dɩ o na zʋʋrɩ tɩga kam nɩ te tɩn.
Wɛ bá sɛ sɩ o tʋ
o dʋna bam jɩŋa nɩ.
3 Kʋntʋ tu na ba jɩgɩ yazurǝ,
Baŋa-Wɛ wʋ́ soon-o mʋ
pa o yawɩʋ kʋm je
yɩ o joori o na yazurə.
4 Amʋ mʋ tagɩ a wɩ:
«Baŋa-Wɛ, duri amʋ yibwənə!
A tusi mʋ a cɔgɩ n yigə.
Nan ta pa a joori
a na yazurə.»
5 A dʋna bam ŋɔɔnɩ amʋ taanɩ mʋ
dɩ pu-sɩŋa ba wɩ:
«Oó daanɩ mʋ sɩ o laan tɩ
sɩ o yɩrɩ je lʋgʋ baŋa nɩ?»
6 Ba wʋnɩ dɩdʋa na tu amʋ te,
o yǝni o ŋɔɔnɩ bɩtar-yɔɔrʋ yɩranɩ mʋ.
O maa kaagɩ o beeri sawɩ-taanɩ
sɩ o ja o nuŋi
o jagɩ je maama nɩ.
7 Balʋ maama na culi-nɩ tɩn
mʋ jɩgɩ amʋ taanɩ
ba waasɩ ba brɩ daanɩ.
Ba maa bʋŋɩ lwarɩm mʋ ba pa-nɩ,
8 yɩ ba wɩ: «Kʋ yɩ yawɩ-cɛɔ mʋ
yɔɔrɩ kʋ jɩg-o.
O nan bá fɔgɩ o zaŋɩ o na yazurə.»
9 Kʋ na maŋɩ kʋ yɩ
amʋ ciloŋ-sono
a na pɛ wʋlʋ a cɩga maama
yɩ dɩ́ tɔgɩ daanɩ dɩ́ di wʋdiu tɩn,
wʋntʋ tɩtɩ dɩ mʋ joori
o zɩgɩ amʋ zɩga.a
10 Nmʋ Baŋa-Wɛ nan
duri amʋ yibwənə
sɩ n daarɩ n pa a joori
a na yazurə.
Amʋ laan wʋ́ wanɩ a joori
a ŋwɩ a jɩnɩ a dʋna bam baŋa nɩ.
11 A ye nɩ nmʋ wʋ poli dɩ amʋ,
Bɛŋwaanɩ, n wʋ pɛ a dʋna bam cwǝŋǝ
sɩ ba wanɩ amʋ ba di.
12 Nmʋ wʋ́ ta n zəni-nɩ,
a na yɔɔrɩ a tɔgɩ cɩga tɩn ŋwaanɩ.
N ta wʋ́ pa a taa zɩgɩ
n yigə nɩ maŋa maama.
13 Pa-na dɩ́ taa tee Baŋa-Wɛ dɩm
na yɩ Yisɩrayɛlɩ tiinə Wɛ tɩn!
Wʋntʋ maŋɩ dɩ tiə mʋ
kʋ zɩgɩ faŋa faŋa sɩ kʋ taa ve maŋa kalʋ na ba ti tɩn.
Amina! Amina!