Davidi Wɛ-loro yawɩʋ ŋwaanɩ
38
Amʋ Tu Baŋa-Wɛ,yɩ tɔgɩ n ban-zɔŋɔ kʋm baŋa nɩ
n bwɛ-nɩ.
Ta yɩ da n ban-lʋm dɩm ŋwaanɩ
n yaarɩ-nɩ.
2 Nmʋ cɩna yam
yɔɔrɩ ya zɔ-nɩ mʋ.
Nmʋ ja-guli dɩm
dɩ ma magɩ-nɩ,
pa a yɩra yam tiini ya cɛ.
3 Amʋ yɩra yam maama wɔɛ mʋ,
n banɩ na zaŋɩ amʋ baŋa nɩ tɩn ŋwaanɩ.
Amʋ kwi sɩm tɩtɩ ba jɩgɩ yazurə,
dɩ a lwarɩm dɩm
na daanɩ-nɩ te tɩn.
4 Bɛŋwaanɩ, a lwarɩm kikiǝ yam
na daga te tɩn,
ya diini baŋa baŋa ya gaalɩ a yuu.
Ya maa tiini ya dunǝ
ya dwe a jam.
5 Amʋ fufwələ yam tiini tɩ lwe
yɩ a yɩra mʋʋra,
a na tʋŋɩ jwərim
dɩ a lwarɩm dɩm tɩn ŋwaanɩ.
6 Amʋ maama goori mʋ
yɩ a yɩra yam dɩ wiirə.
Wʋ-cɔgɔ yɩranɩ mʋ
yɩ amʋ nyɩm.
7 Paa mʋ tiini ka jɩgɩ-nɩ
pa a təŋə maama ba sɛa.
A yɩra yam maama maa wɔɛ.
8 A tiini a bugi mʋ yɩ kʋ cɛ a yɩra nɩ.
A maa yǝni a suuri,
liǝ na jɩgɩ-nɩ tɩn ŋwaanɩ.
9 Amʋ Yuutu Wɛ, nmʋ maŋɩ n ye
a wʋbʋŋa na lagɩ kʋlʋ tɩn maama.
A na tiini a sisigi te tɩn kʋlʋkʋlʋ
wʋ səgi nmʋ yigə nɩ.
10 A bɩcarɩ zagɩ mʋ
yɩ a dam dɩm dɩ wʋra dɩ tiə.
A yiǝ maa bəri.
11 A badonnǝ dɩ a tɔgɩ-donnə bam
laan cɩ ba tɩtɩ dɩ amʋ mʋ
a yawɩ-cɛɔ kʋm ŋwaanɩ.
A digə tiinə dɩ ba sɛ
sɩ ba yi amʋ yɩra.
12 Balʋ na beeri sɩ ba gʋ-nɩ tɩn
cɩgɩ cɩgɩrʋ mʋ sɩ tɩ ja-nɩ.
Balʋ na kwaanɩ
sɩ ba kɩ-nɩ zʋnnɩ tɩn dɩ
ŋɔɔnɩ daanɩ sɩ ba cɔge-nɩ.
Dɛ maama wʋnɩ
ba maa banɩ amʋ bana.
13 Amʋ nan kɩ nɩnɛɛnɩ
a yɩ zwa-kɔgɔ mʋ te,
yɩ a ba ni ba bana yam.
A ta kɩ nɩ a yɩ mɩmaa mʋ te,
pa a ni məəri.
14 Amʋ jigi nɩ a yɩ zwa-kɔgɔ mʋ.
A bá sɛ sɩ a magɩ ni-kantɔgɔ dɩ ba.
15 Baŋa-Wɛ, amʋ nan daŋɩ a tɩɩna
nmʋ baŋa nɩ mʋ.
Amʋ Yuutu Wɛ, n yɩ dɩlʋ
na wʋ́ lǝri-ba tɩn.
16 A ma loori a wɩ:
«Yɩ sɛ sɩ ba taa caka
amʋ cam wʋnɩ.
A na seeri a tʋ tɩga nɩ,
yɩ sɛ sɩ ba brɩ ba tɩtɩ
amʋ baŋa nɩ.»
17 Kʋ gɛ fɩɩn sɩ a tri a tʋ tɩga nɩ.
Kʋ maa tiini kʋ cɛ a yɩra nɩ
yɩ kʋ ba fɔgɩ kʋ tiə.
18 A ma brɩ a lwarɩm jaja Wɛ yigə nɩ,
yɩ a culi-ya.
19 A dʋna bam nan puli zanzan
yɩ ba dana.
Balʋ na culi-nɩ kafɛ ŋwaanɩ tɩn
tiini ba daga.
20 Ba kwe lwarɩm mʋ ba ma ŋwɩ
lanyɩranɩ dɩlʋ maama a na kɩ tɩn.
Ba ma bwɛ-nɩ dɩ a na maŋɩ
a tɔgɩ cwə-laa te tɩn dɩ.
21 Baŋa-Wɛ, yɩ yagɩ a yɩra!
Amʋ Tu Wɛ, yɩ ta n wʋ
yigə yigə dɩ amʋ.
22 Nan kɩ lɩla n ba n zəni-nɩ.
Nmʋ mʋ yɩ amʋ Vɩrnʋ.