Davidi wɛ-loro
31
Amʋ Tu Baŋa-Wɛ,a tu a dalɩ nmʋ woro nɩ.
Yɩ pa cavɩɩra di-nɩ.
Nan tɔgɩ nmʋ cɩga kam ŋwaanɩ
n joŋi-nɩ n yagɩ.
2 Pʋrɩ n zwa sɩ n cəgi
a wɛ-loro kʋm,
sɩ n daarɩ n kɩ lɩla n ba
n vrɩ-nɩ n yagɩ.
Nmʋ wʋlʋ na yɩ amʋ dalɩm je
nɩ piu te tɩn,
ta n cʋ-nɩ cam wʋnɩ.
Nmʋ wʋlʋ na yɩ amʋ salɩm je tɩn,
joŋi-nɩ n yagɩ.
3 Tɔgɩ n yɩrɩ dɩm ŋwaanɩ
n brɩ-nɩ cwǝŋǝ sɩ a taa tɔga,
nmʋ na yɩ amʋ dalɩm je tɩn ŋwaanɩ.
4 Vaŋɩ-nɩ n lɩ cɩkʋ kʋlʋ wʋnɩ
a dʋna bam na cɩgɩ a ŋwaanɩ tɩn.
Bɛŋwaanɩ, nmʋ yɩranɩ woro nɩ mʋ
amʋ wʋ́ dalɩ.
5 Baŋa-Wɛ, a kwe a joro
a kɩ nmʋ jɩŋa nɩ mʋ.
Joŋi-nɩ n yagɩ,
sɩ nmʋ yɩ cɩga tu mʋ.a
6 Kʋ na yɩ balʋ yigə na wʋ
jwǝnǝ yalʋ na yɩ kafɛ wʋnɩ tɩn,
amʋ culi ba ni-taanɩ.
Kʋ daarɩ amʋ kɩ a wʋ-dɩdʋa
dɩdaanɩ nmʋ Baŋa-Wɛ.
7 Amʋ wʋ́ taa caka dɩ wʋpolo,
nmʋ na yɔɔrɩ n jɩgɩ
amʋ sono tɩn ŋwaanɩ.
Bɛŋwaanɩ, nmʋ nɛ amʋ na yaarɩ te,
yɩ n maanɩ nɩ kʋ tiini kʋ ni-nɩ.
8 Nmʋ wʋ kwe-nɩ n kɩ
a dʋna bam jɩŋa nɩ.
Nmʋ nan lɩ-nɩ cam wʋnɩ,
pa a na pwələ mʋ
sɩ a taa zɩgɩ cɛpɩ.
9 Baŋa-Wɛ, duri a yibwənə,
cam na tiini dɩ jɩgɩ-nɩ tɩn ŋwaanɩ.
A yiǝ maama su dɩ yi-na
wʋ-cɔgɔ ŋwaanɩ,
yɩ a mʋmwɛ lagɩ dɩ ti.
10 A ŋwɩa daarɩ fɩɩn sɩ ka ti
wʋ-cɔgɔ ŋwaanɩ,
yɩ a tiini a suuri mʋ.
Cam mʋ pɛ a yɩra maama bugi zanzan,
yɩ a kwi sɩm tɩtɩ dɩ cɔgɩ.
11 Amʋ dʋna bam na daanɩ-nɩ te tɩn
mʋ paɩ a lwe
a doonə tɩtɩ mʋmwa nɩ.
A badonnǝ bam dɩ kwarɩ fʋʋnɩ
amʋ ŋwaanɩ.
Nɔɔna na yǝni ba jeeri-nɩ
cwǝŋǝ yuu nɩ,
baá duri mʋ ba daarɩ-nɩ.
12 Ba swe amʋ swiə
nɩ nɔɔnʋ wʋlʋ na tɩgɩ o kɛ tɩn mʋ.
Ba kɩ-nɩ nɩ a yɩ zʋŋ-kwaga kalʋ
daa na ba jɩgɩ kuri tɩn mʋ.
13 Amʋ ni nɔɔna zanzan na jɩgɩ
a taanɩ ba waasa.
Ba fugi-nɩ je maama nɩ.
Ba maa banɩ bana yɩ ba kɩ ni daanɩ
sɩ ba ja-nɩ ba gʋ.
14 Amʋ nan kɩ a wʋ-dɩdʋa dɩ nmʋ,
Baŋa-Wɛ.
A maa wɩ: «A jɩgɩ nmʋ mʋ
sɩ n ta n yɩ a Wɛ dɩm.»
15 Amʋ ŋwɩa da yalʋ na wʋ́ ba tɩn
wʋ nmʋ jɩa nɩ mʋ.
Nan vrɩ-nɩ a dʋna bam jɩŋa nɩ
n yagɩ.
Joŋi-nɩ balʋ na zəli-nɩ
sɩ ba ja tɩn jɩŋa nɩ.
16 Pa n yibiyə jeeri amʋ seeni,
sɩ a yɩ nmʋ tɩntʋŋnʋ mʋ.
Da n sono kʋm ŋwaanɩ
n vrɩ-nɩ n yagɩ.
17 Baŋa-Wɛ, yɩ pa a na a cavɩɩra,
a na keeri a loori nmʋ tɩn ŋwaanɩ.
Nan pa nɔn-balwaarʋ bam
di cavɩɩra,
sɩ ba daarɩ ba tɩ ba vu curu
mɛ ba na wʋ́ maŋɩ da cɩmm tɩn.
18 Pu ba niə yalʋ na karɩ ya fɔɩ vwan tɩn.
Bɛŋwaanɩ, bantʋ jɩgɩ nɔn-ŋʋna mʋ
ba twɩa,
dɩ ba na brɩ ba tɩtɩ
dɩ kamun-ŋwɛ te tɩn.
19 Nmʋ tiini n jɩgɩ wo-laarʋ sɩ kʋ gaalɩ,
yɩ n tiŋi-tɩ sɩ n pa
balʋ na kwarɩ nmʋ tɩn.
Nmʋ yǝni n kwe wo-laarʋ
n pa balʋ na dalɩ
nmʋ woro nɩ tɩn,
yɩ nabiinǝ yiǝ naɩ
n na kɩ te n pa-ba tɩn.b
20 Nɔɔna bantʋ mʋ n kwe
n səgi n woro wʋnɩ,
sɩ ba dʋna bam daa yɩ wanɩ
ba kɩ-ba lwarɩm.
Nmʋ yǝni n kwǝli-ba
n tɩtɩ tee nɩ,
sɩ nɔɔna yɩ taa jɩgɩ-ba ba yáala.
21 Tee-na Baŋa-Wɛ,
DƖ na yɔɔrɩ DƖ jɩgɩ
amʋ sono tɩn ŋwaanɩ.
DƖ kɩ tɩtʋŋ-kɩnkagelɩ DƖ pa-nɩ
DƖ sono kʋm ŋwaanɩ,
maŋa kalʋ a dʋna bam
na gilimi-nɩ ba pu
a tɩʋ kʋm nɩ tɩn.
22 Fʋʋnɩ ya na jɩgɩ-nɩ tɩn
mʋ amʋ tagɩ a wɩ:
«Wɛ ve yigə yigə DƖ daarɩ-nɩ!»
Baŋa-Wɛ nan cəgi a na magɩ a japoori a loori
DƖ yigə nɩ te tɩn,
yɩ DƖ daarɩ DƖ duri a yibwənə.
23 Abam balʋ maama na yɩ
Baŋa-Wɛ nɔɔna tɩn
taá so-na-DƖ!
Baŋa-Wɛ cʋ balʋ
na jɩgɩ DƖ cɩga tɩn mʋ.
Kʋ nan na yɩ balʋ na brɩ ba tɩtɩ kamunni tɩn,
DƖ yɔɔrɩ DƖ vaŋɩ ba zwa mʋ.
24 Abam balʋ maama na daŋɩ
á tɩɩna Baŋa-Wɛ baŋa nɩ tɩn,
nan kɩ-na á tɩtɩ á kɩ daanɩ,
joori-na á na baarɩ!