Baŋa-Wɛ lana
Davidi dɛɛn panɩ ləŋə kantʋ maŋa kalʋ o na wʋ Pɛ Abimelɛkɩ tee nɩ yɩ o kɩ nɩ o yirisi tɩn. Pɛ wʋm ma pa o viiri.a
34
Amʋ wʋ́ zuli Baŋa-Wɛmaŋa maama.
Amʋ wʋ́ taa tee‑DƖ mʋ maŋa maama.
2 Amʋ wʋ́ zǝŋi DƖ yɩrɩ
DƖ kənə maama ŋwaanɩ,
sɩ balʋ maama na yɩ tu-n-tɩtɩ tiinə tɩn ni
yɩ ba daarɩ ba na wʋpolo.
3 Pa-na dɩ́ kɩ daanɩ
dɩ́ pa Baŋa-Wɛ joŋi zulə,
yɩ dɩ́ zǝŋi DƖ yɩrɩ dɩm wɛɛnɩ.
4 Amʋ beeri zənə Baŋa-Wɛ tee nɩ,
yɩ DƖ sɛ DƖ joŋi a wɛ-loro kʋm.
Kʋ na yɩ wǝǝnu tɩlʋ maama
a ya na fʋna dɩ tɩ tɩn,
DƖ vaŋɩ-nɩ mʋ DƖ lɩ tɩ wʋnɩ.
5 Balʋ na kwǝni ba nii Wɛ sɩ DƖ zǝni-ba tɩn mʋ jɩgɩ wʋpolo.
Ba daa bá na ba cavɩɩra.
6 A na maŋɩ a yɩ yinigə tu tɩn,
a ta loori Wɛ,
yɩ DƖ sɛ DƖ cəgi a wɛ-loro kʋm.
DƖ ma joŋi-nɩ DƖ yagɩ
a cam maama wʋnɩ.
7 Baŋa-Wɛ malɛka kam
mʋ cʋ balʋ na kwarɩ-DƖ tɩn,
sɩ cam yɩ wanɩ-ba dɩ ja.b
8 Nan maanɩ-na Baŋa-Wɛ á nii,
sɩ á wʋ́ lwarɩ nɩ DƖ lana.
Balʋ maama na tu ba səgi DƖ woro kʋm wʋnɩ tɩn jɩgɩ yu-yoŋo.
9 Taá kɔre-na-DƖ, abam balʋ Baŋa-Wɛ na kuri DƖ pa DƖ tɩtɩ tɩn.
Kʋlʋkʋlʋ gɛɛrɩ bá fɔgɩ kʋ ja
balʋ na sɛ DƖ ni tɩn.
10 Kʋ na maŋɩ kʋ yɩ nywəənu,
kana wʋ́ ja-tɩ maŋa dɩ maŋa.
Balʋ nan na kwaanɩ
sɩ ba lwarɩ Baŋa-Wɛ tɩn
bá fɔgɩ ba ga wo-laarʋ.
11 A biə bam, titwəni-na á yi amʋ te,
sɩ á cəgi a taanɩ dɩm.
Amʋ wʋ́ brɩ abam á na wʋ́ kɩ te
sɩ á taá kwarɩ Baŋa-Wɛ.
12 Abam wʋlʋ maama na lagɩ
sɩ o na ŋwɩa ywəəni,
sɩ o daarɩ o na mʋmwɛ-dɛɛrɩ
dɩ wʋpolo,
13 kʋ tu maŋɩ sɩ o ja o tɩtɩ mʋ
dɩ bɩtar-balɔrɔ ŋwaŋa dɩ vwan fɔm.
14 O nan yagɩ tɩtʋŋ-lwaannʋ kǝm
sɩ o daarɩ o taa tɔgɩ kǝm-laarʋ,
yɩ o kwaanɩ sɩ o taa zʋʋrɩ
dɩ bɩcar-zuru.
15 Kʋ na yɩ nɔn-ŋʋna,
Baŋa-Wɛ yǝni DƖ nii ba baŋa nɩ,
yɩ ba kaasa dɩ zʋ DƖ zwa.
16 Kʋ daarɩ kʋ na yɩ balʋ
na soe lwarɩm tɩtʋŋa tɩn,
Wɛ yǝni DƖ pipiri DƖ kwaga mʋ
DƖ ya-ba,
pa ba daa ba jɩgɩ yɩrɩ
lʋgʋ baŋa nɩ.c
17 Cɩga tɔgɩna bam yǝni ba loori zǝnǝ Baŋa-Wɛ tee nɩ,
yɩ DƖ sɛ ba wɛ-loro kʋm.
DƖ ma joŋi-ba DƖ yagɩ
ba cam maama wʋnɩ.
18 Baŋa-Wɛ maa wǝli balʋ
wʋrʋ na cɔgɩ tɩn,
yɩ DƖ joŋi balʋ bɩcɔŋɔ na pogili tɩn DƖ yaga.d
19 Cɩga tɔgɩna bam waɩ ba naɩ cam dwi dwi.
Baŋa-Wɛ nan wʋ́ lɩ-ba DƖ ja
DƖ nuŋi ya maama wʋnɩ.
20 Baŋa-Wɛ wʋ́ cɩ-ba
pa ba kuə dɩdʋa tɩtɩ
bá bwəri maŋa dɩ maŋa. e
21 Nɔn-balwaarʋ tɩm tɩtɩ
tɩtʋŋ-balwaarʋ tɩm mʋ
wʋ́ joori tɩ gʋ-ba.
Wɛ wʋ́ yaarɩ balʋ na culi cɩga tɔgɩna bam tɩn.
22 Baŋa-Wɛ yǝni DƖ joŋi
balʋ na zuli‑DƖ tɩn mʋ DƖ yaga.
Balʋ maama na səgi ba tɩtɩ DƖ woro kʋm wʋnɩ tɩn bá tʋ dɩ ba bʋra.