Ŋwɩa yɩ kukugə
Davidi dɛɛn panɩ ləŋə kantʋ.
39
Amʋ tagɩ dɩ a tɩtɩ mʋ nɩ:«Amʋ wʋ́ taa cʋ a tɩtɩ mʋ
sɩ a yɩ kɩ lwarɩm dɩ a ni-taanɩ.
A maa wʋ́ kwe gara a kɩ a ni nɩ,
nɩ nɔn-balwaarʋ na wʋ a tee nɩ.»
2 Kʋntʋ ma pa a pu a ni cɩmm.
A wʋ tagɩ kʋlʋkʋlʋ dɩ fɩnfɩɩn dɩ.
Kʋ brɩ kʋ wʋ wǝli-nɩ,
yɩ kʋ cɛ a yɩra nɩ kʋ ja gaalɩ.
3 Liǝ ma tiini ya jɩgɩ-nɩ zanzan.
Wʋbʋbʋŋ-fara na daanɩ-nɩ te tɩn
nyɩ dɩ mim mʋ zwɛ a wʋʋ kʋm.
A laan ma ga ga a ta wɩ:
4 Baŋa-Wɛ, pa a maanɩ a ŋwɩa kam na lagɩ ka ti te tɩn,
sɩ a wanɩ a guli nɩ
a da yam ba daga,
yɩ ya duri mʋ lɩla lɩla ya maa kɛa.
5 Nmʋ pɛ a ŋwɩa yɩ kukugə mʋ.
Amʋ da yam na maŋɩ
ya ma te maama dɩ,
ya ta nyɩ dɩ yibʋgɩsa mʋ
nmʋ tee nɩ.
Nabiinǝ maama mʋmwɛ
yɩ viu yɩranɩ mʋ,
ba na maŋɩ ba zɩgɩ dɩ dam
te maama dɩ.
6 Nabiinǝ na tɔgɩ cwe sɩlʋ maama,
ba nyɩ dɩ luluŋu yɩranɩ mʋ.
Ba na yaarɩ tɩtʋŋa baŋa nɩ te tɩn
ba jɩgɩ nyɔɔrɩ.
Ba maa yǝni ba laɩ jɩjɩgɩrʋ zanzan
ba tiŋə,
yɩ ba yǝri wʋlʋ na wʋ́ di-tɩ
ba tʋʋnɩ kwaga nɩ tɩn.
7 Amʋ Yuutu Wɛ, amʋ daa je
a cǝgǝ bɛɛ mʋ?
A nan daŋɩ a tɩɩna nmʋ baŋa nɩ mʋ.
8 Nan joŋi-nɩ n ja n nuŋi
a gɛɛra yam wʋnɩ.
Ta yɩ sɛ sɩ jwəəru tɩtɩ taa jɩgɩ-nɩ
tɩ goonə.
9 A ni dɩm maŋɩ sɩ dɩ məəri,
sɩ a daa yɩ puri-dɩ,
nmʋ mʋ na yaarɩ-nɩ tɩn ŋwaanɩ.
10 Nan, dwanɩ n ja-guli dɩm
amʋ baŋa nɩ.
Nmʋ na yɔɔrɩ n waarɩ-nɩ te tɩn
pɛ a mʋmwɛ lagɩ dɩ ti mʋ.
11 Nmʋ yǝni n jɩgɩ nɔɔna n kʋrɩsa
sɩ n pa ba yagɩ ba lwarɩm kikiǝ.
N ma n yǝni n cɔgɩ
ba fra na zʋ kʋlʋ maama tɩn,
nɩ tʋ́a na mu wǝǝnu te tɩn.
Cɩga tɩn, nabiinǝ maama mʋmwɛ
yɩ viu yɩranɩ mʋ.
12 Amʋ Tu Baŋa-Wɛ,
cəgi amʋ wɛ-loro kʋm!
Pʋrɩ n zwa sɩ n sɛ amʋ kərə kam.
Amʋ na keeri a loori nmʋ tɩn,
yɩ maŋɩ da cɩmm.
A na zʋʋrɩ lʋgʋ baŋa nɩ tɩn,
a yɩ vəru mʋ na tu nmʋ sɔŋɔ kʋm,
nɩ a nabaara bam maama
dɩ dɛɛn na kɩ te tɩn.
13 Nan daa n yɩ nii-nɩ dɩ ban-zɔŋɔ,
sɩ a wanɩ a joori a di ywəəni,
yɩ a laan daarɩ a tɩ a kɛ.