Le kǝm ləŋə
Davidi dɛɛn panɩ ləŋə kantʋ sɩ ba ma kɩ Wɛ le DƖ sɔŋɔ kʋm ŋwaanɩ.
30
Baŋa-Wɛ, a laan wʋ́ zǝŋi nmʋ yɩrɩ wɛɛnɩ,nmʋ na vaŋɩ-nɩ n lɩ
cam wʋnɩ tɩn ŋwaanɩ.
Nmʋ wʋ pɛ a dʋna bam pwələ
sɩ ba taa jɩgɩ-nɩ ba mwana.
2 Amʋ Tu Baŋa-Wɛ,
a loori zǝnǝ nmʋ tee nɩ,
yɩ nmʋ sɩɩnɩ n pa a na yazurə.
3 N ta cɩgɩ tʋʋnɩ
sɩ dɩ yɩ wanɩ-nɩ dɩ ja,
pa a daa yɩ taa ve curu seeni.
4 Abam balʋ na kɩ á cɩga dɩdaanɩ Baŋa-Wɛ tɩn,
taá leeni-na á zuli‑DƖ,
DƖ yɩrɩ dɩm na yɩ lanyɩranɩ fasɩ tɩn ŋwaanɩ.
5 DƖ banɩ na zaŋɩ, dɩ wʋ́ zuri lɩla mʋ.
DƖ nan na kɩ nmʋ yu-yoŋo,
kʋntʋ wʋ́ taa wʋra mʋ
n ŋwɩa maama wʋnɩ.
Nmʋ na keeri tɩtɩɩ nɩ
wʋ-cɔgɔ ŋwaanɩ,
kʋ bá daanɩ.
Tɩga na tu ka pʋʋrɩ,
kʋʋ́ ləri kʋ ji wʋpolo.a
6 Amʋ dɛɛn na zʋʋrɩ dɩ yazurə yɩranɩ tɩn,
mʋ amʋ tagɩ a wɩ:
«Amʋ daa bá fɔgɩ a gɔ naga.»
7 Baŋa-Wɛ, nmʋ na kɩ a yu-yoŋo,
n pɛ a zɩgɩ dɩ dam lanyɩranɩ.
Nmʋ laan na tu n səgi n yibiyə
dɩ amʋ tɩn,
a yigə ma nywanɩ.
8 Baŋa-Wɛ, amʋ keeri a loori‑m mʋ.
Nmʋ na yɩ a Yuutu Wɛ tɩn,
a magɩ a japoori a loori nmʋ yigə nɩ, yɩ a wɩ:
9 «Amʋ na tɩga yɩ a yɩra zʋ
tɩga kuri nɩ ya pɔ,
nmʋ wʋ́ na bɛ nyɔɔrɩ mʋ?
Tɩɩrʋ tɩm tɩtɩ wʋ́ wanɩ tɩ zuli‑m na?
Tɩ wʋ́ wanɩ tɩ tɔɔlɩ nɩ
n yɔɔrɩ n jɩgɩ cɩga dɩ nɔɔna na?
10 Baŋa-Wɛ, cəgi a wɛ-loro kʋm,
sɩ n duri a ŋwaŋa,
sɩ n daarɩ n zəni-nɩ.»
11 Nmʋ pipiri a wʋ-cɔgɔ kʋm
n pa kʋ ləri kʋ ji wʋpolo
pa a saɩ.
N ma n pa a lɩ
a gwar-zɩnzwara tɩm,
sɩ a daarɩ a lɛ gwar-ŋʋnnʋ
wʋpolo ŋwaanɩ.
12 Amʋ laan wʋ́ leeni a zuli nmʋ
dɩ a bɩcarɩ maama,
yɩ a daa bá taa cɩm.
Amʋ Tu Baŋa-Wɛ,
amʋ wʋ́ taa kɩ n le
maŋa maam wuu mʋ.