Kɩ n wʋ-dɩdʋa dɩdaanɩ Baŋa-Wɛ
Davidi dɛɛn panɩ ləŋə kantʋ.
37
Yɩ pa n wʋbʋŋa vugiminɔn-balwaarʋ ŋwaanɩ.
Nan yɩ ta n jɩgɩ wʋ-gʋʋ
dɩ nɔn-balwaarʋ tɩm kʋntʋ.a
2 Bantʋ bá daanɩ yɩ ba je,
nɩnɛɛnɩ gaa na kwaarɩ te tɩn.
Ba nyɩ dɩ ga-lɛɛrʋ na bá daanɩ
yɩ tɩ tɩ tɩn mʋ.
3 Sɩ kʋ na yɩ nmʋ, kɩ n wʋ-dɩdʋa
dɩdaanɩ Baŋa-Wɛ
sɩ n daarɩ n tɔgɩ cwə-laa.
Kʋntʋ mʋ wʋ́ pa n ta n zʋʋrɩ
lʋgʋ kʋm wʋnɩ dɩ yazurə,
yɩ kʋlʋkʋlʋ bá daanɩ‑m.
4 Beeri wʋpolo Baŋa-Wɛ tee nɩ,
sɩ DƖ wʋ́ kɩ kʋlʋ maama
n wʋbʋŋa na lagɩ tɩn DƖ pa‑m.b
5 Kwe n tɩtʋŋa maama
n kɩ Baŋa-Wɛ jɩŋa nɩ,
sɩ n daarɩ n kɩ n wʋ-dɩdʋa dɩ DƖ,
sɩ Dɩntʋ wʋ́ wəli‑m.
6 Wɛ wʋ́ pa nmʋ na tɔgɩ cɩga te tɩn lwarɩ jaja,
nɩnɛɛnɩ wɛ na puli te tɩn.
Nmʋ taanɩ dɩm wʋ́ nuŋi
dɩ cɩga jaja,
nɩnɛɛnɩ wɩa na nyɩ
yuparɩ baŋa nɩ te tɩn.
7 Ja n wʋʋ sɩ n ta n cəgi Baŋa-Wɛ
na wʋ́ tʋŋɩ te.
Pa n tɩɩna taa wʋ Dɩntʋ wʋnɩ.
Kʋ na yɩ balʋ na nɛ yigə-vəŋə
dɩ ba kǝm-balwaarʋ tɩn,
yɩ ta n paɩ n wʋbʋŋa vugimi
ba ŋwaanɩ.
8 Ja n tɩtɩ ban-zɔŋɔ wʋnɩ.
Nan yɩ ta n fufugə.
Kʋntʋ fɔgɩ kʋ cɔgɩ wǝǝnu mʋ.
9 Ta n ye nɩ nɔn-balwaarʋ
lagɩ ba je mʋ.
Balʋ nan na kɩ ba tɩɩna
dɩdaanɩ Baŋa-Wɛ tɩn
wʋ́ joŋi tɩga kam ba taa te.
10 Kʋ bá daanɩ sɩ nɔn-balwaarʋ je.
Nmʋ na maŋɩ n beeri-ba tɩte maama, n bá na-ba.
11 Balʋ nan na tu ba tɩtɩ Wɛ yigə nɩ tɩn mʋ wʋ́ taa te tɩga kam,
sɩ ba wʋʋ tiini kʋ poli ba yigə-vəŋə dɩ ba yazurə ŋwaanɩ.c
12 Nɔn-balwaarʋ tɩm yǝni ba banɩ mʋ sɩ ba cɔgɩ nɔn-ŋʋna.
Ba ma nywanɩ ba yibiyə dɩ ba.
13 Dɩ́ Yuutu Wɛ nan jɩgɩ nɔn-balwaarʋ tɩm DƖ mwanɩ mʋ.
DƖ ye nɩ bantʋ cɔgɩm dɛ
lagɩ dɩ yi.
14 Nɔn-balwaarʋ tɩm yǝni
ba lɩ ba sʋ-lwaanʋ mʋ,
yɩ ba daarɩ ba saŋɩ ba taŋa cɩna,
sɩ ba kwaanɩ ba gʋ nabwənə dɩ zʋra
dɩdaanɩ balʋ maama na tɔgɩ cɩga cwǝŋǝ tɩn.
15 Ba tɩtɩ sʋ-lwaanʋ tɩm mʋ nan
lagɩ tɩ joori tɩ gʋ-ba.
Ba tɛn sɩm dɩ maa wʋ́ bwəri.
16 Cɩga tɔgɩnʋ na maŋɩ o jɩgɩ fɩnfɩɩn yɩranɩ o jɩŋa nɩ,
kʋntʋ garɩ jɩjɩgɩrʋ tɩm maama
nɔn-balwaarʋ tɩm na nɛ tɩn.d
17 Bɛŋwaanɩ, dam dɩlʋ
nɔn-balwaarʋ tɩm na jɩgɩ tɩn
wʋ́ jagɩ dɩ je mʋ.
Kʋ daarɩ Baŋa-Wɛ yigə
wʋ nɔn-ŋʋna wʋnɩ yɩ DƖ cʋ-ba.
18 Dɛ maama wʋnɩ Baŋa-Wɛ nii
balʋ na tɔgɩ cwə-laa lanyɩranɩ tɩn baŋa nɩ.
Baá taa te tɩga kam
sɩ kʋ taa ve maŋa maama.
19 Cam maŋa na yiǝ, kʋ bá ni bantʋ.
Kana maŋa nɩ dɩ, ba ta wʋ́ na
ba ni-wʋdiu ba daarɩ ba zɩgɩ.
20 Nɔn-balwaarʋ tɩm nan lagɩ ba tɩ mʋ.
Baŋa-Wɛ dʋna maama wʋ́ jagɩ
ba je mʋ,
nɩnɛɛnɩ nyʋa na yǝni ka je te tɩn.
21 Nɔn-balwaarʋ na jɩnɩ woŋo
nɔɔnʋ tee nɩ,
ba daa ba sɛ sɩ ba ŋwɩ-kʋ
ba pa kʋ tu.
Nɔn-ŋʋna nan yǝni ba kwe wǝǝnu mʋ ba paɩ nɔɔna zaanɩ.
22 Baŋa-Wɛ na kɩ balʋ yu-yoŋo tɩn mʋ wʋ́ joŋi tɩga kam ba taa te.
Kʋ daarɩ balʋ DƖ na sɔɔlɩ lwarɩm
DƖ yagɩ ba yuu nɩ tɩn wʋ́ je mʋ.
23 Kʋ na yɩ balʋ tɩtʋŋa na su
Baŋa-Wɛ yi tɩn,
DƖ yǝni DƖ brɩ-ba cwǝŋǝ mʋ
sɩ ba taa ve yigə.
24 Ba na maŋɩ ba magɩ ba nɛ tɩte maama dɩ, ba ta bá tʋ tɩga nɩ,
Bɛŋwaanɩ Baŋa-Wɛ mʋ jɩgɩ
ba jɩn sɩm.
25 Amʋ kwɩn lanyɩranɩ.
Kʋ nan na zɩgɩ a biini nɩ
sɩ kʋ yi zɩm tɩn,
amʋ ta wʋ nɛ nɔn-ŋʋna
na ve jɩ-kʋra.
Ba biə dɩ nan ba nuŋi dɩ zʋŋ-kwaga sɩ ba loori ba di.
26 Nɔn-ŋʋna yǝni ba kwe ba wǝǝnu
ba paɩ nɔɔna zaanɩ mʋ.
Ba maa kwǝri ba jɩnɩ
ba paɩ nɔɔna badonnǝ.
Ba biə wʋ́ pa ba na yu-yoŋo Wɛ tee nɩ.
27 Yagɩ tɩtʋŋ-lwaannʋ kǝm sɩ n daarɩ n ta n tɔgɩ kǝm-laarʋ!
Kʋntʋ mʋ wʋ́ pa nmʋ ta n zʋʋrɩ tɩga kam nɩ maŋa maama wuu.
28 Bɛŋwaanɩ, Baŋa-Wɛ lagɩ
sɩ cɩga kam mʋ taa zɩga.
DƖ bá fɔgɩ DƖ lɔ balʋ na jɩgɩ
DƖ cɩga kam tɩn kwaga nɩ kɔtaa.
DƖ wʋ́ taa cʋ-ba sɩ kʋ taa ve maŋa maama,
yɩ DƖ daarɩ DƖ zəli nɔn-balwaarʋ tɩm dwi sɩ ba jagɩ ba je.
29 Cɩga tɔgɩna bam mʋ wʋ́ joŋi tɩga kam ba taa te.
Ba maa wʋ́ taa zʋʋrɩ da mʋ
maŋa maama wuu.
30 Swan taanɩ yɩranɩ mʋ nuŋi
nɔn-ŋʋna ni nɩ,
yɩ bantʋ ŋwaŋa mʋ jɩgɩ cɩga.
31 Wɛ taanɩ zaasɩm dɩm mʋ su
ba bɩcara maama,
yɩ ba bá seeri ba tʋ
Wɛ cwǝŋǝ wʋnɩ.
32 Nɔn-balwaarʋ tɩm dalɩ mʋ
ba beeri laŋa sɩ ba gʋ nɔn-ŋʋna.
33 Baŋa-Wɛ nan zɩgɩ
nɔn-ŋʋna tɩm kwaga nɩ.
Ba na maŋɩ ba zʋ taanɩ wʋnɩ,
Wɛ wʋ́ lɩ-ba ba dʋna jɩŋa nɩ
sɩ ba yɩ tʋ ba bʋra wʋnɩ.
34 Pa n tɩɩna taa wʋ Baŋa-Wɛ tee nɩ,
sɩ n daarɩ n ta n tɔgɩ
DƖ cwǝŋǝ kam.
Kʋntʋ mʋ DƖ wʋ́ pa n na yɩrɩ
sɩ n ta n te tɩga kam.
DƖ maa wʋ́ zəli nɔn-balwaarʋ
sɩ ba je,
yɩ n ta n je n niə.
35 Amʋ yi nɛ nɔn-balɔrɔ
na bɛɛsɩ o donnǝ te tɩn.
O maa brɩ o tɩtɩ nɩ tiu
na zɩgɩ dɩ dam te tɩn.
36 Kʋ na kɩ fɩɩn tɩn, a nɛ nɩ
kʋ tu da o je mʋ!
A na beeri o jǝgǝ tɩn,
a gɛ kʋ ŋwa mʋ,
yɩ o yuu daa ba naɩ!
37 Fɔgɩ n ta n nii balʋ kǝm na lamma yɩ ba jɩgɩ cɩga tɩn.
Balʋ na zʋʋrɩ dɩ bɩcar-zuru tɩn
jwa wʋ́ na ba dwi dɩm.
38 Balʋ nan na cɔgɩ Wɛ niə yam tɩn
wʋ́ je mʋ.
Nɔn-balwaarʋ tɩm dɩ
jwa bá taa jɩgɩ ba dwi dɩm.
39 Baŋa-Wɛ yǝni DƖ vrɩ
cɩga tɔgɩna mʋ DƖ yaga.
Cam maŋa na yiǝ,
Dɩntʋ mʋ yɩ ba dalɩm je
40 Wɛ yǝni o zǝni-ba mʋ,
DƖ daarɩ DƖ joŋi-ba DƖ yaga
nɔn-balwaarʋ tɩm jɩŋa nɩ,
ba na tu ba səgi
DƖ woro kʋm wʋnɩ tɩn ŋwaanɩ.