Davidi wɛ-loro
35
Baŋa-Wɛ, dwəni dɩ balʋna yɩ amʋ dʋna tɩn.
Zaŋɩ n zaŋɩ najara dɩ balʋ
na kɩ najara dɩ amʋ tɩn.
2 Kwe n najara zɩla yam
n daarɩ n ta n ze
n najara cɩ-kwaŋa kam
sɩ n nuŋi n zəni-nɩ!
3 Kwe n cicwe dɩm
dɩ n dooru wʋm
n zəli balʋ na zəli-nɩ sɩ ba ja tɩn.
Fɔgɩ n ta dɩ amʋ nɩ:
nmʋ mʋ yɩ amʋ vɩrnʋ.a
4 Pa balʋ na kwaanɩ sɩ ba gʋ amʋ tɩn na ba cavɩɩra.
Ba na bʋŋɩ sɩ ba kɩ lwarɩm
amʋ baŋa nɩ tɩn,
nan pa ba wʋbʋŋa vugimi
sɩ ba laan pipiri ba joori kwaga.
5 Pa Baŋa-Wɛ malɛka kam zəli-ba
sɩ ba duri ba jagɩ da yigə nɩ,
nɩnɛɛnɩ viu na kalɩ swannʋ
kʋ ja je te tɩn.
6 Sɛ sɩ lim kwǝli ba cwǝŋǝ kam
sɩ ka daarɩ ka taa seerə,
sɩ Baŋa-Wɛ malɛka kam laan
pɛ ba kwaga ka pu.
7 Ba tiŋi cɩkʋ sɩ ba ja-nɩ,
dɩ a na wʋ kɩ kʋlʋkʋlʋ
a cɔgɩ ba yigə tɩn dɩ.
Ba ma daarɩ ba kʋ goŋo
sɩ a tʋ kʋ wʋnɩ a tɩ.
8 Pa lɛɛrʋ da tɩ tʋ ba baŋa nɩ.
Pa cɩkʋ kʋlʋ ba na tiŋi
amʋ ŋwaanɩ tɩn
joori kʋ ja bantʋ tɩtɩ.
Ta pa ba tʋ goŋo kʋlʋ
ba na kʋgɩ tɩn wʋnɩ,
sɩ ba yɔɔrɩ ba na cɔgɩm!
9 Amʋ laan wʋ́ taa caka
dɩ wʋpolo,
Baŋa-Wɛ na joŋi-nɩ DƖ yagɩ tɩn ŋwaanɩ.
10 Amʋ laan wʋ́ ta
dɩ a dam maama a wɩ:
«Baŋa-Wɛ, nmʋ doŋ tǝrǝ!
N yǝni n vrɩ nabwənə
balʋ dam na dwe-ba tɩn jɩŋa nɩ n yaga.
Nmʋ ta joŋi yinigə tiinə
balʋ na pini-ba tɩn jɩŋa nɩ n yaga.»
11 Vwa-fɔra mʋ zɩgɩ sɩ ba pa maana yalʋ na wʋ́ lɔ amʋ kwaga nɩ tɩn.
Ba ma maŋɩ wǝǝnu tɩlʋ a na yǝri tɩ ni nɩ tɩn ba pa-nɩ.
12 Ba kwe lwarɩm mʋ ba ma ŋwɩ
lanyɩranɩ dɩlʋ a na kɩ tɩn.
Kʋntʋ ŋwaanɩ mʋ amʋ wʋ laan tiini kʋ cɔgɩ.
13 Bantʋ dɛɛn na ba jɩgɩ yazurə tɩn,
amʋ mʋ zʋ gwar-zɩnzwara.
A ta ma brɩ a vɔ ni.
A gooni a tɩtɩ mʋ yɩ a loori Wɛ.b
14 A ma tiini a nywanɩ a yigə,
nɩnɛɛnɩ a wʋra a keeri a cʋrʋ,
naa a ciloŋ,
naa a nu luə doŋ mʋ tɩn.
Amʋ yɔɔrɩ a tu a tɩtɩ mʋ ba ŋwaanɩ.
15 Kʋ daarɩ bantʋ tiini
ba jɩgɩ wʋpolo
dɩ a laan na zʋ cam wʋnɩ tɩn mʋ.
Ba ma la daanɩ sɩ ba gilimi-nɩ
yɩ ba mwana.
Nɔn-wo-kʋrrʋ tɩlʋ a na maŋɩ
a yǝri tɩn mʋ
laan jɩgɩ amʋ kwaga ba coə.
16 Amʋ dɛɛn na tʋ cam wʋnɩ tɩn,
mʋ ba yɔɔrɩ ba jɩgɩ-nɩ ba twɩa,
nɩ nɔn-balwaarʋ na kɩ te tɩn.
Ba ma daarɩ ba nywanɩ ba yibiyə dɩ amʋ.
17 Baŋa-Wɛ, nmʋ wʋ́ ta n zɩgɩ cɩmm n nii
sɩ kʋ vu kʋ maŋɩ yən mʋ?
Joŋi-nɩ ba jɩŋa nɩ n yagɩ,
dɩ ba na kwaanɩ sɩ ba cɔge-nɩ
nɩnɛɛnɩ nywəənu mʋ jaanɩ-nɩ
sɩ tɩ gʋ tɩn.
18 Amʋ laan wʋ́ kɩ nmʋ le
nmʋ nɔɔna bam na jeeri mɛ tɩn nɩ.
Amʋ wʋ́ zɩgɩ n nɔn-kɔgɔ kʋm tɩtarɩ nɩ a tee‑m.
19 Yɩ pa a dʋna bam taa caka
amʋ cam dɩm ŋwaanɩ.
Ba culi-nɩ kafɛ ŋwaanɩ mʋ.c
Yɩ sɛ sɩ ba taa jɩgɩ-nɩ ba mwana.
20 Bantʋ ba fɔgɩ ba ŋɔɔnɩ yazurə taanɩ.
Ba nan fɔ vwan mʋ sɩ ba cɔgɩ
balʋ na beeri zurim tɩn yigə.
21 Ba maa kəŋi ba niə yalɩyalɩ
yɩ ba ta amʋ taanɩ ba wɩ:
«Yaa! Dɩ́ yiǝ mʋ nɛ
nmʋ na kɩ n cɔgɩ te tɩn!»
22 Baŋa-Wɛ, nmʋ nan nɛ kʋ maama.
Yɩ maŋɩ da cɩmm.
Amʋ Tu, yɩ ta n wʋ yigə yigə
sɩ n yagɩ a yɩra.
23 Nan zaŋɩ n zɩgɩ n pa-nɩ
sɩ a wanɩ a na bʋra.
Amʋ Yuutu Wɛ, zaŋɩ n ba n wǝli-nɩ!
24 Tɔgɩ n cɩga kam baŋa nɩ
n pa a na a bʋra.
Amʋ Tu Baŋa-Wɛ,
yɩ pa a dʋna bam na cwǝŋǝ
sɩ ba taa caka a cam dɩm ŋwaanɩ.
25 Yɩ sɛ sɩ ba fɔgɩ ba ta wɩ:
«Yaa! Dɩbam sɩɩnɩ dɩ́ na
dɩ́ fra na zʋ kʋlʋ tɩn.»
Yɩ pa-ba pwələ sɩ ba ta wɩ:
«Dɩ́ laan wanɩ nɔɔnʋ wʋm
dɩ́ li fasɩ!»
26 Ba na jɩgɩ wʋpolo
a lɛɛrʋ tɩm ŋwaanɩ tɩn,
pa ba yɔɔrɩ ba di ba cavɩɩra.
Kʋ na yɩ balʋ na brɩ ba tɩtɩ
amʋ baŋa nɩ tɩn,
sɛ sɩ ba yuu yáalɩ
yɩ cavɩɩra di-ba.
27 Kʋ nan na yɩ balʋ na zɩgɩ
a kwaga nɩ sɩ a di bʋra tɩn,
pa ba taa caka dɩ wʋpolo,
sɩ ba daarɩ ba taa taɩ maŋa maama ba wɩ:
«Baŋa-Wɛ dam dɩm daga zanzan!
DƖ lagɩ sɩ DƖ tɩntʋŋnʋ wʋm
taa jɩgɩ yazurə mʋ.»
28 Amʋ laan wʋ́ taa tɔɔlɩ
nmʋ cɩga kam taanɩ mʋ.
Dɛ dɩm maama wʋnɩ,
amʋ wʋ́ taa tee‑m mʋ maŋa maama.