Baŋa-Wɛ maŋɩ dɩ tiə
33
Abam balʋ na tɔgɩWɛ cwǝŋǝ tɩn,
leeni-na dɩ wʋpolo
á tee Baŋa-Wɛ!
Kʋ maŋɩ sɩ cɩga tɔgɩna bam
mʋ zuli‑DƖ.
2 Kwe-na kwaanʋ á ta
á ma á te DƖ yɩrɩ.
Ta-na kwaanʋ dwi dwi
á ma á kwɛɛrɩ DƖ yigə nɩ.a
3 Leeni-na ləŋ-dʋŋa á ma á tee Wɛ.
Magɩ-na á gɩgana-zɩla yam á pa ya maŋɩ daanɩ
Dɩ japoorə á ma á zuli-dɩ.
4 Bɛŋwaanɩ, Baŋa-Wɛ ni-taanɩ
yɩ cɩga mʋ.
DƖ kənə yam maama yǝni
ya tɔgɩ cwǝŋǝ lanyɩranɩ.
5 DƖ lagɩ sɩ kǝm-laarʋ dɩ cɩga
mʋ taa zɩga,
yɩ DƖ sono kʋm jagɩ
kʋ yi lʋgʋ baŋa je maama.
6 Baŋa-Wɛ kwe DƖ ni-taanɩ mʋ
DƖ ma naanɩ wɛyuu kʋm.
DƖ dɛɛn mɛ DƖ kwǝrǝ kam mʋ
DƖ pa calɩcwɩ sɩm maama
ta sɩ nuŋi.
7 DƖ ma pa nɩnɩʋ kʋm jɩgɩ
kʋ sisəm,
yɩ DƖ ja na-fara bam DƖ vu DƖ kɩ
tɩ jǝgǝ nɩ sɩ ya maŋɩ da.
8 Kʋ maŋɩ sɩ lʋgʋ kʋm nabiinǝ maama
taa kwarɩ Baŋa-Wɛ mʋ,
sɩ ba daarɩ ba cɔɔlɩ DƖ yigə nɩ
ba zuli‑DƖ.
9 Bɛŋwaanɩ, DƖ na puri DƖ ni tɩn
mʋ lʋgʋ kʋm puli kʋ wʋra.
DƖ ni dɩm ŋwaanɩ mʋ kʋ kɩ kʋntʋ.b
10 Baŋa-Wɛ mʋ cɔgɩ lʋgʋ baŋa tɩɩnɩ dɩm bana yam.
DƖ maa paɩ ba na yǝni ba jeeli
sɩ ba tʋŋɩ kʋlʋ maama tɩn jiri kafɛ.
11 Sɩ Kʋ daarɩ Baŋa-Wɛ wʋbʋŋa yam
wʋ́ taa zɩgɩ mʋ maŋa maama.
Dɩntʋ wʋbʋŋa yam ba gɔɩ
maŋa dɩ maŋa.
12 Kʋ na yɩ tɩʋ kʋlʋ na sɛ Baŋa-Wɛ
sɩ DƖ taa yɩ ba Yuutu tɩn,
yu-yoŋo wʋ ba tee nɩ.
Bantʋ mʋ DƖ kuri sɩ ba taa yɩ DƖ nyɩm.
13 Baŋa-Wɛ wʋ wɛyuu nɩ mʋ
yɩ DƖ tiiri DƖ nii lʋgʋ baŋa nɩ
DƖ na nabiinǝ bam maama.
14 DƖ maa je DƖ paarɩ jǝŋǝ je nɩ mʋ
DƖ yɩrɩ lʋgʋ kʋm nɔɔn-biə bam maama.
15 Dɩntʋ mʋ mɔɔnɩ nabiinǝ maama
dɩ ba bɩcara.
DƖ ye ba kənə yam maama
na yɩ te tɩn.
16 Pɛ na maŋɩ o jɩgɩ jar-kərə zanzan,
bantʋ bá wanɩ ba joŋ-o ba yagɩ.
Babɩa dɩ o dam dɩm maama
warɩ o tɩtɩ sɩ o joŋi.
17 Nan yɩ ta n tɩɩnɩ nɩ
n sisəŋ-nɔɔnʋ dana,
sɩ ka ga wʋ́ joŋi‑m najara wʋnɩ
ka yagɩ.
Ka dam dɩm na maŋɩ dɩ yɩ
te maama,
ka bá wanɩ‑m ka joŋi.
18 Cɩga ŋwaanɩ tɩn,
Baŋa-Wɛ yi pagɩ
balʋ na kwarɩ-DƖ tɩn baŋa nɩ mʋ.
DƖ maa yǝni DƖ nii balʋ
na jɩgɩ tɩɩna dɩ DƖ
DƖ sono kʋm ŋwaanɩ tɩn.
19 DƖ maa yɩrɩ-ba sɩ tʋʋnɩ yɩ ja-ba.
Kana na tuǝ, DƖ ta wʋ́ pa ba wəri.
20 Dɩbam yɔɔrɩ dɩ́ kwǝni dɩ́ nii
Baŋa-Wɛ mʋ.
Dɩntʋ mʋ yɩ dɩ́ zənnu
yɩ DƖ ta daarɩ DƖ cʋa dɩbam.
21 Dɩntʋ ŋwaanɩ mʋ
dɩ́ jɩgɩ wʋpolo,
bɛŋwaanɩ dɩ́ kɩ dɩ́ wʋ-dɩdʋa mʋ
dɩ DƖ yɩrɩ kamunu kʋm.
22 Baŋa-Wɛ, nan pa
sɩ n sono kʋm pu dɩbam,
sɩ dɩbam tɩɩna wʋ nmʋ tee nɩ mʋ.