Ta n lwarɩm n brɩ Wɛ
Davidi dɛɛn panɩ ləŋə kantʋ.
32
Kʋ na yɩ balʋ Wɛ na yagɩba lwarɩm DƖ ma cɛ-ba tɩn,
Wɛ yu-yoŋo wʋ ba yuu nɩ,
ba lwarɩm yam na saarɩ tɩn ŋwaanɩ.
2 Kʋ na yɩ balʋ Baŋa-Wɛ
na pɛ ba jɩgɩ bʋra tɩn,
Wɛ yu-yoŋo wʋ ba yuu nɩ,
ba bɩcara na jɩgɩ cɩga tɩn ŋwaanɩ.a
3 Amʋ dɛɛn na pugi a ni
dɩ a lwarɩm yam tɩn,
a yɩra bugi yɩ a bwǝnǝ mʋ.
Dɛ maama wʋnɩ
a yɔɔrɩ a suuri mʋ.
4 Nmʋ ma n yɔɔrɩ n yaarɩ-nɩ
wɩa dɩ tɩtɩ maama,
pa a dam dɩm nuŋi
dɩ daarɩ-nɩ.
Kʋ nyɩ dɩ wɩa na dana
yɩ ka zʋ a yɩra te tɩn mʋ.
5 Amʋ laan ma ga kʋ ŋwa
yɩ a ta a lwarɩm yam a brɩ-m.
A daa maa wʋ kwaanɩ
sɩ a səgi-ya.
A sɛ sɩ a culi a kǝm-balwaarʋ tɩm,
yɩ a ta tɩ taanɩ jaja
a brɩ nmʋ Baŋa-Wɛ.
Nmʋ dɩ ma n yagɩ a lwarɩm yam
n cɛ-nɩ,
pa ya daa tǝrǝ a yuu nɩ.b
6 Kʋntʋ tɩn, pwələ ta na wʋra,
balʋ na tɔgɩ nmʋ cwǝŋǝ kam tɩn
maŋɩ sɩ ba loori‑m,
sɩ cam na yi-ba nɩnɛɛnɩ na-fara na cuuri te tɩn,
sɩ ba yɩ tɔgɩ dɩ-kʋ ba je.
7 Nmʋ mʋ yɩ amʋ dalɩm je,
sɩ cam yɩ yi-nɩ.
Nɔɔna gilimi-nɩ
yɩ ba tee nmʋ yɩrɩ,
n na joŋi-nɩ n yagɩ tɩn ŋwaanɩ.
Baŋa-Wɛ maa wɩ:
8 Amʋ wʋ́ brɩ-m cwǝŋǝ kalʋ
nmʋ na wʋ́ ta n tɔgɩ tɩn,
yɩ a taa nii n baŋa nɩ
sɩ n yɩ tʋ tɩga nɩ.
9 Yɩ taá tʋŋɩ-na jwərim,
nɩnɛɛnɩ siseŋ-nɔɔna na kɩ te tɩn.
Ba na wʋ kwe gara
ba kɩ sɩ niə nɩ,
sɩ bá sɛ sɩ taa kɩ sɩ tɔgɩ
nɔɔna na lagɩ te tɩn.
10 Yaara zanzan mʋ yǝni ya tui
nɔn-balɔrɔ baŋa nɩ.
Kʋ daarɩ balʋ na kɩ ba wʋ-dɩdʋa
dɩ Baŋa-Wɛ tɩn,
Wɛ sono kʋlʋ na ba ləri tɩn
mʋ kwǝli bantʋ.c
11 Abam balʋ na jɩgɩ cɩga
Wɛ yigə nɩ tɩn,
zuli-na Baŋa-Wɛ
DƖ kənə yam ŋwaanɩ.
Abam balʋ na yɔɔrɩ
cwə-ŋʋŋa wʋnɩ tɩn,
taá jɩgɩ-na wʋpolo,
abam balʋ maama bɩcwannʋ na pɩɩrɩ tɩm!