Baŋa-Wɛ maŋɩ dɩ tiə
Davidi dɛɛn panɩ ləŋə kantʋ.
40
Amʋ pɩɩnɩ mʋ a cǝgǝBaŋa-Wɛ yigə nɩ.
DƖ dɩ ma pipiri DƖ nii amʋ seeni
sɩ DƖ cəgi a wɛ-loro kʋm.
2 DƖ pɛ a lɛɛrʋ tɩm ti mʋ,
nɩ DƖ na vaŋɩ-nɩ DƖ lɩ goŋo kʋlʋ
na su dɩ bwəru yɩranɩ wʋnɩ tɩn.
DƖ ma daarɩ DƖ ja a nɛ sɩm
DƖ vu DƖ zɩgɩ piu baŋa nɩ,
sɩ a wanɩ a zɩgɩ dɩ dam.a
3 DƖ ma brɩ-nɩ ləŋ-dʋŋa,
sɩ a leeni a zuli dɩ́ Tu Wɛ dɩm.
Nɔɔna zanzan wʋ́ na Baŋa-Wɛ
na tʋŋɩ te maama tɩn
pa ba taa kwarɩ-DƖ,
yɩ ba daarɩ ba kɩ ba wʋ-dɩdʋa dɩ DƖ.
4 Kʋ na yɩ balʋ na kɩ ba wʋ-dɩdʋa
dɩ Baŋa-Wɛ tɩn,
Wɛ yu-yoŋo wʋ ba yuu nɩ lanyɩranɩ.
Bantʋ wʋ kwe ba cɩga ba pa jwǝnǝ.
Ba maa wʋ gwaanɩ
dɩ balʋ na kaanɩ-ya tɩn. b
5 Dɩbam Tu Baŋa-Wɛ, nmʋ tiini n tʋŋɩ wo-kɩnkagɩla zanzan n pa dɩbam.
N ma n tɔgɩ n wʋbʋŋa ŋwaanɩ
n kɩ wo-kamunnu n wǝli dɩbam,
tɩ ni na tiini tɩ gaalɩ garɩm tɩn.
Amʋ kwaanɩ sɩ a ta tɩ maama taanɩ a brɩ nɔɔna yɩ a ga.
Baŋa-Wɛ, nmʋ doŋ tǝrǝ!
6 Nmʋ yigə tǝrǝ dɩ nabiinǝ na yǝni
ba kwe vara dɩ wʋdiiru
ba ma kɩ kaanɩm ba pa‑m te tɩn,
nɩ kʋ na yɩ vara zwɛɛm kaanɩm
naa lwarɩm saarɩm kaanɩm dɩ.
Nmʋ nan pʋrɩ a zwa
sɩ a ni kʋ kuri lanyɩranɩ.c
7 Kʋntʋ ŋwaanɩ amʋ laan maa tɛ a wɩ:
«Amʋ Tu Wɛ, nii-nɩ da! A tuǝ!
Kʋ kɩ nɩ kʋ na maŋɩ kʋ pʋpʋnɩ
amʋ ŋwaanɩ nmʋ faŋa faŋa tɔnɔ kʋm wʋnɩ te tɩn mʋ.
8 A fra yam mʋ yɩ sɩ a tʋŋɩ
nmʋ wʋbʋŋa na lagɩ te tɩn,
Bɛŋwaanɩ, nmʋ niə yam mʋ tigi
amʋ bɩcarɩ nɩ.»d
9 Baŋa-Wɛ, amʋ zɩgɩ nmʋ nɔn-kɔgɔ kʋm tɩtarɩ nɩ mʋ,
sɩ a taa brɩ nmʋ cɩga kam taanɩ jaja.
Nmʋ tɩtɩ maŋɩ n ye nɩ
a wʋ səgi-ka dɩ fɩnfɩɩn dɩ.
10 Amʋ wʋ pɛ n cɩga kam taanɩ
maŋɩ a tee nɩ.
A nan yǝni a tɛ nmʋ zǝnǝ
dɩ n vrɩm taanɩ dɩm
a brɩ nɔɔna jaja mʋ.
Nmʋ nɔn-kɔgɔ kʋm na jeeri daanɩ,
amʋ yǝni a paɩ ba lwarɩ nɩ:
n sono kʋm ba lənə
yɩ n yigə wʋ dɩbam wʋnɩ.
11 Amʋ Tu Baŋa-Wɛ,
nmʋ jɩgɩ amʋ yibwənə,
nan yɩ dwanɩ n jɩŋa kam
amʋ baŋa nɩ maŋa dɩ maŋa.
Ta n zɩgɩ amʋ kwaga nɩ,
sɩ n pa n sono kʋm
dɩ n cɩga kam taa cʋ-nɩ.
12 Amʋ nɛ cam zanzan
yɩ dɩ gilimi-nɩ dɩ kɩ tɩtarɩ nɩ.
Dɩ daga dɩ dwe sɩ a lwarɩ
dɩ na maɩ te tɩn.
Amʋ lwarɩm mʋ tu amʋ baŋa
ya ja-nɩ.
Amʋ yiǝ daa ba naɩ
yɩ a tusi cwǝŋǝ.
A lwarɩm daga dɩ dwe
a yuuywe sɩm.
Kʋntʋ laan maa pa a tiini a bwǝnǝ.
13 Amʋ Tu Baŋa-Wɛ, popo sɩ n ba
n joŋi-nɩ n yagɩ!
Kɩ lɩla n ba n zəni-nɩ.
14 Kʋ na yɩ balʋ na beeri amʋ tʋʋnɩ tɩn,
pa vuvugə yi-ba sɩ ba tʋ tɩga nɩ.
Pa balʋ maama na beeri
amʋ cɔgɩm tɩn
joori kwaga dɩ ba cavɩɩra yam.
15 Sɛ sɩ cavɩɩra di bantʋ dwi dɩm maama,
ba na tɛ ba wɩ:
ba jɩŋa zʋ amʋ tɩn ŋwaanɩ.
16 Kʋ daarɩ balʋ maama
na beeri nmʋ je tɩn,
pa ba taa jɩgɩ wʋpolo,
sɩ ba di ywəəni nmʋ ŋwaanɩ.
Ta pa balʋ na soe
sɩ n ta n joŋi-ba tɩn
taa tɛ maŋa maama ba wɩ:
«Dɩ́ wʋ́ zǝŋi Baŋa-Wɛ yɩrɩ dɩm wɛɛnɩ.»
17 Kʋ nan na yɩ amʋ, a yɩ nabwəm mʋ,
yɩ yinigə jɩgɩ-nɩ.
A Yuutu Wɛ yigə daa ta wʋ
amʋ wʋnɩ.
Amʋ Tu Wɛ, nmʋ mʋ yɩ a zənnu
dɩ a vɩrnʋ.
Yɩ daanɩ sɩ n laan ba n wǝli-nɩ!e