Baŋa-Wɛ kwǝrǝ na jɩgɩ dam te tɩn
Davidi dɛɛn panɩ ləŋə kantʋ.
29
Wɛyuu malɛsɩ sɩm,pa-na sɩ Baŋa-Wɛ na zulə,
DƖ paarɩ-zulǝ yam dɩ DƖ dam-fɔrɔ kʋm ŋwaanɩ.
2 Pa-na sɩ Baŋa-Wɛ na zulə,
nɩ kʋ na maŋɩ dɩ DƖ yɩrɩ kamunu kʋm te tɩn.
Zuli-na Baŋa-Wɛ sɩ kʋ tɔgɩ dɩ
DƖ na yɔɔrɩ DƖ yɩ wʋ-poŋo tu te tɩn.a
3 Baŋa-Wɛ kwǝrǝ kam bagɩ mʋ
nanɩɩrʋ tɩm baŋa nɩ.
Paarɩ-zulǝ Tu Wɛ dɩm bagɩ
nɩnɛɛnɩ dʋ-baga te tɩn mʋ.
DƖ maa bagɩ na-fara yam baŋa nɩ.
4 Baŋa-Wɛ kwǝrǝ kam tiini ka dana.
Ka maa brɩ DƖ paarɩ
na jɩgɩ dam te tɩn.
5 Baŋa-Wɛ kwǝrǝ kam bagɩ mʋ
ka jaanɩ Liban tɩʋ Sɛdrɩ tweeru tɩm,
ka magɩ-tɩ ka cɩcʋgɩ.
6 DƖ maa paɩ Liban tɩga kam ziziŋi,
nɩ nabɩ-pwala na faŋɩ ya cwi te tɩn.
Hɛrmɔn piu kʋm dɩ maa sisiŋi,
nɩnɛɛnɩ ga-na-pwala na faŋɩ te tɩn.
7 Baŋa-Wɛ na dwanɩ DƖ kwǝrǝ kam,
dʋa mʋ pɩpɩla.
8 DƖ kwǝrǝ kam maa paɩ
sɩ kagʋa kam sisiŋi.
Kadɛsɩ kagʋa kam yɩra saɩ mʋ
Baŋa-Wɛ ŋwaanɩ.
9 Baŋa-Wɛ kwǝrǝ kam zizigi
tu-kamunnu mʋ.
Ka maa siiri gaa wʋ tweeru tɩm vɔɔrʋ maama.
Wɛ paarɩ digə kam nɩ
nɔɔnʋ maama wʋ́ ta wɩ:
«Wɛ jɩgɩ paarɩ-zulǝ!»
10 Baŋa-Wɛ mʋ je na-fara kʋm
baŋa nɩ DƖ di paarɩ.
Dɩntʋ mʋ yɩ Pɛ kʋ taa ve maŋa kalʋ na ba ti tɩn.
11 Baŋa-Wɛ mʋ paɩ DƖ nɔɔna bam dana.
DƖ maa kɩ yu-yoŋo ba yuu nɩ
pa ba jɩgɩ yazurə.b